1USolomoni wasebuthanisa eJerusalema abadala bakoIsrayeli lazo zonke izinduna zezizwe eziyizikhulu zezindlu zabakoIsrayeli, ukuba bakhuphe umtshokotsho wesivumelwano seNkosi emzini kaDavida othiwa yiZiyone.
10Basebephumake abapristi endaweni engcwele lokhu iyezi laseligcwele ethempelini;Eks 40:34–35
11ngakho babengaselakukhonza ngenxa yalo, ngoba inkazimulo yeNkosi yagcwala endlini yayo.
12USolomoni wasesithi:
Nkosi, wena omise ilanga phezulu,
kodwa okhethe ukuhlala emnyameni omkhulu,
13ngikwakhele indlu ephakemeyo,
indawo ongahlala kiyo kuze kube nini lanini.
14Inkosi uSolomoni yasiphenduka, yalibusisa lonke ibandla lakoIsrayeli elalimi.
15Yathi: Kayibongwe iNkosi, uNkulunkulu kaIsrayeli, egcwalise ngesandla sayo lokho eyakuthembisa kubaba uDavida isithi:
16Kusukela ekubakhupheni kwami abakoIsrayeli eGibithe kangikhethanga muzi ezizweni zonke zakoIsrayeli ukwakhela khona indlu yami, ukuba ibizo lami lidunyiselwe khona, kodwa ngakhetha uDavida ukuphatha abantu bami uIsrayeli.2 Sam 7:4–11; 1 Lan 17:3–10
17Kwakuyisifiso sikababa uDavida ukwakhela iNkosi, uNkulunkulu kaIsrayeli, indlu.2 Sam 7:1–3; 1 Lan 17:1–2
18Kodwa iNkosi yathi kubaba uDavida: Njengoba bekuyisifiso sakho ukungakhela indlu, wenze kuhle ngokufisa lokho;
19kodwake kawuyikuyakha indlu wena, indodana ozayizala yiyo ezakungakhela indlu.2 Sam 7:12–13; 1 Lan 17:11–12
20INkosi isigcwalisile isithembiso eyasenzayo, ngoba mina ngingenile esikhundleni sikababa uDavida, ngiyabusa uIsrayeli, sengiyakhele iNkosi, uNkulunkulu kaIsrayeli, indlu.
21Ngawulungisela khona indawo umtshokotsho wesivumelwano seNkosi eyasenza labokhokho bethu ekubakhupheni kwayo eGibithe.
Umkhuleko kaSolomoni22USolomoni wasesima phambi kwealtare leNkosi phambi kwalo lonke ibandla lakoIsrayeli, waphakamisela izandla zakhe phezulu
23wathi: Nkosi, Nkulunkulu kaIsrayeli, kakho uNkulunkulu ofana lawe ezulwini phezulu lasemhlabeni phansi ogcina isivumelwano utshengisa uthando olungapheliyo ezincekwini zakho ezihamba phambi kwakho ngobuqotho.
24Usigcinile isithembiso owasenza kubaba uDavida; lokho owakuthembisayo lamhla ukugcwalisile ngokupheleleyo.
25Ngakhoke, Nkosi, Nkulunkulu kaIsrayeli, gcina isithembiso owasenza lenceku yakho uDavida ubaba usithi: Kawuyikuswela muntu ozabusa abakoIsrayeli uba amadodana akho enanzelela ukuhamba kwawo phambi kwami njengawe.1 Kho 2:4
26Nkulunkulu kaIsrayeli, kaligcwaliseke ilizwi lakho owalikhuluma kuDavida ubaba, inceku yakho.
27Kambe uNkulunkulu uzahlala yini emhlabeni? Khangela, iphezulu, lezulu eliphezulu kakhulu kakukulingananga; pho, lindlu engiyakhileyo ingayini kuwe na?2 Lan 2:6
28Kodwake akuzwe umkhuleko wenceku yakho kanye lokucela kwayo, Nkosi Nkulunkulu wami, ulalele ukukhala lokukhuleka kwenceku yakho ekwenzayo phambi kwakho lamuhla.
