Levi 14 - Ndebele Bible (iBhayibhili Elingcwele) 1978

1INkosi yathi kuMose:

2Lo uzakuba ngumlayo ngomuntu olobulephero ngosuku lokuhlanjululwa kwakhe. Kalethwe kumpristi,Mat 8:4; Mark 1:44; Luka 5:14; 17:14

3umpristi aphume ezihonqweni, amhlole. Uba umuntu olobulephero esesilile esifweni sobulephero,

4umpristi alaye ukuba lowo ozahlanjululwa athathelwe inyoni ezimbili ezihlambulukileyo, lomkusu, lelembu elibomvu, lehisope;

5umpristi alaye ukuba enye yezinyoni ihlatshelwe embizeni yebumba phezu kwamanzi agobhozayo.

6Uzathatha inyoni ephilayo kanye lomkusu, lelembu elibomvu, lehisope, akucwilise egazini lenyoni ehlatshelwe phezu kwamanzi agobhozayo,

7amfafaze ngalo kasikhombisa lowo ozakuhlanjululwa esifweni sobulephero, atsho ukuthi usehlambulukile, ayekele inyoni ephilileyo ukuba izihambele egangeni.

8Lowo ozakuhlanjululwa uzagezisa ingubo zakhe, aphuce zonke inwele zakhe, ageze ngamanzi, ahlambuluke; emva kwalokho uzabuyela ezihonqweni, kodwa ahlale ngaphandle kwethente lakhe insuku eziyisikhombisa.

9Ngosuku lwesikhombisa uzakuphuca zonke inwele zakhe, lendevu zakhe, lezintshiya zakhe, yebo, aphuce zonke inwele zakhe, agezise ingubo zakhe, ageze umzimba wakhe ngamanzi, ahlambuluke.

10Ngosuku lwesificaminwembili uzathatha amawundlu amaduna amabili angelasici, lewundlu elisikazi elilomnyaka munye elingelasici, lomnikelo wempuphu elingana lengxenye yehefa empuphu ecolekileyo ixubene lamafutha, lamagcobo.

11Umpristi ohlambulula lowomuntu ozakuhlanjululwa uzambeka kanye lalezizinto phambi kweNkosi, ngasemnyango wethente lokuhlangana.

12Umpristi athathe elinye lamawundlu, anikele ngalo libe ngumnikelo wecala, kanye lamagcobo, akuzunguze kube ngumnikelo wokuzunguzwa phambi kweNkosi;

13ahlabe iwundlu endaweni engcwele lapho kuhlatshelwa khona umnikelo wesono lomnikelo wokutshiswa; ngoba umnikelo wecala ungowompristi, njengomnikelo wesono, ungcwele kakhulu.

14Umpristi kathathe igazi lomnikelo wecala, alininde oqwangeni lwendlebe yokunene yalowo ozakuhlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene;

15athathe amagcobo, athele amanye esandleni sakhe sokhohlo,

16acwilise umunwe wakhe wokunene kuwo, afafaze ngawo kasikhombisa phambi kweNkosi ngomunwe wakhe.

17Athathe kuwo amagcobo aseleyo asesandleni sakhe, awaninde oqwangeni lwendlebe yalowo ozakuhlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene, phezu kwegazi lomnikelo wecala;

18lamagcobo aseleyo asesandleni sakhe kawabeke ekhanda lalowo ozakuhlanjululwa. Ngalokho umpristi uzakumenzela indlela yokubuyisana phambi kweNkosi.

19Umpristi kanikele ngomnikelo wesono ukuba amenzele indlela yokubuyisana lowo ozakuhlanjululwa ekungcoleni kwakhe, andubana ahlabe umnikelo wokutshiswa,

20anikele umnikelo wokutshiswa lomnikelo wempuphu ealtareni. Ngalokho umpristi uzamenzela indlela yokubuyisana, ahlambuluke.

21Kodwake uba engumyanga, esahluleka ukuletha lokho, kathathe iwundlu eliduna libe ngumnikelo wecala ozazunguzwa ukuba amenzelwe indlela yokubuyisana, kanye lengxenye yehefa lempuphu ecolekileyo ixubene lamafutha kube ngumnikelo wempuphu, lamagcobo,

22lamajuba amabili loba inkwilimba ezimbili, loba yilokho alakho, okunye kube ngumnikelo wesono lokunye kube ngumnikelo wokutshiswa.

23Ngosuku lwesificaminwembili kakulethe kumpristi, emnyango wethente lokuhlangana, phambi kweNkosi, ukuba ahlanjululwe.

24Umpristi kathathe iwundlu elomnikelo wecala, lamagcobo, akuzunguze kube ngumnikelo wokuzunguzwa phambi kweNkosi.

