Zaga 17 - Ndebele Bible (iBhayibhili Elingcwele) 1978

1Kungcono ukuba lesinkwa esomileyo kanye lokuthula,

kulokuba lendlu egcwele okuhlatshiweyo kanye lokuxabana.

2Inceku ehlakaniphileyo izakuba lamandla phezu kwendodana eyangisayo,

idle ilifa phakathi kwezelamani.

3Igolide lesiliva kuhlolwa esithandweni somlilo,

ngokunjalo kuyiNkosi ehlola inhliziyo zabantu.

4Owenza okubi ulalela amazwi amabi,

loqamba amanga ulalela ukunyeya.

5Oklolodela umuntu ongumyanga uthuka uMenzi wakhe;

ohleka umuntu ohluphekayo kayikuyekelwa.

6Abazukulu baludumo lwabadala,

labazali baludumo lwabantwana.

7Kakufanelanga ukuba isithutha sikhulume amazwi ahlakaniphileyo,

ngokunjalo kakufanelanga ukuba isikhulu sikhulume amanga.

8Umvuzo wokuthengwa unjengentelezi kuye owunikayo,

uphumelela kukho konke akwenzayo.

9Ofihla icala lomunye ufuna uthando lwakhe,

kodwa ophindaphinda ukukhuluma ngalo uchitha ubungane.

10Ukusolwa kanye kuyamsiza kakhulu umuntu oqedisisayo,

kulokutshaywa kwesithutha imivimvinya elikhulu.

11Umuntu omubi udinga ukuhlamuka kuphela;

ngalokho isithunywa esilendaba embi sizathunyelwa kuye.

12Kungcono ukuhlangana lebhere elithathelwe imidlwane yalo,

kulesithutha ebuthutheni baso.

13Uba umuntu ephindisela okuhle ngokubi,

ububi kabusoze busuke endlini yakhe.

14Ukuqala kwenkani kunjengokufohla kwamanzi;

ngakho yekela ukuxabana kungaketshisi.

15Ukuyekela ababi lokulahla abalungileyo kuzondwa yiNkosi.

16Imali ingasisiza njani isithutha?

Uba singelangqondo singathenga ukuhlakanipha na?

17Umngane utshengisa uthando izikhathi zonke,

lomzalwane uzalelwa ukusiza ekuhluphekeni.

18Umuntu kalangqondo nxa ethembisa isithembiso

sokuba yisibambiso somakhelwana wakhe.

19Othanda ukona uthanda ukubanga inkani;

okhuluma ngokuziqakisa ufuna ukubhujiswa.

20Umuntu olenhliziyo embi katholi okuhle,

lokhuluma okubi wehlelwa yinhlupheko.

21Oyisithutha ulusizi kuyise,

loyise wesithutha kalakuthokoza.

22Othokozayo unjengomuthi omuhle,

kodwa umoya owaphukileyo ugulisa umzimba.

23Umuntu omubi wamukela umvuzo wokuthengwa ensitha,

ukuba ahlanekele ukulunga.

24Oqedisisayo ukhangela njalo ukuhlakanipha,

kodwa amehlo esithutha agcwele indawo zonke.

25Indodana eyisithutha iyamdanisa uyise,

ilethela unina owayizalayo usizi olukhulu.

26Ukuhlawulisa umuntu olungileyo kakulunganga,

lokutshaya izikhulu kubi.

27Ohlakaniphileyo uvala umlomo wakhe,

oqedisisayo ulomoya opholileyo.

28Lesithutha uba sithula kuthiwa sihlakaniphile;

ovala umlomo wakhe kuthiwa ulokwazi.