uZefaniya 3 - Ndebele Bible (iBhayibhili Elingcwele) 1978

Isono seJerusalema lokukhululwa kwalo

1Maye kuwo umuzi oxhwalileyo ongcolileyo, ocindezelayo!

2Kawulaleli lizwi, kawamukeli kulaywa,

kawuthembeli eNkosini, kawusondeli kuNkulunkulu wawo.

3Izikhulu zawo zinjengezilwane ezibhongayo;

labahluleli bawo banjengezimpisi eziyizihwaba ezingatshiyi lutho kuze kuse.

4Abaprofethi bawo kabananzeleli, bayakhohlisa;

abapristi bawo bangcolisa okungcwele, baphule umthetho.

5INkosi iphakathi kwawo ilungile, kayenzi okubi;

insuku zonke ekuseni iyenza okufaneleyo, futhi kayiphuthi;

kodwa omubi kalanhloni.

6INkosi ithi: Ngizichithile izizwe, lenqaba zazo zidilikile;

ngidilizile imigwaqo yazo ukuze kungahambi muntu ngayo;

imizi yazo yenziwe yaba ngamanxiwa,

kakusekho loyedwa ohlala kiyo.

7Ngathi: Impela umuzi uzakungesaba, wamukele ukulaywa;

kawuyikukhohlwa ukulaya kwami konke.

Kodwa kwang’khona bekhuthalela ngamandla ukwenza okungalunganga.

8Ngakhoke ngilindela, itsho iNkosi, kuze kube lusuku engizakuvuka ngalo ngithonisise izizwe.

Ngoba isiqumo sami siyikubuthelela izizwe,

ngiqoqe imibuso, ngithululele phezu kwayo intukuthelo yami,

konke ukuvutha kolaka lwami;

ngoba ngomlilo wolaka lwami lomona wami wonke umhlaba uzakutshiswa.

9Ngalesosikhathi ngizakunika abantu ukukhuluma okuhlambulukileyo,

ukuba bonke bakhuleke ebizweni lami, bangikhonze nganhliziyonye.

10Kusukela phetsheya kwemifula yaseEtiyopiya abacela kimi phakathi kwabahlakazekileyo bami bazaletha umnikelo.

11Ngalolosuku lina bantu bami, kaliyikuyangeka ngenxa yezenzo eliphambuka ngazo kimi,

ngoba ngizakhupha phakathi kwenu labo abazikhukhumezayo;

kalisayikuziphakamisa entabeni yami engcwele.

12Ngoba ngizatshiya phakathi kwenu abantu abazithobileyo labathulayo.

Bazakuthemba ebizweni lami

13abaseleyo koIsrayeli;

kabayikwenza okubi, kabayikukhuluma amanga,

kakuyikuphuma emlonyeni wabo amazwi akhohlisayo.

Ngoba bazakwaluka balale phansi, kungabi khona obethusayo.

14Hlabela kakhulu, wena Ziyone,

umemeze, Israyeli.

Thokoza, uthabe ngenhliziyo yakho yonke, wena Jerusalema.

15INkosi isusile lokho okumelana lawe,

izixotshile izitha zakho.

UMbusi kaIsrayeli, iNkosi, uphakathi kwakho;

kawuyikwesaba okubi.

16Ngalolosuku kuzakuthiwa eJerusalema: Ungesabi, wena Ziyone;

kazingadinwa izandla zakho.

17INkosi uNkulunkulu wakho iphakathi kwakho,

injengeqhawe elinqobayo;

izajabula ngawe ngentokozo,

ikuvuselele ngothando lwayo, ithabe ngawe ngokuhlabelela

18njengasosukwini lomkhosi.

Ngizasusa inhlupheko zakho ukuba ungathwali ihlazo.

19Khangela, ngalesosikhathi ngizakulwa labo bonke abakucindezelayo;

ngizakusiza bonke abaqhulayo, ngibuthe abaxotshiweyo,

ngiphendule ihlazo labo libe yingoma yokudumisa lodumo emhlabeni wonke.

20Ngalesosikhathi ngizakuliletha ekhaya esikhathini sokulibutha kwami.

Ngizakulenza ukuba libe lodumo,

libongwe phakathi kwabantu bonke bomhlaba

lapho sengibuyisa inhlanhla yenu futhi, kutsho iNkosi.