Jobe 13 - Ndebele Bible (iBhayibhili Elingcwele) 1978

UJobe ucabanga ukuthi ulungile

1Konke lokhu ngikubonile ngamehlo ami,

ngakuzwa ngendlebe zami, ngakuqedisisa.

2Elikwaziyo lami ngiyakwazi;

kalingedluli ngalutho.

3Kodwa ngifisa ukukhuluma loSomandla,

ngifuna ukuphikisana loNkulunkulu.

4Linake lingabaqambi bamanga,

liyizinyanga ezingelamsebenzi lonke.

5Kungathi ngabe liyathula,

lokhu kube yikuhlakanipha kwenu!

6Ake lizwe ukukhuluma kwami,

lilalele ukuncenga kwami.

7Lizamkhulumela uNkulunkulu ngokubi,

limkhulumele ngenkohliso na?

8Lizamvuna uNkulunkulu yini,

ingabe lizammela na?

9Kuzalilungela yini lapho eselihlola na?

Lizamkhohlisa yini njengokukhohliswa komuntu na?

10Impela uzakulisola, uba livuna abantu ensitha.

11Ubukhulu bakhe kabulethusi yini,

lokwesabeka kwakhe kakuyikulehlela na?

12Amazwi enu ayizaga zomlotha,

lokuzivikela kwenu kuyizivikelo zebumba.

13Ake lithule, ngikhulume mina,

kungehlele loba kuyini.

14Ngizadela inyama yami,

ngingenise ukuphila kwami engozini.

15Uzangibulala; angiselalo ithemba;

kanti ngizazivikela indlela zami phambi kwakhe.

16Lokhu kuzakuba lusizo lwami,

ukuthi ongamesabiyo uNkulunkulu kayikuza phambi kwakhe.

17Lalelani kuhle amazwi ami,

lizwe engikukhulumayo.

18Sengiyilungisile indaba yami,

ngiyazi ukuba ngizayekelwa.

19Ngubani ozaphikisana lami na?

Keze ngoba ngingazithulela ngife.

20Nkulunkulu, nginika izinto ezimbili nje,

ng’khona ngingayikukucatshela.

21Susela khatshana lami isandla sakho,

ngingethuswa yikwesabeka kwakho.

22Ungibize, ngizasabela,

ingabe uyekele ngikhulume, uphendule.

23Iziphambeko zami zingaki na?

Ngitshengisa isiphambeko sami lesono sami.

24Ucatshelani, ungitshayelani isitha sakho na?

25Uzakwethusa ihlamvu eliphephethekayo,

uxotshane lomule owomileyo na?

26Ngoba ubale okubuhlungu ngami,

wangenza ngadla ilifa lobubi bobutsha bami.

27Uzikhinile inyawo zami,

waqaphela zonke indlela zami,

wazibekela umkhawulo inyawo zami.

28Kanti nginjengento ebolayo,

lanjengengubo edliwe zinondo.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help