Jow 2 - Ndebele Bible (iBhayibhili Elingcwele) 1978

Usuku lweNkosi

1Khalisani uphondo eZiyone,

lihlabe umkhosi entabeni yami egcwele.

Kabathuthumele bonke abakhileyo elizweni,

ngoba usuku lweNkosi luyeza, seluseduze,

2usuku lomnyama losizi,

usuku lwamayezi lomnyama omkhulu.

Njengobumnyama obembese izintaba

kuvela impi elamandla engelakubalwa.

Kakuzanga kube khona abanjengabo kusukela endulo,

futhi kabayikuba khona ngemva kwabo

kuyo yonke iminyaka ezayo.

3Umlilo uyatshisa phambi kwabo,

langemva kwabo kuvutha ilangabi.

Phambi kwabo ilizwe lifanana lensimu yaseEdeni,

kodwa ngemva kwabo liyinkangala elugwadule;

kakukho okungabaleka kubo.

4Bafanana lamabhiza,

bagijima njengamabhiza empi.

5Umsindo wokweqa kwabo ezingqongeni zezintaba

unjengomsindo wezinqola zempi,

unjengokufahlaza kwelangabi lomlilo otshisa amabibi,

banjengempi elamandla ehlelelwe ukulwa.

6Phambi kwabo abantu bayathuthumela, bethuke bonke.

7Bayahlasela njengamaqhawe,

bakhwele imiduli njengamadoda empi,

baqhubekele phambili bonke bengaphambuki endleleni zabo.

8Kabasunduzani, yilowo lalowo uhamba ngendlela yakhe;

bafohla phakathi kwezikhali, bengavinjelwa.

9Bayatheleka emzini, bagijime phezu kwemiduli,

bangene ezindlini, bengena ngamawindi njengesela.

10Nxa besiza, umhlaba uyanyikinyeka phambi kwabo,

lephezulu lithuthumele.

Ilanga lenyanga kuphenduka kube mnyama,

lezinkanyezi kucime ukukhanya kwazo.

11INkosi izwakalisa ilizwi layo phambi kwempi yayo,

ngoba impi yayo yinkulu kakhulu;

logcina ilizwi layo ulamandla.

Ngoba usuku lweNkosi lukhulu, luyesabeka kakhulu;

ngubani ongalumela na?Abantu bacelwa ukuphenduka

12Kanti lakhathesinje, kutsho iNkosi,

phendukelani kimi ngenhliziyo zenu zonke,

ngokuzila ukudla, langokukhala, langokulila,

13lidabule inhliziyo zenu, lingadabuli izambatho zenu.

Phendukelani eNkosini, uNkulunkulu wenu,

ngoba ilomusa lesihawu,

iyaphuza ukuthukuthela, ilothando olungapheliyo,

iyathethelela.

14Mhlawumbe izaphenduka isihawukele,

isitshiyele isibusiso,

isibusiso somnikelo wempuphu lomnikelo wokunathwayo weNkosi, uNkulunkulu wenu.

15Khalisani uphondo eZiyone,

lizile ukudla, lenze inkonzo enkulu;

16buthanisani abantu, libize ibandla,

lihlanganise abadala labantwana lensane ezimunyayo.

Umyeni kaphume endlini yakhe, lomlobokazi exhibeni lakhe.

17Abapristi, izikhonzi zeNkosi, kabakhale phakathi komkoto lealtare,

bathi: Bahawukele abantu bakho, Nkosi,

ungabenzi babe yinhlamba,

lesiga phakathi kwezizwe.

Bazakutsholoni phakathi kwezizwe ukuthi:

Ungaphi uNkulunkulu wabo na?

Isihawu seNkosi

18INkosi yaliphisekela ilizwe layo,

yaba lesihawu ebantwini bayo.

19INkosi yabaphendula abantu bayo yathi:

Sengizalinika amabele lewayini lamafutha, lisuthe;

kangisayikuphinda ngilenze inhlamba phakathi kwezizwe.

20Ngizasusela khatshana lani impi evela enyakatho,

ngiyixotshele elizweni elomileyo leliyinkangala,

uphondo lwayo ngiluxotshele olwandle lwasempumalanga,

lomsila wayo olwandle lwasentshonalanga;

kuvele ezidunjini zayo ivumba elibi,

ngoba yenzile izinto ezinkulu.

21Ungesabi, lizwe, kodwa jabula uthokoze,

ngoba iNkosi yenzile izinto ezinkulu.

22Lingesabi, zinyamazana zeganga,

ngoba amadlelo enkangala asehlumile;

izihlahla zithela izithelo zazo,

umkhiwa levini kuthelile kakhulu.

23Thabani, lina beZiyone,

lithokoze ngeNkosi, uNkulunkulu wenu;

ngoba ilinikile izulu lensewula ukuba ilibusise,

yalinisela izulu elinengi,

lensewula lelamuva njengakuqala.

24Iziza zizagcwala amabele,

lezikhamelo ziphuphume ngewayini lamafutha.

25Ngizabuyisela kini okwadliwa eminyakeni yesikhongwane

leqhwagi lenswabanda lentothoviyane,

impi yami enkulu engayithumela kini.

26Lizakudla okunengi, lisuthe,

lidumise ibizo leNkosi, uNkulunkulu wenu,

oliphethe ngokumangalisayo.

— Abantu bami kabasayikuphinda bayangiswe futhi —

27Lizakwazi ukuthi ngikhona phakathi kukaIsrayeli,

lokuthi mina Nkosi nginguNkulunkulu wenu, kakho omunye.

Abantu bami kabasayikuphinda bayangiswe futhi.

Ukuthelwa komoya kaNkulunkulu

28Kuzakuthi emva kwalokho ngithele umoya wami phezu kwabantu bonke;

amadodana enu lamadodakazi enu azakwazisela,

labadala benu baphuphe amaphupho,

lensizwa zenu zibone imibono.

29Laphezu kwenceku lencekukazi ngizathela umoya wami ngalezonsuku.

30Ngizaveza izimangaliso phezulu lasemhlabeni,

igazi, lomlilo, lentuthu ethunqayo.

31Ilanga lizaphenduka umnyama, lenyanga ibe ligazi,

lungakafiki usuku lweNkosi olukhulu lolwesabekayo.

32Kuzakuthi bonke abakhuleka ebizweni leNkosi bakhululwe;

ngoba entabeni yaseZiyone kuzakuba khona labo abaphunyukileyo,

njengokutsho kweNkosi,

laseJerusalema kube khona abaseleyo ababizwe yiNkosi.