29Ebusuku lemini amehlo akho kawakhangele lindlu, indawo owatsho ngayo ukuthi: Ibizo lami lizakudunyiswa lapho; ukuze uwuzwe umkhuleko wenceku yakho ikhangele kulindawo.Dute 12:11
30Akulalele ukucela kwenceku yakho lokwabantu bakho uIsrayeli lapho bekhuleka bekhangele kulindawo; yebo, uzwe wena, usezulwini endaweni yakho yokuhlala; lapho usizwa, uthethelele.
31Uba umuntu esona umakhelwana wakhe, afungiswe, enze isifungo sakhe phambi kwealtare lakho kulindlu,
32akuzwe wena usezulwini, wahlulele inceku zakho, uyilahle elecala, wehlisele izenzo zayo phezu kwayo, uyekele elungileyo, uyinike umvuzo ofanele ukulunga kwayo.
33Lapho abantu bakho bakoIsrayeli besahlulwa yizitha zabo ngoba bonile kuwe, uba bephenduka, balivume ibizo lakho, bakhuleke kuwe bekuncenga kulindlu,
34akuzwe wena usezulwini, uthethelele isono sabantu bakho uIsrayeli, ubabuyise futhi elizweni owalinika okhokho babo.
35Lapho iphezulu livaliwe, kungelazulu ngoba bonile kuwe, uba bekhuleka bekhangele kulindawo belivuma ibizo lakho, baphenduke esonweni sabo nxa ubatshaya,
36akuzwe wena usezulwini, uthethelele izono zenceku yakho lezabantu bakho uIsrayeli, ubafundise indlela elungileyo abangahamba ngayo, unise izulu elizweni lakho owabanika lona libe ngelabo.
37Uba kukhona indlala elizweni lomkhuhlane lokutshisa lengumane lesikhongwane lemihogoyi, uba izitha zabo zivimbezele imizi yabo, loba behlutshwa yikuphi ukufa lomkhuhlane,
38nxa bonke abantu bakho uIsrayeli, loba oyedwa wabo ekhuleka, ecela, evuswa yinhlupheko losizi, ephakamisela izandla zakhe kulindlu,
39akuzwe wena usezulwini, endaweni yakho yokuhlala, umthethelele, umnike okufanele izenzo zakhe, wena owaziyo inhliziyo yakhe — ngoba nguwe wedwa owaziyo inhliziyo zabantu —
40ukuba bakwesabe insuku zonke zokuphila kwabo elizweni owalinika okhokho bethu.
41Futhi owezizweni ongesuye wasebantwini bakho uIsrayeli evela elizweni elikhatshana ngenxa yebizo lakho
42— ngoba bazakuzwa ngebizo lakho elikhulu langesandla sakho esilamandla langengalo yakho elamandla — eze ukukhuleka akhangele kulindlu,
43akuzwe wena usezulwini, endaweni yakho yokuhlala, umenzele konke akucelayo, ukuze abantu bonke emhlabeni bazi ibizo lakho, bakwesabe, njengabantu bakho bakoIsrayeli, ukuba bazi ukuthi lindlu engiyakhileyo iyindawo lapho ibizo lakho lidunyiselwa khona.
44Uba abantu bakho bephuma impi ukulwa lezitha zabo loba kungaphi lapho obesa khona, bekhuleke eNkosini bekhangele ngakulo umuzi owukhethileyo langasendlini engikwakhele yona.
45akuzwe wena usezulwini ukukhuleka lokuncenga kwabo, ubamele.
46Uba besona kuwe, ngoba kakulamuntu ongoniyo, ubusubathukuthelela, ubanikele esitheni, ukuze bathunjelwe elizweni lezitha zabo, khatshana ingabe eduze,
47baphenduke elizweni abathunjelwe kilo, bakhuleke kuwe elizweni lelo bathi: Sonile, senza okungalunganga lokubi;
48baphenduke ngengqondo zabo zonke langenhliziyo zabo zonke elizweni lezitha zabo ezibathumbileyo, bakhuleke bekhangele ngaselizweni labo owalinika okhokho babo, lasemzini owawukhethayo, lasendlini engikwakhele yona,
49akuzwe wena umkhuleko wabo lokucela kwabo usezulwini, endaweni yakho yokuhlala, ubamele.
