1 Kho 20 - Ndebele Bible (iBhayibhili Elingcwele) 1978

UAhabi unqoba amaSiriya

1UBenihadadi inkosi yaseSiriya wabutha impi yakhe yonke, wahlangana lamakhosi angamatshumi amathathu lambili belamabhiza lezinqola zokulwa. Wasuka wayavimbezela iSamariya, walwa lalo.

2Wathumela izithunywa phakathi komuzi kuAhabi inkosi yakoIsrayeli, wathi kuye: Zwana akutshoyo uBenihadadi;

3uthi: Isiliva sakho legolide lakho kungokwami, abafazi bakho abahle labantwana bakho bangabami.

4Inkosi yakoIsrayeli yamphendula yathi: Njengokutsho kwakho, nkosi yami, ngingowakho, lakho konke engilakho kungokwakho.

5Izithunywa zafika futhi zathi kuye: UBenihadadi uthi: Ngithumele ilizwi kuwe, ngakutshela ukunikela kimi isiliva sakho legolide lakho, labafazi bakho labantwana bakho;

6ngizathumela kuwe izithunywa zami kusasa ngasona lesisikhathi, zizaguduza endlini yakho lezindlini zezinceku zakho, zithathe konke ezikuthandayo.

7Inkosi yakoIsrayeli yasibiza bonke abadala belizwe yathi: Ake liboneke ukuthi lumuntu ufuna ukusilethela inkathazo, ngoba uthume ilizwi kimi efuna abafazi bami labantwana bami, lesiliva sami legolide lami, kangalanga.

8Bonke abadala labo bonke abantu bathi kuyo: Ungalaleli, ungavumi.

9Wasesithi kuzo izithunywa zikaBenihadadi: Liyetshela inkosi yami ukuthi konke eyakucela kuqala encekwini yayo ngizakukwenza; kodwa lokhu kangilamandla okukwenza. Izithunywa zasezihamba, zabika enkosini yazo.

10UBenihadadi wasethumela ilizwi kuye esithi: Onkulunkulu bangihlanekele ngokwengezelelweyo uba ubhuqu lwaseSamariya lunganela bonke abantu bami ukulucupha ngesandla.

11Inkosi yakoIsrayeli yaphendula yathi: Limtshele lelilizwi lokuthi: Osahlomayo izikhali zakhe angaziqakisi njengosezibeka.

12UBenihadadi esizwa lelilizwi esanatha lamakhosi ezihonqweni wathi ebantwini bakhe: Hlomani! Basebehlomake bewuhlasela umuzi.

13Kwasekufika umprofethi othile kuAhabi inkosi yakoIsrayeli, wathi: INkosi uNkulunkulu ithi: Uyayibona yonke limpi na? Ngizayinikela esandleni sakho lamhla, uzukwazi ukuba mina ngiyiNkosi.

14UAhabi wathi: Kuzakwenziwa ngobani na? Yena wathi: INkosi ithi: Kuzakwenziwa ngezinceku zababusi bezabelo. Inkosi uAhabi yathi: Kuzaqalisa bani ukulwa na? Umprofethi wathi: Wena.

15UAhabi wasebutha inceku zababusi bezabelo. Zazingamakhulu amabili lamatshumi amathathu lambili; ngemva kwazo wabutha bonke abakoIsrayeli, babezinkulungwane eziyisikhombisa.

16Baphuma emini, uBenihadadi esenathe waze wadakwa ezihonqweni, yena lamakhosi angamatshumi amathathu lambili ayemsiza.

17Inceku zababusi bezabelo zaphuma kuqala. UBenihadadi wathuma inhloli, zambikela zathi: Kukhona abantu abaphumayo eSamariya.

18Wathi: Uba bephumele ukuthula, babambeni; uba bephumele ukulwa, libabambe.

19Zaphumake emzini inceku zababusi bezabelo, lempi izilandela.

20Kwaba yilowo lalowo wabulala umuntu. AmaSamariya abaleka, uIsrayeli waxotshana lawo, kodwa uBenihadadi inkosi yaseSiriya waphunyuka ekhwele ibhiza ekanye labakhweli bamabhiza.

21Inkosi yakoIsrayeli yasiphuma, yathumba amabhiza lenqola zokulwa, yabulala amaSiriya amanengi.

22Lowomprofethi wasesiza enkosini yakoIsrayeli wathi kuyo: Qinisa amabutho akho; cabanga kuhle lokho ofanele ukukwenza; ngoba ekuqaleni komnyaka ozayo inkosi yaseSiriya izakukuhlasela futhi.

23Inceku zenkosi yaseSiriya zathi kuyo: Onkulunkulu bakoIsrayeli bangonkulunkulu basezintabeni, yikho abantu besehlule; asilwe labo emagcekeni, sizakubehlula.

