Isa 7 - Ndebele Bible (iBhayibhili Elingcwele) 1978

Ilizwi likaIsaya kuAhazi

1Kwathi ensukwini zokubusa kukaAhazi indodana kaJothamu, indodana kaUziya inkosi yakoJuda, uRezini inkosi yaseSiriya loPeka indodana kaRemaliya inkosi yakoIsrayeli bafika eJerusalema ukulihlasela, kodwa kabalinqobanga.2 Kho 16:5; 2 Lan 28:5–6

2Lapho kubikwa endlini kaDavida ukuthi iSiriya ihlangene loEfrayimi, uAhazi labantu bakhe bathuthumela njengezihlahla zinyikinywa ngumoya.

3INkosi yathi kulsaya: Suka uyehlangabeza uAhazi, wena lendodana yakho uSheyari‐Yashubi, ngasekucineni komfolo wechibi elingaphezulu, elisendleleni yeNsimu yoMgezisi,

4uthi kuye: Qina, ume isibindi, ungesabi, inhliziyo yakho ingathuthunyeliswa yilezizikhuni ezimbili ezithunqayo nje, ungathuthunyeliswa lulaka oluvuthayo lukaRezini leSiriya lendodana kaRemaliya.

5Ngoba iSiriya loEfrayimi lendodana kaRemaliya bacebile okubi ngawe,

6besithi: Asiye koJuda, simhlasele, simnqobe, sibeke indodana kaTabeyeli ibe yinkosi khona.

7INkosi uNkulunkulu ithi:

Icebo labo lizakwahluleka, kaliyikuphumelela,

8lanxa umuzi omkhulu waseSiriya uliDamaseko,

lenkosi yaseDamaseko inguRezini;

eminyakeni engamatshumi ayisithupha lanhlanu

uEfrayimi uzakuchitheka, kungasali muntu,

9lanxa umuzi omkhulu wakoEfrayimi uyiSamariya,

lendodana kaRemaliya iyinkosi yaseSamariya.

Uba lingakholwa, isibili kaliyikuma.

Ilizwi likaIsaya ngoEmanuweli

10INkosi yathi kuAhazi:

11Cela isibonakaliso eNkosini uNkulunkulu wakho, esivela phansi endaweni yabafileyo loba engqongeni phezulu.

12Kodwa uAhazi wathi: Kangiyikucela, kangiyikulinga iNkosi.

13UIsaya wathi: Zwana, wena ndlu kaDavida; kuyinto encinyane kuwe yini ukuba udinise abantu; uzabuya udinise loNkulunkulu wami futhi na?

14Ngakhoke iNkosi uqobo izakukunika isibonakaliso. Khangela, intombi izakuthatha isisu, ibelethe indodana ezakubizwa ngokuthi nguEmanuweli.Mat 1:23

15Lapho esekhulile esekwazi ukukhetha okuhle lokubi uzakudla amasi lenyosi;

16kodwa esesengumntwana engakakwazi ukwala okubi, akhethe okuhle, ilizwe lamakhosi amabili owesabayo lizabe selachitheka.

17INkosi izakukulethela wena labantu bakho, lendlu kayihlo insuku ezingazanga zibe khona, selokhu kwasukela osukwini lokwahlukana kukaEfrayimi loJuda; ngitsho inkosi yaseAsiriya.

18Ngalolosuku iNkosi izabiza ngomlozwi imiyane ehlala ekudabukeni kwemifula yaseGibithe, lenyosi eselizweni laseAsiriya.

19Kuzakuza konke, kuhlale ezigodini ezilamawa, lasembalwini zamadwala, lasezihlahleni zonke zameva, lasemadlelweni wonke.

20Ngalolosuku iNkosi izakugela ilizwe lakini ngensingo eyebolekwe phetsheya kweYufrathi, ngitsho inkosi yaseAsiriya, igele zonke inwele zalo kanye lendevu.

21Kuzakuthi ngalolosuku umuntu afuye ithokazi libe linye, lezimvu ezimbili,

22kuthi ngokwehlisa kwazo adle amasi; ngoba bonke abaseleyo elizweni bazakudla amasi lenyosi.

23Kuthi ngalolosuku, lapho okwakukhona amavini ayinkulungwane alingana lenhlamvu zesiliva eziyinkulungwane, kube khona ameva lokhula.

24Abantu bazakuyazingela khona ngemikhonto, ngoba ilizwe lonke lizabe seligcwele ameva lokhula.

25Emaqaqeni wonke ayelinywa kakuyikuyiwa khona ngokwesaba ameva lokhula; kodwa kuzakuba yindawo yokwelusela inkomo lezimvu.