25Ahlabe iwundlu elomnikelo wecala, athathe igazi lomnikelo wecala, alininde oqwangeni lwendlebe yokunene yalowo ozahlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene;

26athele amagcobo esandleni sakhe sokhohlo,

27afafaze ngawo kasikhombisa phambi kweNkosi ngomunwe wakhe wokunene,

28athatha kuwo amagcobo asesandleni sakhe, awaninde oqwangeni lwendlebe yokunene yalowo ozahlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene, ezindaweni lapho kunindwe khona igazi lomnikelo wecala.

29Amagcobo aseleyo asesandleni sakhe umpristi awabeke ekhanda lalowo ozahlanjululwa, amenzele indlela yokubuyisana phambi kweNkosi.

30Uzakunikela ngamajuba amabili loba ngenkwilimba ezimbili, loba yilokho alakho,

31okunye kube ngumnikelo wesono lokunye kube ngumnikelo wokutshiswa, kanye lomnikelo wempuphu. Umpristi uzamenzela ohlanjululwayo indlela yokubuyisana phambi kweNkosi.

32Lowo ngumlayo ngaye olesifo sobulephero, owehluleka ukuletha iminikelo ukuba ahlambuluke.

33INkosi yathi kuMose loAroni:

34Lapho selifikile elizweni laseKanani engilinika lona libe ngelenu, uba ngisehlisela umuzi into ebolisayo elizweni lenu,

35umninimuzi keze ambikele umpristi, athi: Ngibona kungathi kukhona into ebolisayo emzini wami.

36Umpristi uzakulaya ukuba yonke impahla ikhutshwe endlini, engakangeni ukuhlola leyonto, ukuze konke okusendlini kungangcoli. Emva kwalokho umpristi uzangena ukukhangela indlu,

37ayihlole; uba ebona ukuthi imiduli yendlu ilamabala aluhlaza loba abomvu, futhi abonakala ukuthi atshonile kakhulu,

38uzakuphuma endlini eme emnyango, ayivale insuku eziyisikhombisa.

39Uzabuya ngosuku lwesikhombisa, ayikhangele; uba amabala eseqelile emidulini yendlu,

40kalaye ukuba izitina ezilamabala zikhutshwe, zilahlwe endaweni engcolileyo ngaphandle komuzi,

41lendlu iphalwe phakathi inxa zonke, lodaka oluphaliweyo lulahlelwe endaweni engcolileyo ngaphandle komuzi.

42Ezinye izitina kazithathwe, zifakwe endaweni yalezo, lendlu ibhadwe ngodaka olutsha.

43Uba leyonto ebolisayo ibonakala futhi endlini, nxa izitina sezikhutshiwe, lendlu isiphaliwe, ibhadiwe,

44umpristi uzakuhamba ayeyihlola. Uba leyonto isiqhelile endlini, kuyinto ebolisa kubi; indlu ingcolile.

45Kayidilizwe, izitina zayo, lezigodo zayo, lalo lonke udaka lwayo, konke kukhutshelwe endaweni engcolileyo ngaphandle komuzi.

46Futhike ongena kuleyondlu isavaliwe uzakuba ngongcolileyo kuze kuhlwe;

47lowo olala kuleyondlu kagezise ingubo zakhe; lalowo odlela khona agezise ingubo zakhe.

48Kodwa nxa umpristi esengenile, abone ukuthi leyonto ebolisayo kayiqhelanga endlini emva kokubhadwa kwendlu, uzakutsho ukuthi indlu ihlambulukile, ngoba leyonto isiphelile.

49Ukuba indlu ihlambuluke, uzakuthatha inyoni ezimbili ezincinyane, lomkusu, lelembu elibomvu, lehisope,

50abulalela enye yezinyoni embizeni yebumba elamanzi amahle,

51athathe umkusu lehisope lelembu elibomvu, kanye lenyoni ephilayo, akucwilise egazini lenyoni ebuleweyo lasemanzini amahle, afafaze indlu kasikhombisa.

52Ngokwenza njalo uzakuhlambulula indlu ngegazi lenyoni, langamanzi amahle, langenyoni ephilayo, langomkusu, langehisope langelembu elibomvu,

53ayiyekele inyoni ephilayo ukuba iphume emzini, iye egangeni. Ngakhoke uzakuyenzela indlu indlela yokubuyisana, ihlambuluke.

54Lo ngumlayo omayelana lezinhlobo zonke zobulephero, langoqweqwe olulumayo,

55langokubola okuthile okusengutsheni lokusendlini,

56ngethumba, langenxeba elibhibhidlayo, langesibhadlu,

57ukuba kwaziwe ukuthi kungcolile ingabe kuhlambulukile. Lowo ngumlayo omayelana lobulephero lokubola okunje.