1Ngalobobusuku inkosi yaswela ubuthongo; yasisithi kakulethwe kiyo ugwalo lwezindaba zensuku ngensuku, yasilubalelwa.
2Kwakulotshiwe kulo ukuthi uMoridekayi wayebike ngoBigithana loTereshi abathenwa ababili benkosi, ababelinde umnyango wesigodlo, ababenze icebo lokubulala inkosi uAhasuweru.Esta 2:21–22
3Inkosi yathi: UMoridekayi wanikwa udumo bani lobukhulu bani ngalokhu na? Inceku zenkosi ezazikhona zayitshela ukuthi uMoridekayi kenzelwanga lutho.
4Inkosi yasibuza isithi: Ngubani loyana osegumeni na? UHamani wayesand’ ukungena egumeni elingaphandle kwesigodlo ukucela enkosini ukuba uMoridekayi aphanyekwe ogodweni ayemlungisele lona.
5Inceku zenkosi zayiphendula zathi: NguHamani loyana omi laphaya. Inkosi yathi kangene.
6UHamani wangena, inkosi yathi kuye: Uzakwenzelwani lowomuntu inkosi efisa ukumnika udumo na? UHamani wasezikhumbulela esithi: Kambe kungaba ngubani inkosi engafisa ukumnika udumo kulami na?
7Wasesithi enkosini: Lowomuntu inkosi efisa ukumnika udumo
8kalethelwe izambatho zobukhosi ezigqokwa yinkosi uqobo, lebhiza eligadwa yinkosi elilomqhele wobukhosi ekhanda lalo;
9lezozambatho lalelobhiza kunikezwe komunye wezikhulu zenkosi ohloniphekayo kakhulu, ukuba agqokise lowomuntu inkosi efisa ukumnika udumo, amkhokhele egade ibhiza adabule igceke lomuzi, amemeze athi: Bonani okwenzelwe lowomuntu inkosi efisa ukumnika udumo.
10Inkosi yasisithi kuHamani: Letha izambatho lebhiza masiyane njengokutsho kwakho, konke lokhu ukwenzele uMoridekayi umJuda okhona lapha esigodlweni, ungatshiyi lokukodwa kukho konke lokho okukhulumileyo.
11UHamani wasethatha izambatho lebhiza, wagqokisa uMoridekayi, wamkhokhela uMoridekayi ekhwele ibhiza, wadabula igceke lomuzi ehamba ememeza esithi: Bonani okwenzelwe lowomuntu inkosi efisa ukumnika udumo.
12Wasebuyela uMoridekayi esigodlweni, loHamani waya ekhaya masinyane elila embomboze ikhanda lakhe.
13UHamani watshela uZereshi umkakhe labo bonke abangane bakhe konke okumehleleyo. Abangane bakhe loZereshi umkakhe bathi kuye: Uba uMoridekayi osusiwa phambi kwakhe engowesizwe sabaJuda kawuyikumahlula, uzakukwahlula wena impela.
14Kwathi lapho besakhuluma loHamani, kwafika abathenwa benkosi, bamthatha uHamani masinyane, baya laye edilini elalenziwe nguEsta.
Who We AreWhat We EelieveWhat We Do
2025 by iamachristian.org,Inc All rights reserved.
