Seb 18 - Ndebele Bible (iBhayibhili Elingcwele) 1978

UPawuli useKorinte laseEfesu

1Emva kwalokho wasuka eAtene, waya eKorinte.

2Wafumana khona umJuda othiwa nguAkwila, owasePontusi ngokuzalwa, wayesand’ukufika evela eItaliya kanye lomkakhe uPrisila ngenxa yesimemezelo sikaKlawudiya sokuthi bonke abaJuda kabasuke eRoma. UPawuli waya kubo;

3ngoba babesebenza msebenzi munye, wahlala kibo esebenza labo. Umsebenzi wabo wawungowokwenza amathente.

4AmaSabatha wonke wakhuluma esinagogeni, wazuza abaJuda lamaGriki.

5Kwathi sebefikile oSilasi loTimothi bevela eMakedoniya, uPawuli wakhuthalela ukutshumayela, efakaza kubaJuda ukuba uJesu unguKristu.

6Kwathi bemphikisa, bemhlambaza, wathintitha ingubo zakhe, wathi kubo: Igazi lenu kalibe phezu kwamakhanda enu; mina kangilacala; kusukela lamhla ngizakuya kwabezizwe.

7Wasuka lapho, waya endlini yendoda ethile ekhonza uNkulunkulu ethiwa nguTithiyu Justusi, indlu yayo yayiseduze lesinagoge.

8Kodwa uKrispu umphathi wesinagoge wakholwa eNkosini kanye lendlu yakhe yonke, labanengi kwabaseKorinte balalela uPawuli, bakholwa, babhaphathizwa.

9INkosi yathi kuPawuli ebusuku ngombono: Ungesabi, kodwa khuluma, ungathuli;

10ngoba mina ngilawe, kakho umuntu ozakukuhlasela, akulimaze, ngoba ngilabantu abanengi kulumuzi.

11Wahlala khona umnyaka lenyanga eziyisithupha efundisa ilizwi likaNkulunkulu phakathi kwabo.

12Kwathi uGaliyo esengumbusi waseAkaya, abaJuda bamvukela uPawuli nganhliziyonye, bamusa phambi kwesihlalo sokuthonisisa,

13bathi: Lumuntu uphendula abantu ukuba bakhonze uNkulunkulu ngokuphambene lomlayo.

14Kodwa kwathi uPawuli esezakuvula umlomo wakhe, uGaliyo wathi kubaJuda: Lina baJuda, uba bekulicala lokwenza okubi, loba elobugebenga, bengizakulilalela;

15kodwa ngoba kuyikuphikisana ngamazwi, langamabizo, langomlayo wenu, ziboneleni lina; mina kangithandi ukuba ngumgwebi walezizinto.

16Wasebaxotsha esihlalweni sokuthonisisa.

17Bonke basebembamba uSostene umphathi wesinagoge, bamtshaya phambi kwesihlalo sokuthonisisa, kodwa uGaliyo kaze akunanza lokho.

18Kwathi uPawuli esehlale khona insuku ezinengi, wavalelisa abazalwane, wasuka ngomkolo, waya eSiriya kanye loPrisila loAkwila; wagela inwele zakhe eKenikreya, ngoba wayezibophe ngesifungo.Nani 6:18

19Sebefikile eEfesu, wehlukana labo; yena wangena esinagogeni, waphikisana labaJuda.

20Sebemcelile ukuba ahlale isikhathi eside, wala,

21kodwa ebavalelisa wathi: Ngizakubuya uba uNkulunkulu evuma. Wasuka eEfesu ngomkolo;

22esefikile eKesariya wayabingelela ibandla; wasesehlela eAntiyoki.

Uhambo lwesithathu lukaPawuli. UApolo useEfesu

23Esehlale khona isikhathi esithile wasuka wadabula ilizwe laseGalathiya lelaseFrigiya eqinisa bonke abafundi.

24UmJuda othile othiwa nguApolo, owaseAleksandriya ngokuzalwa, wafika eEfesu, wayeyindoda efundileyo leyaziyo imibhalo.

25Wayefundisiwe indlela yeNkosi; evutha emoyeni wakhuluma, wafundisa ngokuqondileyo indaba ezimayelana loJesu, esazi ubhaphathizo lukaJohane kuphela;

26waqala ukutshumayela ngesibindi esinagogeni. Kwathi ukuba bamuzwe oPrisila loAkwila, bamthatha bamchasisela indlela kaNkulunkulu ngokuqondileyo.

27Esethanda ukuwelela eAkaya, abazalwane bamkhuthaza, balobela abafundi ukuba bamamukele; esefikile wabasiza kakhulu ababekholiwe ngomusa,

28ngoba waphikisa abaJuda ngamandla phambi kwabantu, etshengisa ngemibhalo ukuba uJesu unguKristu.