1 Sam 20 - Ndebele Bible (iBhayibhili Elingcwele) 1978

Ubungane bukaDavida loJonathani

1UDavida wabaleka eNayothi eRama, waya kuJonathani, wathi kuye: Ngenzeni na? Liyini icala lami na? Uyihlo uthi ngoneni ukuba afune ukungibulala na?

2UJonathani wathi kuye: Atshi bo! Kawusoze ufe; ubaba kenzi lutho olukhulu loba oluncinyane engangitshelanga. Phoke, ubaba uzakufihlelani kimi lokhu na? Kakunjalo.

3Kodwa uDavida wafunga wathi: Uyihlo uyazi kuhle ukuba wena uyangithanda; uthi: UJonathani kangakwazi lokhu funa abe losizi. Kodwake ngifunga iNkosi kanye lawe, kangikhatshana lokufa.

4UJonathani wasesithi kuDavida: Loba kuyini okutshoyo, ngizakukwenzela khona.

5UDavida wathi kuJonathani: Kusasa inyanga izabe ithwasile; kangifanele ukuphutha ekudleni lenkosi; kodwa ungivumele ukuba ngiyecatsha egangeni kuze kube lusuku lwesithathu kusihlwa.Nani 28:11

6Uba uyihlo engidinga, uzakuthi: UDavida ucelile kimi ukuba ake agijimele eBetlehema umuzi wakibo; ngoba kukhona lapho umhlatshelo weminyaka yonke owenzelwe yonke indlu yakwabo.

7Uba esithi: Kulungile; kuzayilungela inceku yakho. Kodwa uba ethukuthela, uzakwazi ukuthi uqonde ukungenzela okubi.

8Ngakhoke hawukela inceku yakho, ngoba wenzile isivumelwano esingcwele lenceku yakho. Kodwa uba ngilecala, ngibulala wena; ngoba uzangiselani kuyihlo na?

9UJonathani wasesithi: Atshi bo! uba bengisazi ukuthi ubaba uqonde ukuba wehlelwe ngokubi, bengingayikukutshela na?

10UDavida wasesithi kuJonathani: Ngubani ozangitshela uba uyihlo ekuphendula kubi na?

11UJonathani wathi kuDavida: Woza siye emmangweni. Basebephuma bobabili besiya emmangweni.

12UJonathani wasesithi kuDavida: INkosi, uNkulunkulu kaIsrayeli, ibe ngufakazi. Lapho sengimchwayisisile ubaba ngalesisikhathi kusasa loba ngomhlomunye, uba ubaba elomoya omuhle ngawe, ngizathumela ilizwi kuwe ngikutshele.

13Uba ubaba eqonde ukukwenzela okubi, iNkosi yenze njalo kimi ngokwengezelelweyo, uba ngingakutsheli, ngikuvumele ukuba uhambe kuhle. INkosi ibe lawe njengoba ibilobaba.

14Ngiyazi ukuthi nxa ngisaphila, uzakuba ngumngane wami othembekileyo, njengokuthandwa yiNkosi;

15uba ngisifa, uhlale njalo uthembekile endlini yami. Lapho iNkosi isiziqedile emhlabeni zonke izitha zakho,2 Sam 9:1

16iNkosi ikubeke icala wena kanye lendlu yakho uba lingaseyizo izihlobo zami.

17UJonathani waphinda wamfungisa uDavida ngokumthanda kwakhe; ngoba wayemthanda njengokuba wayezithanda yena.

18UJonathani wasesithi kuye: Kusasa inyanga izabe ithwasile; uzasweleka ngoba isihlalo sakho sizabe size.

19Ngosuku lwesithathu uzasweleka kakhulu. Ubokuya endaweni owacatsha kuyo ngosuku lwendaba leyo, uhlale lapho eduze lenqumbi yamatshe.

20Ngizatshoka imitshoko emithathu phansi kwayo, kungathi nginemba ibala.

21Ngizathuma umfana, ngithi: Hamba uyeyidinga imitshoko. Uba ngisithi emfaneni: Imitshoko inganeno kwakho, idobhe; ubokuza wena, ngoba kakulangozi, ngifunga iNkosi.

