Hubo 59 - Ndebele Bible (iBhayibhili Elingcwele) 1978

Umkhuleko wokucela ukukhululwa ezitheni

1Nkulunkulu wami, ngikhulula ezitheni zami,

ungivikele kwabangivukelayo;

2ngikhulula kulabo abenza okubi,

ungisize ebantwini abachitha igazi.

3Ngoba, khangela, bayangicathamela;

abantu abesabekayo bayangihlanganyela,

kungekho siphambeko lesono kimi, Nkosi;

4bayagijima bahlome, kungekho cala kimi.

Vuka! ungisize, ubabone,

5wena, Nkosi Nkulunkulu wamabandla, onguNkulunkulu kaIsrayeli;

vuka, uphindisele zonke izizwe,

ungayekeli lamunye walabo abenza okubi.

6Bayabuya kusihlwa behlaba umkhulungwane njengezinja,

bezula phakathi komuzi.

7Nampo bempompoloza ngemilomo yabo,

bengqathuza ngamazinyo abo,

ngoba bathi: Ngubani osizwayo na?

8Kodwa wena, Nkosi, uyabahleka,

uyaziklolodela zonke izizwe.

9Wena, mandla ami, ngizakuhlabelela amahubo okubonga,

ngoba wena, Nkulunkulu, uyinqaba yami.

10UNkulunkulu wami uzakungihlangabeza ngothando lwakhe olungapheliyo,

angitshengise engikufisayo phezu kwezitha zami.

11Ungazibulali, funa abantu bakithi bakhohlwe;

uzichithachithe ngamandla akho, uzahlule,

wena Nkosi, sihlangu sethu.

12Ngesono semilomo yazo langamazwi emilomo yazo

kazibanjwe ekuzigqajeni kwazo,

langenxa yokuhlambaza lokuqamba amanga ezikwenzayo.

13Uziqede ngokuthukuthela,

uziqede zingabe zisaba khona,

ukuze abantu bazi ukuthi uNkulunkulu uyabusa koJakobe,

kuze kube sekupheleni komhlaba.

14Bayabuya kusihlwa behlaba umkhulungwane njengezinja,

bezula phakathi komuzi.

15Bayazulazula befuna ukudla,

bahwabhe nxa bengasuthanga.

16Kodwa mina ngizakuhlabelela ngamandla akho;

ngizakuhlabelela ekuseni ngothando lwakho olungapheliyo;

ngoba wena ube yinqaba yami

lesiphephelo sami ngosuku lokuhlupheka.

17Wena, mandla ami, ngizakukuhlabelela amahubo okubonga,

ngoba wena, Nkulunkulu, uyinqaba yami,

uNkulunkulu ongithanda ngothando olungapheliyo.