Hubo 104 - Ndebele Bible (iBhayibhili Elingcwele) 1978

Ukudumisa uMdali wezinto zonke

1Bonga iNkosi, mphefumulo wami.

Nkosi Nkulunkulu wami, umkhulu kakhulu.

Wambethe ubukhosi lodumo,

2wambethe ukukhanya njengengubo,

wena owandlala izulu njengeveli,

3owakha izindlu zakho phezu kwamanzi,

owenza amayezi abe yinkolo yakho,

ohamba ngamaphiko omoya,

4owenza imimoya ibe yizigijimi zakho,

lomlilo lelangabi kube yizikhonzi zakho.

5Wamisa umhlaba phezu kwezisekelo zawo,

ukuba ungazanyazanyiswa lakanye.

6Wawugubuzela ngolwandle njengengubo;

amanzi asibekela izintaba.

7Ekukhuzeni kwakho abaleka;

ekudumeni kwakho aphangisa ukusuka.

8Intaba zaphakama, izihotsha zehlela phansi

endaweni owawuyimisele zona.

9Wamisa umkhawulo ukuba angawudluli,

ukuze angabuyi asibekele umhlaba.

10Wenza ukuba imithombo igobhoze ezihotsheni,

lamanzi ayo agelezele phakathi kwezintaba,

11inathise zonke inyamazana zeganga,

lobabhemi beganga bacime ukoma kwabo.

12Inyoni zaphezulu zakhela emaceleni ayo,

zikhala phakathi kwezingatsha.

13Uthelela izintaba ngamanzi avela endlini yakho ephezulu;

umhlaba ugcwala izithelo zemisebenzi yakho.

14Umilisela inkomo utshani,

uhlumise imibhida ukuba umuntu ayilime,

ukuze azuze ukudla emhlabathini,

15lewayini elithokozisa inhliziyo,

lamagcobo ajabulisayo,

lesinkwa sokumqinisa.

16Izihlahla zeNkosi zithelelwa lizulu,

zona ezaseLebanoni eyazihlanyelayo.

17Inyoni zakhela kuzo;

ingabuzane lilesidleke salo ezihlahleni ezinde.

18Intaba eziphakemeyo zingezamagogo,

amadwala ayisiphephelo sezimbila.

19Wenza inyanga ukuba yahlukanise izikhathi;

ilanga liyasazi isikhathi sokutshona kwalo.

20Wenza umnyama ube yibusuku,

phakathi kwabo kuphume zonke inyamazana zehlathi;

21izilwane ziyabhonga zizingela,

zidinga ukudla kwazo kuNkulunkulu.

22Ekuphumeni kwelanga zibuyela emuva,

zilale ezikhundleni zazo.

23Ng’khona kuphume abantu baye emisebenzini yabo,

basebenze kuze kuhlwe.

24Nkosi, minengi kangaka imisebenzi yakho!

Ngokuhlakanipha uyenzile yonke;

umhlaba ugcwele izidalwa zakho.

25Nantuya ulwandle olukhulu lolubanzi,

okugcwele kulo izinto ezingelakubalwa,

izinto eziphilayo ezincinyane lezinkulu.

26Kuhamba kulo imikolo,

loLeviyathani owamenzela ukuba adlale kulo.

27Zonke lezizidalwa zikhangele kuwe,

ukuba uzinike ukudla ngesikhathi esifaneleyo.

28Lapho uzinika, ziyakudla;

nxa uvula isandla sakho, zisutha okuhle.

29Lapho ufihla ubuso bakho, ziyakhathazeka;

nxa ususa umoya wazo, ziyafa,

zibuyele othulini ezavela kulo.

30Ekuthumeni kwakho umoya wakho, ziyadalwa;

uwenza umhlaba ube mutsha.

31Udumo lweNkosi kalume kuze kube nininini;

iNkosi kayithokoze ngemisebenzi yayo,

32yona ekhangela umhlaba, uthuthumele,

ethinta izintaba, zithunqe.

33Ngizakuyihubela iNkosi ngisekhona;

ngizakuhlabelela uNkulunkulu wami ngisekhona.

34Ukunakana kwami kakumthokozise,

ngoba ngiyathokoza ngayo iNkosi.

35Izoni kaziphele emhlabeni,

kungabe kusaba khona ababi.

Bonga iNkosi, mphefumulo wami.

Dumisani iNkosi!