Hlu 4 - Ndebele Bible (iBhayibhili Elingcwele) 1978

UDebora loBaraki banqoba uSisera

1AbakoIsrayeli babuya benza okubi phambi kweNkosi esefile uEhudi.

2INkosi yabanikela esandleni sikaJabini inkosi yaseKanani owayebusa eHazori. Induna yempi yakhe yayinguSisera, owayehlala eHaroshethi elabezizwe.

3AbakoIsrayeli bakhala eNkosini ukuba ibasize, ngoba uSisera wayelezinqola zokulwa zensimbi ezingamakhulu aficamunwemunye, wabacindezela kakhulu abakoIsrayeli iminyaka engamatshumi amabili.

4UDebora umprofethikazi umkaLapidothi wayengumahluleli koIsrayeli ngalesosikhathi.

5Wayehlala ngaphansi kwesihlahla selala sikaDebora phakathi kweRama leBetheli ezintabeni zakoEfrayimi. AbakoIsrayeli babesiza kuye ukwahlulelwa.

6Wathumela ilizwi ukubiza uBaraki indodana kaAbinowama eKedeshi koNafitali, wathi kuye: INkosi, uNkulunkulu wakoIsrayeli, iyakulaya ithi: Hamba uyebuthanisa abantu entabeni yaseTabori, uthathe izinkulungwane ezilitshumi esizweni sakoNafitali lesakoZebuluni;

7ngizamenza uSisera induna yempi kaJabini ukuba akuhlangabeze emfuleni iKishoni lezinqola zakhe zokulwa lamabutho akhe, ngimnikele esandleni sakho.

8UBaraki wathi kuye: Uba uhamba lami, ngizahamba; kodwa uba ungahambi lami, kangiyikuhamba.

9Yena wathi: Impela ngizahamba lawe, kodwa ukwenza kwakho kakuyikukulethela udumo, ngoba iNkosi izanikela uSisera esandleni sowesifazana. Wasesuka uDebora, wahamba loBaraki eKedeshi.

10UBaraki wabiza abakoZebuluni labakoNafitali ukuba beze eKedeshi; abantu abazinkulungwane ezilitshumi bamlandela, loDebora wahamba laye.

11UHeberi umKeni wayehlukana lamaKeni, abantwana bakaHobabi uyisezala kaMose, wamisa ithente lakhe ngasesihlahleni esikhulu eZananimi eliseduze leKedeshi.

12USisera esebikelwe ukuthi uBaraki indodana kaAbinowama useye entabeni yaseTabori,

13wabiza zonke inqola zakhe zokulwa ezingamakhulu aficamunwemunye ezensimbi, labo bonke abantu ababelaye, kusukela eHaroshethi labezizwe kuze kufike emfuleni iKishoni.

14UDebora wathi kuBaraki: Vuka! ngoba yilo lolusuku iNkosi enikele ngalo kuwe uSisera. Yebo, isihambile phambi kwakho. Ngakho uBaraki wasesehla entabeni iTabori elandelwa ngabantu abazinkulungwane eziIitshumi.

15Ekuhlaseleni kukaBaraki labantu bakhe iNkosi yamchitha uSisera lazo zonke inqola zakhe zokulwa layo yonke impi yakhe. USisera wehla enqoleni yakhe yokulwa, wabaleka ngenyawo.

16UBaraki waxotshana lazo inqola zokulwa kanye lempi, waze wafika eHaroshethi labezizwe, yonke impi kaSisera yabulawa, kakusalanga muntu.

17Kodwa uSisera wabaleka ngenyawo, wafika ethenteni likaJayeli umkaHeberi umKeni, ngoba kwakukhona ukuzwana phakathi kukaJabini waseHazori lendlu kaHeberi umKeni.

18UJayeli waphuma ukuhlangabeza uSisera, wathi kuye: Phambuka, nkosi yami, phambukela kimi, ungesabi. Ngakho wasephambukela kuye, wamembesa ngengubo.

19Yena wathi kuye: Akunginathise amanzi ngoba ngomile. Wasesibukula igula lochago, wamnathisa lona, wabuya wamembesa.

20Yena wathi kuye: Mana emnyango wethente, uba kufika umuntu ekubuza esithi: Kukhona olapha na? uthi: Atshi.

21Kodwa uJayeli umkaHeberi wathatha isikhonkwane sethente, waphatha isando esandleni, wamnyenyela, wabethela isikhonkwane esikhaleni sobuso saze sathutshela phansi, eselele ubuthongo ngenxa yokudinwa. Wafa ngokunjalo.

22UBaraki weza edinga uSisera, uJayeli wamhlangabeza wathi kuye: Woza, ngizakukutshengisa umuntu omdingayo. Wasengena ethenteni lakhe, wambona uSisera elele esefile, isikhonkwane sethente sigxumekile esikhaleni sobuso bakhe.

23Ngalolosuku uNkulunkulu wabanika abakoIsrayeli ukunqoba uJanini inkosi yaseKanani.

24AbakoIsrayeli baqhubeka ukumhlasela uJabini inkosi yaseKanani baze bamqeda nya.