50Thethelela abantu bakho izono zabo leziphambeko zabo zonke kuwe, wenze izitha zabo ezibathumbileyo zibe lesihawu kibo,
51ngoba bayisizwe sakho, abantu bakho owabakhupha eGibithe, esithandweni sokuncibilikisa insimbi.
52Unanzelele ukucela kwenceku yakho lokucela kwabantu bakho uIsrayeli, ubalalele ekukhulekeni kwabo.
53Ngoba wabehlukanisa kuzo zonke izizwe zomhlaba baba ngabakho, njengokutsho kwakho ngoMose, inceku yakho, ekukhupheni kwakho okhokho bethu elizweni laseGibithe, wena Nkosi Nkulunkulu.
USolomoni uyazikhulekela yena labakoIsrayeli54Kwathi eseqedile uSolomoni konke ukukhuleka lokucela kwakhe eNkosini, wasukuma ngaphambi kwealtare leNkosi lapho ayeguqe khona ephakamisele izandla zakhe phezulu.
55Wema wabusisa lonke ibandla lakoIsrayeli ngelizwi elikhulu esithi:
56Kayibongwe iNkosi enike abantu bayo uIsrayeli ukuphumula njengokuthembisa kwayo konke; kakuphuthanga lelilodwa ilizwi laso sonke isithembiso sayo esihle eyasikhuluma ngenceku yayo uMose.Dute 12:10; Josh 21:44–45
57INkosi uNkulunkulu wethu ibe lathi njengalokhu yayilabokhokho bethu, ingasitshiyi ingasilahli,
58ukuze idonsele inhliziyo zethu kuyo, ukuba sihambe ngazo zonke indlela zayo, sigcine imilayo yayo lezimiso zayo lemithetho yayo eyayinika okhokho bethu.
59Kakuthi amazwi okukhuleka kwami phambi kweNkosi uNkulunkulu wethu abe seduze layo emini lebusuku, imele inceku yayo labantu bayo uIsrayeli, njengokudingekayo insuku ngensuku,
60ukuze izizwe zonke zomhlaba zazi ukuba iNkosi inguNkulunkulu, lokuba kakho omunye.
61Inhliziyo zenu kazibe seNkosini uNkulunkulu wethu ngokupheleleyo, lihambe ngezimiso zayo, ligcine imilayo yayo njengalamhlanje.
USolomoni unikela iminikelo eminengi62USolomoni laye wonke uIsrayeli banikela imihlatshelo phambi kweNkosi.2 Lan 7:4–10
63USolomoni wanikela kube yiminikelo yokuthula eNkosini inkabi ezizinkulungwane ezingamatshumi amabili lambili, lezimvu ezizinkulungwane ezilikhulu lamatshumi amabili. Inkosi labo bonke abakoIsrayeli bayahlukanisela iNkosi uNkulunkulu indlu.
64Ngalona lolosuku uSolomoni wayahlukanisela iNkosi indawo ephakathi kweguma elalingaphambi kwethempeli, ngoba lapho wanikela iminikelo yokutshiswa leminikelo yempuphu, lamahwahwa eminikelo yokuthula, ngoba ialtare lethusi elaliphambi kweNkosi lalilincinyane kakhulu ukutshisela kulo umnikelo wokutshiswa lomnikelo wempuphu lamahwahwa eminikelo yokuthula.
65Ngalesosikhathi uSolomoni labo bonke abakoIsrayeli ababelixuku elikhulu, ababevela ekuyeni ngaseHamathi kusiya esifuleni saseGibithe benza umkhosi phambi kweNkosi uNkulunkulu insuku eziyisikhombisa.
66Ngosuku lwesificaminwembili uSolomoni wabadabulela abantu; bambonga, baya emizini yabo bethokoza bejabula enhliziyweni ngakho konke okuhle iNkosi uNkulunkulu eyayikwenzele uDavida inceku yayo loIsrayeli abantu bayo.
Who We AreWhat We EelieveWhat We Do
2025 by iamachristian.org,Inc All rights reserved.