24Yenza lokhu; susa amakhosi ezikhundleni zawo, ubeke induna zempi kuzo,

25ubuthe impi elingana lempi ekulahlekeleyo, ibhiza ngebhiza, inqola yokulwa ngenqola yokulwa; silwe labo emagcekeni, impela sizabehlula. Yazilalela, yenza njalo.

26Ekuqaleni komnyaka uBenihadadi wabutha impi yamaSiriya, waphuma waya eAfeki ukulwa loIsrayeli.

27AbakoIsrayeli babuthana, banikwa imiphako, baphuma ukuyakulwa lawo; bamisa phambi kwamaSiriya, babenjengemihlanjana yembuzi emibili, kodwa amaSiriya agcwala ilizwe lonke.

28Lowomuntu kaNkulunkulu wasesondela enkosini yakoIsrayeli esithi: INkosi uNkulunkulu ithi: Ngoba amaSiriya athe iNkosi ingunkulunkulu wasezintabeni, kayisuye unkulunkulu wasezihotsheni, ngizanikela esandleni sakho yonke limpi enkulu, lizakwazi ukuba mina ngiyiNkosi.

29Bamisa bekhangelana insuku eziyisikhombisa. Ngosuku lwesikhombisa ukulwa kwaqalisa; abakoIsrayeli babulala ngosuku lunye amaSiriya azinkulungwane ezilikhulu ahamba ngenyawo.

30Abaseleyo babaleka bangena emzini waseAfeki; umduli wawela phezu kwabantu abazinkulungwane ezingamatshumi amabili lesikhombisa ababesele. UBenihadadi laye wabaleka, wacatshacatsha ezindlini ezingaphakathi komuzi.

31Inceku zakhe zathi kuye: Sizwile kuthiwa amakhosi akoIsrayeli angamakhosi alesihawu; asivunule izambatho zokulila, sithandele amagoda emakhanda ethu, siye enkosini yakoIsrayeli; mhlawumbe izakukuyekela uphile.

32Basebevunula izambatho zokulila, bathandela amagoda emakhanda abo, baya enkosini yakoIsrayeli, bathi: Inceku yakho uBenihadadi icela ukuba uyiyekele iphile. Yona yathi: Usekhona na? Ungumfowethu.

33Inceku zakuthatha lokhu njengesibonakaliso esihle, zawamukela masinyane lamazwi zathi: Yebo, uBenihadadi ungumfowenu. Yona yathi: Hambani liyemthatha. UBenihadadi wasesiza kuyo, yamkhweza enqoleni yayo yokulwa.

34UBenihadadi wathi kuyo: Imizi ubaba ayithumba kuyihlo ngizayibuyisela; futhi ungazakhela indawo yokuthengisela eDamaseko njengokwenza kukababa eSamariya. UAhabi wathi: Ngizakukuyekela uhambe ngalesisivumelwano. Wasesenza laye isivumelwano emyekela ehamba.

35Umuntu othile owexuku labaprofethi wathi kumngane wakhe ngelizwi leNkosi uNkulunkulu: Ake ungitshaye. Kodwa lowomuntu wala ukumtshaya.

36Yena wasesithi kuye: Ngoba ungalilalelanga ilizwi leNkosi uNkulunkulu uzakuthi usand ’ukusuka kimi ubulawe yisilwane. Wathi esand’ ukusuka kuye wahlangana lesilwane, sambulala.

37Lowomprofethi wafumana omunye, wathi kuye: Ake ungitshaye. Wamtshaya wamlimaza.

38Wasesuka ehamba lowomprofethi, walindela inkosi yakoIsrayeli ngasendleleni, ezifihle ngelembu emehlweni.

39Kwathi inkosi idlula, wamemeza enkosini wathi: Inceku yakho yangena phakathi kokulwa; kwaphuma omunye phakathi kwabalwayo, waletha umuntu kimi wathi: Londoloza lumuntu; uba ekulahlekela, uzalahlekelwa yikusila kwakho, kumbe uhlawule ngethalenta lesiliva.

40Kwathi inceku yakho isaphathekile, lowomuntu wabaleka. Inkosi yakoIsrayeli yathi kuye: Sizakuba njalo isigwebo sakho, ususiqumile wena.

41Waselisusa masinyane ilembu emehlweni akhe. Inkosi yakoIsrayeli yasimazi ukuba ungomunye wabaprofethi.

42Yena wathi kuyo: INkosi uNkulunkulu ithi: Ngoba umyekele umuntu ebengimmisele ukubhujiswa, uzakufa wena endaweni yakhe, labantu bakho bazakufa endaweni yabakhe.

43Inkosi yakoIsrayeli yaya endlini yayo ithukuthele, inyukumele, yafika eSamariya.