Seb 20 - Ndebele Bible (iBhayibhili Elingcwele) 1978

UPawuli useMakedoniya

1Sesiphelile isiyaluyalu, uPawuli wabiza abafundi, esebakhuthazile wabavalelisa, wasuka waya eMakedoniya.

2Esedabule lezondawo, ebakhuthaza kakhulu, wafika elizweni lamaGriki,

3wahlala khona inyanga ezintathu. AbaJuda sebenze icebo ngaye esezakusuka ngomkolo ukuya eSiriya, wazimisela ukubuyela emuva adabule eMakedoniya.

4Waphelekezelwa nguSopatheri waseBeriya indodana kaPiru, labaseTesalonika uAristako loSekhundu, loGayu waseDerbe, loTimothi, labaseAsiya uTikiko loTrofimu.

5Laba bahamba ngaphambi kwethu, basilindela eTrowasi.

6Kodwa sasuka ngomkolo eFiliphi emva kwensuku zesinkwa esingelamvubelo, safika eTrowasi emva kwensuku ezinhlanu, sahlala khona insuku eziyisikhombisa.

UPawuli uvusa uYutiku ekufeni

7Kwathi ngosuku lokuqala lweviki, sesibuthene ukuba sihlephule isinkwa, uPawuli wakhuluma labo eqonde ukuhamba kusasa, welula inkulumo yakhe kwaze kwaba phakathi kobusuku.

8Kwakukhona izibane ezinengi endlini ephezulu esasibuthene kiyo.

9Kwakuhlezi ngasewindini insizwa ethiwa nguYutiku, eyajunywa yibuthongo obukhulu. UPawuli esekhulume isikhathi eside isiyahlulwe yibuthongo, yawela phansi isuka esitezi sesithathu, yadojwa isifile.

10Kodwa uPawuli wehla, waziphosela phezu kwayo, wayisingatha, wathi: Lingakhathazeki, ngoba umphefumulo wayo usekhona kiyo.

11Esenyukile uPawuli wahlephula isinkwa, wadla waxoxa labo isikhathi eside, wasehamba.

12Basebemthatha umfana esilile, bathokoza kakhulu.

UPawuli useMilethu; uvalelisa abaseEfesu

13Thina sahamba ngaphambili ukuya emkolweni, sasuka ngomkolo saya eAsosi siqonde ukumkhwelisa uPawuli lapho; ngoba wayemisile ngokunjalo, yena ebezakuhamba ngenyawo.

14Esehlangene lathi eAsosi, samkhwelisa, safika eMithilene.

15Sasuka lapho ngomkolo kusasa safika maqondana leKiyosi; langomhlomunye sasondela eSamosi; ngosuku olulandelayo safika eMilethu.

16Ngoba uPawuli wayezimisele ukuyiceza iEfesu ukuze angalibali eAsiya; wayephanga ukuba abe seJerusalema, uba kungenzeka, ngosuku lwePentekoste.

17EseMilethu wathumela eEfesu, wabiza abadala bebandla.

18Kwathi sebefikile kuye, wathi kubo: Liyazi lina ukuba kusukela osukwini lokuqala lokufika kwami eAsiya ukuthi ngangihlezi njani isikhathi sonke phakathi kwenu,

19ngakhonza iNkosi ngakho konke ngokuthobeka, langezinyembezi, langokulingwa okwangehlela ngamacebo abaJuda,

20lokuthi kangigodlanga lutho olusizayo kini, ngalifundisa phambi kwabantu lakuzo izindlu ngezindlu,

21ngifakaza kubaJuda lakumaGriki ukuphendukela kuNkulunkulu lokukholwa iNkosi yethu uJesu Kristu.

22Khathesi, khangelani, ngenyukela eJerusalema ngiqhutshwa nguMoya ngingakwazi okuzakungehlela lapho,

23kuphela uMoya oNgcwele uyangifakazela emizini yonke ukuthi ukubotshwa lokuhlupheka kungilindele.

24Kodwa ukusila kwami angikutshayi into enkulu leligugu kimi, kuphela ukuba ngiphelelise uhambo lwami lenkonzo engayamukela eNkosini uJesu eyokufakaza ngevangeli lomusa kaNkulunkulu.2 Tim 4:7

25Khathesi, ngiyazi ukuthi kalisayikubona ubuso bami lina lonke engihamba phakathi kwenu, ngitshumayela umbuso.

26Ngakhoke ngiyafakaza kini ngalolusuku lwalamuhla ukuthi ngimhlophe kulo igazi labantu bonke.

27Ngoba kangiyekelanga ukulitshela lonke icebo likaNkulunkulu.

28Ziqapheleni lina lawo wonke umhlambi alibeke kuwo uMoya oNgcwele ukuba libe ngababonisi bokwalusa ibandla leNkosi ezizuzele lona ngegazi layo.

29Ngiyazi ukuthi emva kokuhamba kwami kuzakungena impisi eziphangayo phakathi kwenu zingawuhawukeli umhlambi,

30laphakathi kwenu kuzakuvela amadoda akhuluma izinto eziduhisayo, ukuze ahuge abafundi ukuba bawalandele.

31Ngakho lindani, likhumbule ukuthi okweminyaka emithathu ebusuku lemini kangiyekelanga ukuleluleka lonke ngenyembezi.

32Ngakhoke sengilinikeza kuNkulunkulu laselizwini lomusa wakhe, elilamandla okulakha lokulabela ilifa phakathi kwabo bonke abamahlukaniselweyo.

33Kangihawukelanga isiliva legolide lezambatho zamuntu;

34lina uqobo lwenu liyazi ukuthi lezizandla zasebenzela inswelo zami lezalabo ababelami.

35Kukho konke ngilitshengisile ukuthi kumele ukuba sisize ababuthakathaka ngokusebenza okunjalo, sikhumbule amazwi eNkosi uJesu ukuthi yena wathi: Kubusisekile ukupha kulokwamukela.

36Esetshilo lokhu waguqa phansi labo bonke, wakhuleka.

37Bakhala bonke, bamgona uPawuli, bamanga,

38belosizi kakhulu ngelizwi alitshoyo elokuthi kabasayikubona ubuso bakhe futhi. Bamphelekezela, baya laye emkolweni.