Levi 15 - Ndebele Bible (iBhayibhili Elingcwele) 1978

Mayelana lalokho okungcolileyo okuphuma emizimbeni yabantu

1INkosi yathi kuMose loAroni:

2Tshonini ebantwini bakoIsrayeli lithi: Nxa indoda ilengulamakhwa, ubomvu obuphumayo bungcolile.

3Lo ngumlayo omayelana lokungcola kwakhe ngenxa yengulamakhwa alayo. Loba ubomvu busaphuma emzimbeni wakhe, loba bungasaphumi emzimbeni wakhe, kuyikungcola kuye.

4Yonke imibheda alala kuyo lowomuntu izakungcola; lakho konke ahlala kukho kuzakungcola.

5Othinta umbheda wakhe kagezise ingubo zakhe, ageze ngamanzi, ahlale engcolile kuze kuhlwe.

6Ohlala entweni ahlale kuyo lowo olengulamakhwa kagezise ingubo zakhe, ageze ngamanzi, ahlale engcolile kuze kuhlwe.

7Othinta umzimba walowo olengulamakhwa kagezise ingubo zakhe, ageze ngamanzi, ahlale engcolile kuze kuhlwe.

8Uba olengulamakhwa ekhafulela ngamathe omunye ohlambulukileyo, ohlambulukileyo kagezise ingubo zakhe, ageze ngamanzi, ahlale engcolile kuze kuhlwe.

9Zonke izihlalo zebhiza ahlale kuzo lowo olengulamakhwa zizakungcola.

10Othinta into eyayingaphansi kwakhe uzakuhlala engcolile kuze kuhlwe; lalowo othwala into leyo kagezise ingubo zakhe, ageze ngamanzi, ahlale engcolile kuze kuhlwe.

11Umuntu othintwa yilowo olengulamakhwa engagezanga izandla zakhe ngamanzi, kagezise ingubo zakhe, ageze ngamanzi, ahlale engcolile kuze kuhlwe.

12Imbiza yebumba ethintwa yilowomuntu kayibulawe, lezitsha zonke zesihlahla zihlanzwe ngamanzi.

13Lapho umuntu olengulamakhwa esesilile, uzakuzibalela insuku eziyisikhombisa zokuhlanjululwa kwakhe, agezise ingubo zakhe, ageze ngamanzi agelezayo, ahlambuluke.

14Ngosuku lwesificaminwembili kathathe amajuba loba inkwilimba ezimbili, aye eNkosini ngasemnyango wethente lokuhlangana, akunike umpristi,

15umpristi anikele ngakho, okunye kube ngumnikelo wesono lokunye kube ngumnikelo wokutshiswa; ngalokho umpristi uzakumenzela indlela yokubuyisana phambi kweNkosi ngenxa yengulamakhwa obelayo.

16Nxa kuphuma endodeni ubudoda, kageze wonke umzimba wakhe ngamanzi, ahlale engcolile kuze kuhlwe.

17Zonke ingubo lazo zonke izikhumba ezithintwa yibudoda kazigeziswe ngamanzi, zihlale zingcolile kuze kuhlwe.

18Futhi indoda elala lowesifazana, bobabili kabageze ngamanzi, bahlale bengcolile kuze kuhlwe.

19Nxa owesifazana esemfuleni njengokwejwayekileyo, uzakuhlala engcolile insuku eziyisikhombisa; lowo omthintayo uzahlala engcolile kuze kuhlwe.

20Zonke izinto alala kuzo esangcolile zizakungcola; lakho konke ahlala kukho kuzakungcola.

21Othinta umbheda wakhe kagezise ingubo zakhe, ageze ngamanzi, ahlale engcolile kuze kuhlwe.

22Othinta into ahlala kuyo kagezise ingubo zakhe, ageze ngamanzi, ahlale engcolile kuze kuhlwe.

23Loba kungumbheda loba kuyinto ahlala kuyo owesifazana, uba umuntu ekuthinta, uzakuhlala engcolile kuze kuhlwe.

24Nxa indoda ilala laye, ukungcola kwakhe kuzakuba kiyo; izahlala ingcolile insuku eziyisikhombisa, lemibheda yonke elala kuyo izakungcola.

25Uba owesifazana elomopho insuku ezinengi, kungaseyisikhathi sokuba abe semfuleni, loba elomopho lanxa insuku zokuba abe semfuleni seziphelile, uzahlala engcolile; uzakuba ngongcolileyo njengasezinsukwini zokungcola kwakhe.

26Yonke imibheda alala kuyo zonke insuku alomopho ngazo izakuba kuye njengombheda alala kuwo nxa esesemfuleni; lezinto zonke ahlala kuzo zizakungcola, njengalokho zinjalo nxa esemfuleni.

27Wonke umuntu othinta lezozinto uzakuba ngongcolileyo, agezise ingubo zakhe, ageze ngamanzi, ahlale engcolile kuze kuhlwe.

28Kodwa uba esilile kulowomopho, uzazibalela insuku eziyisikhombisa; emva kwalokho uzakuhlambuluka.

29Ngosuku lwesificaminwembili uzathatha amajuba amabili loba inkwilimba ezimbili, akulethe kumpristi ngasemnyango wethente lokuhlangana,

30umpristi anikele okunye kube ngumnikelo wesono lokunye kube ngumnikelo wokutshiswa. Ngalokho uzakumenzela indlela yokubuyisana phambi kweNkosi ngenxa yomopho wakhe.

31Ngalindlela lizakulaya abantu bakoIsrayeli ngokungcola kwabo, ukuba bangangcolisi iTabernakeli lami eliphakathi kwabo, bafe.

32Lowo ngumlayo ngendoda elengulamakhwa, lendoda okuphuma kuyo ubudoda, ize ingcole ngakho,

33futhi lowesifazana ogulayo osemfuleni; ngitsho ngowesilisa langowesifazana okuphuma kuye okungcolileyo, langendoda engena engutsheni lowesifazana ongcolileyo.