Seb 24 - Ndebele Bible (iBhayibhili Elingcwele) 1978

UPawuli eyisibotshwa umangalelwa kuFelike eKesariya

1Emva kwensuku ezinhlanu uAnaniya wafika labadala abathile lomkhulumeli othiwa nguTertulo; bammangalela uPawuli kumbusi.

2Kwathi esebiziwe uTertulo waqala ukumbeka icala esithi: Mhlekazi, Felike, lokhu kokuthi ngenxa yakho sizuzile isikhathi eside sokuthokoza lokuthula, langokubonelela kwakho lesisizwe senzelwe okunengi okuhle

3ngazo zonke indlela lakuzo zonke indawo, siyakwamukela lokhu ngakho konke ukubonga.

4Kodwa ukuba ngingakubambeleli, ngiyakuncenga ukuba ngomusa wakho usizwe ngokufitshane.

5Ngoba lindoda siyifumene iyinkathazo ivusa abaJuda bonke emhlabeni wonke, ingumholi wehlelo lamaNazaretha,

6ike yazama lokungcolisa ithempeli; kodwa sayibamba,. Ngokumbuzisisa wena uqobo lwakho, uzakukuzwa kuye konke lokhu esimmangalela ngakho.

9LabaJuda labo baqinisa ukuthi lokhu kunjalo.

10Umbusi esemqhwebile ukuba akhulume, uPawuli waphendula wathi: Ngoba ngiyazi ukuthi sekuyiminyaka eminengi ungumgwebi phezu kwalesisizwe, ngiyaziphendulela ngesibindi.

11Njengokuba ungakubona ukuthi kakudluli insuku ezilitshumi lambili ngikhuphukele eJerusalema ukukhuleka;

12kabangifumananga ngiphikisana lomuntu, loba ngivusa isiphithiphithi exukwini, lethempelini, loba emasinagogeni, loba emzini;

13futhi bangeke baqinise kuwe lokhu abangimangalela ngakho.

14Kodwa ngiyavuma kuwe lokhu ukuthi ngeNdlela abayibiza ngokuthi lihlelo ngiyamkhonza uNkulunkulu wabokhokho, ngikholwa konke okulotshiweyo emlayweni lakubaprofethi;

15ngilethemba kuNkulunkulu abalivumayo labo uqobo lwabo elokuthi kuzakuba khona ukuvuka kwabafileyo, okwabalungileyo labangalunganga.

16Ngakho lami ngiyazama ukuba ngibe lesazela esingelacala phambi kukaNkulunkulu labantu.

17Kwathi ngemva kweminyaka ethile ngafika ukuletha iziphiwo leminikelo esizweni sakithi.Seb 21:17–28

18Ngithe ngisenza lokho, bangifumana ethempelini ngihlanjululiwe, kungekho ixuku ingabe isiphithiphithi, kodwa kwakukhona abaJuda abathile abavela eAsiya,

19abafanele ukuba khona lapha phambi kwakho, bangibeke icala uba bebelolutho ngami;

20lokuba laba kabatsho ukuba bafumanani okungalunganga mhla ngangimi phambi komphakathi,

21ngaphandle kwalolulutho olulodwa engalutsho ngimi phambi kwabo ukuthi: Ngokuvuka kwabafileyo mina ngiyathonisiswa yini lamuhla.Seb 23:6

22Kodwa uFelike elokwazi okupheleleyo ngaleyoNdlela wabahlehlisa esithi: Nxa uLisiya induna enkulu isifikile, ngizakuyiquma indaba yenu.

23Walaya induna yekhulu ukuba agcinwe, kodwa abe lenkululeko, kungalelwa muntu wabangane bakhe ukumsiza.

UPawuli utshumayela kuFelike ngoKristu

24Emva kwensuku ezithile uFelike weza loDrusila umkakhe owayengumJudakazi, wabiza uPawuli, wamuzwa ekhuluma ngokukholwa okukuKristu Jesu.

25Esakhuluma ngokulunga, langokuzibamba, langokulahlwa okuzayo, uFelike watshaywa luvalo, wathi: Ake uhambe okwakhathesi; nxa ngizuza ithuba ngizakukubiza.

26Wayethemba futhi ukuthi uzakunikwa imali nguPawuli; ngakhoke wayehlezi embiza, ekhuluma laye.

27Kodwa sekudlule iminyaka emibili, uFelike walandelwa nguPorkiyu Festusi, uFelike efisa ukuthokozisa abaJuda wamtshiya uPawuli ebotshiwe.