uRuthe 1 - Ndebele Bible (iBhayibhili Elingcwele) 1978

URuthe loNawomi

1Kwathi ensukwini zabahluleli kwaba khona indlala elizweni. Umuntu othile waseBetlehema koJuda wasuka wayahlala elizweni laseMowabi, yena lomkakhe lamakhe amabili.

2Ibizo lakhe lalinguElimeleki, elomkakhe linguNawomi, amabizo amadodana akhe amabili ayengoMaheloni loKiliyoni; babengabaseEfratha eBetlehema koJuda. Baya elizweni laseMowabi, bahlala khona.

3UElimeleki umkaNawomi wafa, kwasala yena lamadodana akhe womabili.

4Amadodana akhe athatha abafazi bamaMowabi, ibizo lomunye lalinguOrpa, elomunye linguRuthe. Bahlala khona kwaphosa kwaba yiminyaka elitshumi.

5Bobabili oMaheloni loKiliyoni bafa, walahlekelwa uNawomi ngamadodana akhe womabili layindoda yakhe.

6Wasesuka eMowabi labomalokazana bakhe, ngoba wayesezwile eselizweni laseMowabi ukuthi iNkosi ibakhumbule abantu bayo, yabanika ukudla.

7Ngakhoke wasesuka lapho ayekhona labomalokazana bakhe bobabili, bahamba laye ukuba abuyele elizweni lakoJuda.

8UNawomi wasesithi kubomalokazana bakhe bobabili: Buyelani lonke ezindlini zabonyoko; iNkosi iliphathe kuhle njengoba labaphatha kuhle abafileyo kanye lami;

9iNkosi ilinike ukuba libuye lende futhi, lihlale kuhle labomkenu abatsha. Wasebanga, bona basebedazuluka bekhala.

10Bathi kuye: Atshi, sizahamba lawe kwabakini.

11Kodwa uNawomi wathi: Buyelani, bantwana bami, lizahambelani lami na? Kambe ngiselawo yini amanye amadodana esiswini sami ukuba abe ngabomkenu na?

12Buyelani, bantwana bami; hambani, ngoba mina sengikhulile kakhulu ukuba ngibuye ngibe lendoda. Loba ngingathi ngilethemba lokuzuza umntwana, uba ngingenda ngabona lobubusuku ngizale amadodana,

13belingawalindela yini aze akhule na? Belingahlala lingendi na? Atshi, bantwana bami, ngoba kubuhlungu kakhulu kimi ngenxa yenu ukuba isandla seNkosi silwe lami.

14Basebedazuluka bekhala futhi. UOrpa wamanga uninazala, wabuyela kwabakibo; kodwa uRuthe wabambelela kuye.

15UNawomi wathi: Khangela, umnakwenu usebuyele kwabakibo lakubonkulunkulu bakhe; mlandele usowenu.

16Kodwa uRuthe wathi: Ungangincengi ukuba ngikutshiye lokuba ngiyekele ukukulandela; ngoba lapho uya khona, ngizakuya khona lami, lalapho uhlala khona, lami ngizahlala khona. Abantu bakini bazakuba ngabakithi, loNkulunkulu wakho abe nguNkulunkulu wami;

17lapho uzafela khona, lami ngizafela khona, ngingcwatshelwe lapho. INkosi ingihlanekele ngokwengezelelweyo uba ngingehlukaniswa lawe yilutho ngaphandle kokufa.

18Kwathi uNawomi esebonile ukuthi uRuthe uzimisele ukuhamba laye wasemyekela.

19Basebehamba bobabili baze bafika eBetlehema. Sebefikile khona kwayaluzela umuzi wonke ngenxa yabo. Abesifazana bathi: Lo unguye uNawomi na?

20Yena wathi kibo: Lingangibizi ngokuthi nginguNawomi, kodwa lingibize ngokuthi nginguMara; ngoba uSomandla ungiphethe ngobuhlungu obukhulu.

21Ngasuka lapha ngigcwele, iNkosi ingibuyise sengize. Lingibizelani ngokuthi nginguNawomi njengoba iNkosi isingihlanekele, loSomandla esengehlisele okubi na?

22Wabuya ngokunjalo uNawomi kanye loRuthe waseMowabi umalokazana wakhe, bevela elizweni laseMowabi. Bafika eBetlehema ekuqaliseni kokuvunwa kwamabele.