Isam 3 - Ndebele Bible (iBhayibhili Elingcwele) 1978

1Lakuso isithunywa sebandla eliseSardisi loba uthi: Nanku akutshoyo lowo olabomoya abayisikhombisa bakaNkulunkulu lezinkanyezi eziyisikhombisa, uthi: Ngiyayazi imisebenzi yakho ukuba kuthiwa uyaphila, kanti wena ufile.

2Vuka, uqinise okuseleyo osekuzakufa, ngoba kangifumananga imisebenzi yakho iphelelisiwe phambi kukaNkulunkulu wami.

3Khumbulake lokho okwamukeleyo wakuzwa, kugcine, uphenduke. Uba ungavuki, ngizakuza kuwe njengesela, kawusoze wasazi isikhathi engizakuza ngaso kuwe.Mat 24:43, 44; Luka 12:39, 40; Isam 16:15

4Kodwake basekhona abantu abayingcosana eSardisi abangangcolisanga ingubo zabo; bazakuhamba lami bembethe okumhlophe, ngoba bafanele.

5Onqobayo uzakwambathiswa ngokunjalo ingubo ezimhlophe; kangiyikulesula ibizo lakhe encwadini yokuphila, ngoba ngizakulivuma phambi kukaBaba laphambi kwezithunywa zakhe.Eks 32:32, 33 Hubo 69:28; Isam 20:12; Mat 10:32; Luka 12:8

6Olendlebe kezwe lokho uMoya akutshoyo emabandleni.

7Lakuso isithunywa sebandla eliseFiladelfiya loba uthi: Nanku akutshoyo ongcwele loqotho, olekhiye kaDavida, ovula kungavali muntu, lovala kungavuli muntu,Isa 22:22; Jobe 12:14

8uthi: Ngiyayazi imisebenzi yakho; khangela, ngimisa phambi kwakho umnyango ovuliweyo, ongelakuvalwa muntu. Ngiyazi ukuthi ulamandla amancinyane, kanti uligcinile ilizwi lami, kawuliphikanga ibizo lami.

9Khangela, ngizakwenza labo abesinagoge likaSathane, abathi bangabaJuda kodwa beqamba amanga, beze baguqe ngasezinyaweni zakho; bazakwazi ukuthi lingabantu bami abathandekayo.Isa 49:23; 60:14; 43:4

10Ngoba ugcinile umlayo wami wokuba ubekezele, lami ngizakukugcina ngesikhathi sokulingwa okuzakufika emhlabeni wonke ukulinga bonke abakhileyo kuwo.

11Ngiyeza masinyane; bambisisa lokho olakho, ukuze ungawamukwa muntu umqhele wakho.

12Onqobayo ngizakumenza insika ethempelini likaNkulunkulu wami, kasoze aphuma kulo; ngizakuloba ibizo likaNkulunkulu wami phezu kwakhe, lebizo lomuzi kaNkulunkulu wami iJerusalema elitsha elehla livela kuNkulunkulu wami ezulwini, lebizo lami elitsha.Isam 21:2; Isa 62:2; 65:15

13Olendlebe kezwe lokho uMoya akutshoyo emabandleni.

14Lakuso isithunywa sebandla eliseLawodikeya loba uthi: Nanku akutshoyo uAmeni, ufakazi othembekileyo loqotho, umqalisi wokudaliweyo konke kukaNkulunkulu,Zaga 8:22

15uthi: Ngiyayazi imisebenzi yakho ukuthi kawuqandi, futhi kawutshisi. Kungathi ngabe uyaqanda kumbe utshise!

16Ngakhoke njengalokhu ubuthukuthuku, ungaqandi futhi ungatshisi, ngizakukutsaka emlonyeni wami.

17Ngoba uthi: Nginothile, ngiphumelele, kangisweli lutho. Kanti kawazi ukuthi ungohluphekayo, ohawulayo, ongumyanga, oyisiphofu, lohambaze.

18Ngakhoke ngiyakweluleka ukuba uthenge kimi igolide elihlanjululwe ngomlilo ukuba unothe, lengubo ezimhlophe ukuze wambathe, ufihle ihlazo lokuhambaze kwakho, uthenge lamagcobo okugcoba amehlo akho ukuba ubone.

19Bonke engibathandayo ngiyabasola ngibatshaye; ngakhoke tshisekela ukuphenduka.Zaga 3:12; Heb 12:6

20Khangela, ngimi ngasemnyango ngiqoqoda; uba umuntu esizwa ilizwi lami, avule umnyango, ngizakungena ngidle laye, laye adle lami.

21Onqobayo ngizakumnika ukuba ahlale lami esihlalweni sami sobukhosi, njengalokhu lami nganqoba, ngahlala loBaba esihlalweni sakhe sobukhosi.

22Olendlebe kezwe lokho uMoya akutshoyo emabandleni.