Isa 41 - Ndebele Bible (iBhayibhili Elingcwele) 1978

UNkulunkulu uzamlondoloza uIsrayeli

1UNkulunkulu uthi:

Thulani, lingilalele, lina mazwe angasolwandle,

izizwe kazizuze amandla amatsha,

kazisondele kimi andubana zikhulume;

asihlangane ekwahluleleni.

2Ngubani ovusa lowo ovela ngasempumalanga

onqobayo kuzo zonke indawo ahamba kizo na?

Ngubani onikela izizwe phambi kwakhe,

amenze anyathezele phansi amakhosi,

umkhonto wakhe uyawachitha njengothuli,

lemitshoko yakhe iwatsahaze njengezibi phambi komoya na?

3Uxotshana lazo, adlule angathintwa lutho,

kungathi inyawo zakhe kazinyatheli emhlabathini.

4Ngubani oveze lokhu, wakwenza,

obiza izizukulwana kusukela ekuqaleni na?

Kuyimi iNkosi engingowokuqala,

engilokho nginjalo lasekucineni.

5Amazwe angasolwandle ayesaba,

umhlaba wonke uyathuthumela,

abantu bawo sebehlangene.

6Yilowo lalowo usiza umakhelwana wakhe,

athi kumfowabo: Mana isibindi!

7Umbazi umisa umkhandi isibindi,

lalowo ololonga ngesando ammise isibindi obethela ndawonye isithombe,

esithi: Kunanyathiselwe kuhle;

ekubethela ngezipikili ukuze kuqine.

8Kodwa wena Israyeli, nceku yami,

wena Jakobe engikukhethileyo,

nzalo kaAbrahama umngane wami,

9wena engakuthatha emikhawulweni yomhlaba,

ngakubiza ezingonsini zawo ezikhatshana,

ngisithi kuwe: Wena uyinceku yami,

ngikukhethile, kangiyikukulahla;

10ungesabi, ngoba mina ngilawe,

ungapheli amandla, ngoba mina nginguNkulunkulu wakho;

ngizakukuqinisa, ngikusize,

ngikusekele ngesandla sami sokunene esinqobayo.

11Bonke abakuthukutheleleyo bazayangeka badaniswe;

lalabo abalwa lawe bazakuba yize babhubhe.

12Uzabadinga labo abalwa lawe,

kodwa ungabafumani;

bonke abalwa lawe bazakuba yize.

13Ngoba mina Nkosi, uNkulunkulu wakho, ngikubamba ngesandla sakho sokunene;

ngithi kuwe: Ungesabi, ngizakukusiza.

14Ungesabi wena mpethu enguJakobe,

lawe sibungu esinguIsrayeli.

Mina ngizakukusiza, kutsho iNkosi;

umhlengi wakho ungoNgcwele kaIsrayeli.

15Ngizakukwenza ukuba ube lubhulo olutsha olulenhlendla ezibukhali;

uzakubhula izintaba uzibhidlize,

wenze amaqaqa abe njengothuli;

16uzakuwaphosa phezulu, lomoya uzawaphephula,

lesivunguzane siwachithachithe;

uthokoze ngeNkosi, uzibonge ngoNgcwele kaIsrayeli.

17Lapho abayanga labaswelayo bedinga amanzi, kodwa engekho,

lenlimi zabo sezomile kakhulu,

mina Nkosi ngizakubaphendula,

mina Nkulunkulu kaIsrayeli kangiyikubalahla.

18Ngizakuvula imifula emadundulwini angelalutho,

lemithombo phakathi kwezigodi;

ngiphendule inkangala ibe yisiziba samanzi,

lomhlabethi owomileyo ube yimithombo yamanzi.

19Ngizamilisa enkangala izihlahla zomkusu, lezomvagazi,

lezomtshekisane, lezamaoliva,

ngikhulise engwaduleni izihlahla zamaphane, lomangwe, lomnondo,

20ukuze abantu babone, bazi baqaphelise, baqedisise bonke,

ukuthi isandla seNkosi sikwenzile lokhu,

lokuthi oNgcwele kaIsrayeli ukudalile.

Onkulunkulu abanye bayize

21Lina bonkulunkulu bezizwe, landani indaba yenu, kutsho iNkosi,

lilethe ubufakazi benu, kutsho iNkosi kaJakobe.

22Sondelani lisitshele okuzakwenzeka;

sitsheleni izinto zakuqala ukuba ziyini,

ukuze sinakane ngazo, sazi ukuphela kwazo,

loba lisitshele izinto ezizayo.

23Sitsheleni okuzayo ngesikhathi esizayo,

ukuze sazi ukuba lingonkulunkulu;

yenzani okuhle ingabe lenze okubi,

ukuze simangale, sithuthumele.

24Khangelani, liyize, lomsebenzi wenu uyize;

uyisinengiso laye olikhethayo.

25Ukhona engimvusileyo ngasenyakatho, njalo usefikile;

ngimvusile ngasempumalanga, uzabiza ibizo lami;

uzanyathela izikhulu njengodaka, lanjengombumbi evoxa ibumba.

26Ngubani owakubikayo lokho ngasekuqaleni, ukuba sikwazi,

langaphambili ukuze sitsho ukuthi: Uqinisile?

Kakho owake wakubika, kakho owake wakumemezela,

kakho lowezwayo amazwi enu.

27Kwaba yimi owaba ngowokuqala okubika eZiyone,

nganika iJerusalema umbiko wezindaba ezinhle.

28Kodwa lapho ngikhangela, kakulankulunkulu;

kakho phakathi kwabo ongeluleka, ongaphendula lapho ngibuza.

29Bayinkohliso bonke, lemisebenzi yabo iyize,

lezithombe zabo ezibunjiweyo zingumoya leze.