Hubo 50 - Ndebele Bible (iBhayibhili Elingcwele) 1978

Ukudumisa okuqotho

1USomandla, uNkulunkulu, iNkosi, uyakhuluma,

ubiza umhlaba kusukela ekuphumeni kwelanga

kuze kube sekutshoneni kwalo.

2EZiyone elipheleleyo ngobuhle uNkulunkulu uyakhanya.

3UNkulunkulu wethu uyeza, kayikuthula,

phambi kwakhe kulomlilo oqothulayo,

emaceleni akhe kulesiphepho esikhulu.

4Uyabiza izulu ngaphezulu kanye lomhlaba,

ukuze ahlulele abantu bakhe;

5uthi: Buthelani kimi abangcwele bami,

abenza isivumelwano lami ngomhlatshelo.

6Amazulu ayatshumayela ukulunga kwakhe,

ngoba uNkulunkulu ngokwakhe ungumahluleli.

7Uthi: Zwanini bantu bami, ngizakhuluma;

Israyeli, ngizafakaza ngawe ukuthi:

NginguNkulunkulu, uNkulunkulu wakho.

8Kangikusoli ngenxa yemihlatshelo yakho;

iminikelo yakho yokutshiswa ihlala iphambi kwami.

9Kangiyikwamukela inkunzi evela emzini wakho

lentondolo evela esibayeni sakho.

10Ngoba ngezami zonke inyamazana zehlathi

lenkomo ezisentabeni eziyizinkulungwane.

11Ngiyazazi inyoni zonke zaphezulu,

konke okuhamba egangeni ngokwami.

12Uba bengilambile, bengingayikutshela wena,

ngoba umhlaba lakho konke okukuwo ngokwami.

13Ngiyayidla yini inyama yezinkunzi,

nginathe igazi lembuzi na?

14Nikela kuNkulunkulu umnikelo wokubonga,

ugcwalise izithembiso zakho koPhezukonke;

15ukhuleke kimi osukwini lokuhlupheka,

ngizakukukhulula, wena uzakungidumisa.

16Kodwa komubi uNkulunkulu uthi:

Yini ukuba utshumayele izimiso zami,

ukhulume isivumelwano sami ngomlomo wakho na?

17Ngoba uyakuzonda ukuqondiswa,

lamazwi ami uyawadelela.

18Lapho ubona isela uvumelana lalo,

uhlangana kanye lezifebe.

19Umlomo wakho uyawuvumela ebubini,

lolimi lwakho ukuba luqambe inkohliso.

20Uhlala unyeya umfowenu,

uhlebe indodana kanyoko.

21Lokhu ukwenzile, ngathula;

wacabanga ukuthi nginjengawe.

Kodwa khathesi ngiyakukhuza, ngikutshengise amacala akho.

22Kuqaphele lokhu, wena okhohlwa uNkulunkulu,

funa ngikudabule, kungabi khona okukhululayo.

23Onikela umnikelo wokubonga uyangidumisa;

oqaphela indlela yakhe ngizakumbonisa ukukhulula kwami.