Hos 9 - Ndebele Bible (iBhayibhili Elingcwele) 1978

UIsrayeli uzatshaywa ngenxa yokungathembeki kwakhe

1Ungajabuli, wena Israyeli, ungathokozi njengabezizwe,

ngoba uwulile ngokutshiya uNkulunkulu wakho;

uthandile umvuzo wewule ezizeni zonke.

2Isiza lesikhamelo sewayini kakuyikubanika abantu ukudla,

lewayini elitsha lizabaphelela.

3Kabayikuhlala elizweni leNkosi,

kodwa abakoEfrayimi bazabuyela eGibithe,

badle ukudla okungcolileyo eAsiriya.

4Kabayikuthululela iminikelo yewayini eNkosini,

kabayikuyithokozisa ngemihlatshelo yabo.

Ukudla kwabo kuzakuba njengokudla kwabalilayo,

bonke abakudlayo bazakungcola;

ngoba ukudla kwabo kuzakuba ngokwabo kuphela,

kakuyikunikelwa ethempelini leNkosi.

5Bazakwenza njani ngosuku lomkhosi omisiweyo,

langosuku lwedili leNkosi na?

6Ngoba bazabaleka endaweni yokuchitheka,

iGibithe lizakubamukela, iMemfisi libe lingcwaba labo,

izinto zabo eziligugu zesiliva zigcwale imbabazane,

lameva agcwale emathenteni abo.

7Insuku zokutshaywa sezifikile,

lensuku zokuphindisela sezifikile.

UIsrayeli uzakukwazi lokhu.

Umprofethi uzakuba njengesithutha,

lomuntu olomoya abe njengohlanyayo

ngenxa yobubi benu obukhulu lenzondo yenu enkulu.

8Ngolaka olukhulu uEfrayimi ucathamele abantu bakaNkulunkulu,

umprofethi uyisifu endleleni zabo zonke,

lomjibila endlini kaNkulunkulu.

9Bazonakalisile kakhulu njengasensukwini zeGibeya.

UNkulunkulu uzakhumbula ububi babo, abatshaye ngenxa yezono zabo.

10INkosi ithi: Ngamfumana uIsrayeli njengezithelo zevini egangeni,

ngababona okhokho babo njengezithelo zokuqala zomkhiwa.

Kodwa bafika eBali‐Peyori, bazinikela kuBali,

baba yisinengiso njengento abayithandileyo.

11Udumo lukaEfrayimi luzaphapha luhambe njengenyoni,

kungabikho ukuzala, lokuthatha isisu, lokukhulelwa.

12Loba bekhulisa abantwana, ngizakubamuka bona, kungasali loyedwa.

Maye kibo lapho ngisuka kibo!

13Njengokubona kwami abantwana bakaEfrayimi bazakuba yimpango;

uEfrayimi kakhuphele abantwana bakhe ukubulawa.

14Banike, Nkosi! Uzabanikani na?

Banike isisu esiphumayo lamabele angelalutho.

15INkosi ithi: Bonke ububi babo baqala eGiligali,

ngalokho ngabazonda khona.

Ngenxa yobubi bezenzo zabo ngizabaxotsha endlini yami.

Kangisayikubathanda;

bonke ababusi babo bayahlamuka.

16AbakoEfrayimi batshayiwe;

impande yabo yomile, kabayikuthela izithelo.

Loba bezala, ngizabulala abantwana babo abathandekayo.

17UNkulunkulu wami uzabalahla, ngoba kabamlalelanga;

bazakuba ngabazulayo phakathi kwezizwe.