22Kodwa uba ngisithi emfaneni: Imitshoko ingale kwakho; ubohamba wena ngoba iNkosi ithe ufanele uhambe.

23Mayelana lendaba esikhulume ngayo mina lawe, iNkosi izakuba ngufakazi wethu kuze kube nininini.

24Ngakho uDavida wacatsha emmangweni. Isithwasile inyanga, inkosi uSawuli yahlala ukuba idle.

25Yayihlezi esihlalweni esiphambi komduli njengokwenza kwayo izikhathi zonke; uJonathani wayehlezi maqondana layo, loAbineri ehlezi eceleni kwayo; kodwa indawo kaDavida yayingelamuntu.

26Kodwa uSawuli katshongo lutho ngalolosuku; ngoba wacabanga wathi: Okuthile kumehlele; kahlambulukanga, impela kahlambulukanga.

27Kodwa ngosuku lwesibili, usuku olulandela ukuthwasa kwenyanga, indawo kaDavida yayingelamuntu. USawuli wasesithi kuJonathani indodana yakhe: Kungani indodana kaJese ingezanga ekudleni lamuhla layizolo na?

28UJonathani wamphendula uSawuli wathi: UDavida wangicela ukuba aye eBetlehema;

29wathi: Akungivumele ukuba ngihambe; ngoba indlu yakwethu ilomhlatshelo ekhaya, lomfowethu ungilayile ukuba ngibe khona. Ngakhoke uba ungithanda, ngivumela ukuba ngihambe ngiyebona abafowethu. Ngenxa yalokhoke kezanga ukudla lenkosi.

30USawuli wamthukuthelela uJonathani, wathi kuye: Wena ndodana yomfazi owonakeleyo longathembekanga! Uthi kangazi yini ukuthi uyikhethile indodana kaJese, lokuthi ngalokho uthele ihlazo kuwe lakunyoko na?

31Ngoba nxa isekhona emhlabeni indodana kaJese, kawuyikuma wena lombuso wakho. Ngakho thumela ilizwi umlethe kimi, ngoba uzakufa yena impela.

32UJonathani wasemphendula uyise wathi: Uzabulawelwani na? Wenzeni na?

33USawuli wamphosa ngomkhonto ukuba amgwaze. Wasebona uJonathani ukuba uyise uqonde ukumbulala uDavida.

34UJonathani wasuka etafuleni esethukuthele kakhulu, kadlanga ngosuku lwesibili lwenyanga, ngoba wayelosizi ngoDavida, ngoba uyise emyangisile.

35Kusisa uJonathani waphuma, waya emmangweni ngesikhathi ababesimisile loDavida, wahamba lomfanyana.

36Wathi emfaneni wakhe: Gijima, ucinge imitshoko engiyitshokayo. Esagijima umfana, uJonathani watshoka umtshoko ngaphambi kwakhe.

37Lapho umfana esefikile endaweni lapho uwele khona umtshoko uJonathani awutshokileyo, uJonathani wammemeza umfana wathi: Umtshoko ungaphambi kwakho.

38Phangisa, ukhawuleze, ungaphuzi. Ngakho umfana kaJonathani wayiqoqa imitshoko, labuyela enkosini yakhe.

39Kodwa umfana wayengazi lutho, kuphela uJonathani loDavida babekwazi.

40UJonathani wanika umfana wakhe izikhali zakhe, wathi kuye: Hamba, uzise ekhaya.

41Esehambile umfana, uDavida wasukuma ngemva kwenqumbi yamatshe, wakhothama kathathu. Basebesangana, bakhala bonke, waze waba losizi kakhulu uDavida ukwedlula uJonathani.

42UJonathani wasesithi kuDavida: Hamba kuhle, lokhu sifungile sobabili ngebizo leNkosi, sathi: INkosi izakuba ngufukazi wami lowakho, lowenzalo yami leyakho, kuze kube nininini. UDavida wasukuma wahamba; loJonathani wabuyela ekhaya.