Jer 35 - Ndebele Bible (iBhayibhili Elingcwele) 1978

Ukulalela kwamaRekabi

1Ilizwi leNkosi elafika kuJeremiya ensukwini zikaJehoyakimi indodana kaJosiya, inkosi yakoJuda, lathi:2 Kho 23:36—24:6; 2 Lan 36:5–7

2Yana endlini yamaRekabi, ukhulume lawo, uwalethe ethempelini uwangenise kwenye indlu yalo, ubusuwanika iwayini ukuba anathe.

3Ngasengithatha uJazaniya indodana kaJeremiya, indodana kaHabaziniya, labafowabo, lawo wonke amadodana akhe, lendlu yonke yamaRekabi.

4Ngabaletha ethempelini, ngabangenisa endlini yamadodana kaHanani indodana kaIgidaliya, umuntu kaNkulunkulu, eyayiseduze lendlu yezikhulu, ngaphezu kwendlu kaMahaseya indodana kaShaluma umlindisango.

5Ngasengibeka phambi kwamaRekabi izimbiza ezigcwele iwayini, kanye lezinkezo, ngathi kibo: Nathani nanti iwayini.

6Kodwa baphendula bathi: Kasilinathi iwayini, ngoba uJonadabi indodana kaRekabi, ukhokho wethu, wasilaya wathi: Lingalinathi iwayini lina labantwana benu kuze kube nininini,

7lingakhi izindlu, lingahlanyeli inhlanyelo, lingabi lazivini; kodwa lihlale emathenteni insuku zenu zonke ukuba lihlale insuku ezinengi elizweni elihlezi kilo.

8Salilalela ilizwi likaJonadabi indodana kaRekabi, ukhokho wethu, kukho konke asilaya ngakho, ukuba singanathi iwayini insuku zethu zonke thina labomkethu lamadodana ethu lamadodakazi ethu,

9lokuba singakhi izindlu zokuhlala; kasilazivini lamasimu, kasihlanyeli inhlanyelo,

10kodwa sihlala emathenteni, senze konke lokho ukhokho wethu uJonadabi asilaya khona.

11Kodwa kwathi lapho uNebukadineza inkosi yaseBabiloni ifika ukuhlasela ilizwe, sathi: Asihambeni siye eJerusalema, sibalekele impi yamaKaladiya lempi yamaSiriya. Sezakhe eJerusalema.

12Laselifika ilizwi leNkosi kuJeremiya lisithi:

13INkosi yamabandla, uNkulunkulu kaIsrayeli ithi: Hamba uyetshela abantu bakoJuda labakhileyo eJerusalema ukuthi: Kaliyikuvuma ukulaywa lokulalela amazwi ami na? kutsho iNkosi.

14Ugciniwe umlayo uJonadabi indodana kaRekabi awunika amadodana akhe wokuba anganathi iwayini; kuze kube lamuhla kawalinathi, ngoba awulalele umlayo kakhokho wawo. Lami ngikhulumile kini njalonjalo, kodwa kalingilalelanga.

15Ngithumele kini zonke inceku zami abaprofethi, ngibathuma njalonjalo, ngisithi: Phendukani lonke endleleni yenu embi, lenze izenzo zenu zibe zinhle, lingalandeli abanye onkulunkulu ukuba libakhonze, ukuze lihlale elizweni engalinika lina lokhokho benu. Kodwa kalingilalelanga, kalingizwanga.

16Amadodana kaJonadabi indodana kaRekabi awugcinile umlayo ukhokho wawo awanika wona, kodwa lababantu kabangilalelanga.

17Ngakhoke iNkosi, uNkulunkulu wamabandla, uNkulunkulu kaIsrayeli, ithi: Khangela, ngizakwehlisela phezu kwabakoJuda laphezu kwabakhileyo bonke eJerusalema konke okubi engikukhulume ngabo; ngoba ngikhulumile kibo, kabangilalelanga, ngibabizile, kodwa kabasabelanga.

18UJeremiya wathi endlini yamaRekabi: INkosi yamabandla, uNkulunkulu kaIsrayeli, ithi: Ngenxa yokuba lilalele umlayo kaJonadabi ukhokho wenu, lagcina yonke imilayo yakhe, lenza njengokulilaya kwakhe,

19ngakhoke iNkosi yamabandla, uNkulunkulu kaIsrayeli, ithi: UJonadabi indodana kaRekabi kayikuswela umuntu ukungisebenzela kuze kube nininini.