Hez 41 - Ndebele Bible (iBhayibhili Elingcwele) 1978

1Wasengingenisa ethempelini, walinganisa insika, ububanzi bazo babuzingalo eziyisithupha inxa zonke.

2Ububanzi bomnyango babuzingalo ezilitshumi, lobubanzi bemiduli eseceleni kwesango babuzingalo ezinhlanu ngapha langapha. Waselinganisa ubude bethempeli, baba zingalo ezingamatshumi amane, lobubanzi balo baba zingalo ezingamatshumi amabili.

3Wasengena endlini engaphakathi, walinganisa insika zomnyango, zaba zingalo ezimbili, lobubanzi bomnyango baba zingalo eziyisithupha; lemiduli eseceleni kwesango yaba zingalo eziyisikhombisa.

4Walinganisa ubude bendlu esekucineni, baba zingalo ezingamatshumi amabili, lobubanzi bayo baba zingalo ezingamatshumi amabili. Wasesithi kimi: Lokhu kuyindawo engcwele kakhulu.

5Waselinganisa umduli wethempeli, ubuqatha bawo baba zingalo eziyisithupha. Ububanzi bezindlu eziseceleni baba zingalo ezine, inxa zonke zethempeli.

6Izindlu eziseceleni zazelekene zintathu, enye phezu kwenye, zingamatshumi amathathu mzila munye. Kwakulezisekelo emdulini wethempeli ezisekele izindlu eziseceleni ukuze zingaqiniswa ngumduli wethempeli.

7Izindlu eziseceleni zaqhela zaba banzi ekuphakameni kwazo kusukela kwenye indlu kusiya kwenye, zivumelana lokuqhela kwezisekelo kusukela kwenye indlu kusiya kwenye, inxa zonke zethempeli. Ngasethempelini kwakukhona ilele, ukuba umuntu asuke endlini engaphansi, adabule kwephakathi, ukuya kwephezulu.

8Ngabona futhi ukuba ithempeli lalilendawo edundubeleyo inxa zonke. Izisekelo zezindlu eziseceleni zazilingana lomhlanga owodwa olobude obuzingalo eziyisithupha.

9Ubuqatha bomduli wangaphandle wezindlu eziseceleni babuzingalo ezinhlanu; lengxenye yendawo edundubeleyo eyayisele yayizingalo ezinhlanu.

10Indawo edundubeleyo engaphandle kwezindlu eziseceleni ezizingelezele ithempeli ububanzi bayo babuzingalo ezingamatshumi amabili.

11Izivalo zezindlu eziseceleni zavulelwa endaweni edundubeleyo eseleyo, esinye isivalo sivulelwa enyakatho lesinye sivulelwa eningizimu; ububanzi bendawo eseleyo babuzingalo ezinhlanu inxa zonke.

12Indlu eyayikhangele iguma lethempeli ngasentshonalanga, ububanzi bayo babuzingalo ezingamatshumi ayisikhombisa, lobuqatha bomduli wayo babuzingalo ezinhlanu inxa zonke, lobude bawo babuzingalo ezingamatshumi aficamunwemunye.

13Waselinganisa ithempeli, ubude balo baba zingalo ezilikhulu. Igceke lendlu lilemiduli yalo kwaba zingalo ezilikhulu ubude;

14lobubanzi bethempeli ngasempumalanga kanye leguma baba zingalo ezilikhulu.

15Waselinganisa indlu ekhangele iguma engasentshonalanga kanye lemiduli yayo inxa zonke, yaba zingalo ezilikhulu ubude.

Ithempeli, lendlu engaphakathi, lendlu esekungeneni ngaphandle,

16zazilemiduli yamapulanka; izindlu lezi ezintathu zazilamawindi alemigubazi. Kusukela phansi kuze kufike emawindini langaphezu komnyango,

17endlini engaphakathi lasezindlini ezisekungeneni lakuyo yonke imiduli ngaphandle langaphakathi,

18kwakukhona izithombe ezibaziweyo, ezamakherubi lezihlahla zelala, isihlahla selala simi phakathi kwamakherubi amabili. Ikherubi lilinye lalilobuso obubili,

19obunye buyibuso bomuntu bukhangelene lesihlahla selala, lobunye buyibuso besilwane bukhangelene lesihlahla selala. Zazinjalo izithombe ezibaziweyo kilo lonke ithempeli.

20Amakherubi lezihlahla zelala kwakubaziwe kusukela phansi kwaze kwafika ngaphezu komnyango, lasemdulini wethempeli.

21Imigubazi yomnyango wethempeli yayilingana inxa zonke; laphambi kwendawo engcwele kwakukhona into,

22efana lealtare eyakhiwe ngezigodo, ukuphakama kwayo kuzingalo ezintathu, ubude bayo buzingalo ezimbili, lobubanzi bayo buzingalo ezimbili; izingonsi zayo lesidindi sayo kanye lemiduli yayo kwenziwe ngezigodo. Wathi kimi: Lokhu kuyitafula ephambi kweNkosi.

23Ithempeli lendawo engcwele kokubili kwakulezivalo ezihlanganayo.

24Izivalo zazilempiko ezimbili, ileso laleso isivalo silempiko ezimbili ezivulekayo.

25Ezivalweni zethempeli kwakubazwe amakherubi lezihlahla zelala, njengalokho okwakusemidulini. Kwakukhona uphahla lwezigodo ngaphambi kwendlu engasekungeneni.

26Kwakukhona amawindi alemigubazi lezihlahla zelala ngapha langapha kwamawindi, emidulini esemaceleni endlu esekungeneni.