Mark 8 - Ndebele Bible (iBhayibhili Elingcwele) 1978

UJesu usuthisa amadoda azinkulungwane ezine(Mat 15:32–39)

1Ngalezonsuku sekukhona futhi ixuku elikhulu lingelakudla, wabiza abafundi bakhe, wathi kubo:

2Ngiyalihawukela ixuku, ngoba selilami insuku ezintathu, lingelalutho lokudla.

3Uba ngibadabulela, baye emakhaya abo bengadlanga, bazayatha endleleni, ngoba abanye babo bavela khatshana.

4Abafundi bakhe baphendula bathi: Umuntu angabapha njani ukudla lababantu lapha enkangala na?

5Wababuza wathi: Lilezinkwa ezingaki na? Bathi: Eziyisikhombisa.

6Walaya ixuku ukuba lihlale phansi; wathatha izinkwa eziyisikhombisa, esebongile wazihlephula, wazinika abafundi bakhe ukuba balabele; balabela ixuku.

7Babelenhlanzana eziyingcosana; esezibusisile wathi kabababele lazo.

8Badla, basutha, babutha imvuthuluka eseleyo, izitsha eziyisikhombisa.

9Babengaba zinkulungwane ezine; wabadabulela.

10Wangena masinya emkolweni labafundi bakhe, weza elizweni laseDalmanutha.

Abafuna izibonakaliso(Mat 16:1–4; Luka 12:49–56)

11AbaFarisi beza, baqala ukuphikisana laye befuna kuye isibonakaliso esivela ezulwini, bemlinga.Mat 12:38; Luka 11:16

12Wabubula kakhulu emoyeni wakhe, wathi: Lesisizukulwana sifunelani isibonakaliso na? Ngiqinisile ngithi kini: Kakulasibonakaliso esizakunikwa kulesisizukulwana.Mat 12:39; Luka 11:29

13Wabatshiya, wangena emkolweni futhi, wasuka wawelela ngaphetsheya.

UJesu ukhuza abafundi ngokungaqedisisi kwabo(Mat 16:5–12)

14Kodwa babekhohliwe ukuphatha ukudla, bengelalutho, isinkwa sisinye kuphela emkolweni.

15Wabalaya wathi: Qaphelani, lixwaye imvubelo yabaFarisi lemvubelo kaHerodi.Luka 12:1

16Bakhulumisana bodwa, bathi kabalakudla.

17UJesu ekwazi wathi kubo: Kungani likhulumisana ngokuthi kalilakudla na? Kalikaboni, kalikaqedisisi na? Inhliziyo yenu iselukhuni na?

18Lilamehlo, kaliboni yini; lilendlebe, kalizwa na? Kalikhumbuli yiniJer 5:21; Hez 12:2; Mark 4:12

19mhla ngahlephulela abazinkulungwane ezinhlanu izinkwa ezinhlanu labutha izitsha ezingaki ezigcwele imvuthuluka na? Bathi: Ezilitshumi lambili.

20Mhla ziyisikhombisa kwaba zinkulungwane ezine, labutha izitsha ezingaki ezigcwele imvuthuluka na? Bathi: Eziyisikhombisa.

21Wathi kubo: Kalikaqedisisi na?

Isiphofu saseBetsayida

22Bafika eBetsayida. Baletha kuye isiphofu, bamncenga ukuba asithinte.

23Wasibamba isiphofu ngesandla, wasikhuphela ngaphandle komuzi; esekhafulele emehlweni aso, wabeka izandla zakhe phezu kwaso, wasibuza wathi: Uyabona ulutho na?

24Sakhangela, sathi: Ngibona abantu, kodwa ngibabona kungathi yizihlahla zihamba.

25Wabuya wabeka izandla zakhe phezu kwamehlo aso, sakhangelisisa, sasila, sabonisisa konke.

26Wasithumela ekhaya wathi: Ungatsheli muntu loyedwa emzini.

Isivumo sokukholwa sikaPetro(Mat 16:13–20; Luka 9:18–21)

27UJesu labafundi bakhe baphuma, baya emizini yaseKesariya Filiphi. Besendleleni, wababuza abafundi bakhe, wathi kubo: Abantu bathi ngingubani na?

28Baphendula bathi: UJohane uMbhaphathizi; abanye bathi: UnguElija; labanye bathi: Ungomunye wabaprofethi.Mark 6:14–15; Luka 9:7–8

29Wasebabuza esithi: Linake lithi ngingubani na? UPetro wamphendula wathi kuye: Wena unguKristu.Joha 6:68–69

30Wabalayisisa ukuba bangatsheli muntu ngaye.

UJesu ukhuluma ngokufa lokuvuka kwakhe(Mat 16:21–23; Luka 9:22)

31Waqala ukubafundisa ukuba iNdodana yomuntu imele inhlupheko ezinengi, ilahlwe ngabadala labapristi abakhulu lababhali, ibulawe, ivuke ngemva kwensuku ezintathu.

32Walikhuluma lelilizwi obala. UPetro wamthatha, waqala ukumkhalimela.

33Kodwa ephenduka, wabona abafundi bakhe, wamkhuza uPetro, wathi: Buyela emva kwami, Sathane, ngoba kawucabangi ngezinto zikaNkulunkulu kodwa ngezabantu.

Ukuhlutshwa kukaJesu lokwabamlandelayo(Mat 16:24–28; Luka 9:23–27)

34Wasebiza ixuku kanye labafundi bakhe, wathi kubo: Uba umuntu ethanda ukungilandela kazidele, athathe isiphambano sakhe, angilandele.Mat 10:38; Luka 14:27

35Ngoba ilowo lalowo othanda ukusilisa ukuphila kwakhe kuzamlahlekela; kodwa olahlekelwa yikuphila kwakhe ngami langevangeli uzakukusilisa.Mat 10:39; Luka 17:33; Joha 12:25

36Ngoba kuzakumsizani umuntu ukuzuza umhlaba wonke, alahlekelwe yikuphila kwakhe?

37Anganikani umuntu kube yinhlawulo yokuphila kwakhe na?

38Ngoba ilowo lalowo olenhloni ngami langamazwi ami kulesisizukulwana esifebayo lesonakeleyo, leNdodana yomuntu izakuba lenhloni ngaye, nxa isiza enkazimulweni kaYise kanye lezithunywa ezingcwele.