Jobe 7 - Ndebele Bible (iBhayibhili Elingcwele) 1978

UJobe ukhala kuNkulunkulu ngobunzima bokuhamba komuntu

1Umuntu kakho empini yini emhlabeni,

lensuku zakhe kazinjengensuku zoqatshiweyo na?

2Njengesigqili esifisa umthunzi,

lanjengesiqatshwa esilindele iholo laso,

3ngokunjalo nginikiwe inyanga eziyize,

ngabelwa ubusuku bezinhlupheko.

4Lapho ngilala phansi ngithi:

Kuzakusa nini na?

Ngoba ubusuku bude,

ngitshukuma kuze kuse.

5Inyama yami igcwele impethu;

isigogo sami siyaphola, sibuye sibhibhidle.

6Insuku zami ziyaphangisa kulesalukiso somaluki,

ziphele ngingelathemba.

7Nkulunkulu, khumbula ukuba ukuphila kwami kungumoya,

kangiyikuphinda ngibone okuhle.

8Lelihlo longibonayo kaliyikungibona futhi;

lapho usangibona, ngizakusuka.

9Njengeyezi linyamalala liphele,

kunjaloke loya endaweni yabafileyo kaphumi futhi,

10kaphindi abuyele emzini wakhe,

lendawo yakhe kayisayikumazi futhi.

11Ngalokho kangisayikuthula;

ngizakhuluma ekudabukeni komoya wami,

ngisole ebuhlungwini bomphefumulo wami.

12Ngilulwandle yini, kumbe isilo solwandle,

ukuba lingibekele abalindi na?

13Lapho ngisithi: Umbheda wami uzangiduduza,

lecansi lami lithulise ukukhala kwami;

14uyangesabisa ngamaphupho,

angethuse ngemibono,

15ukuze ngikhethe ukuklinywa,

lokufa kulokuhlupheka kwami.

16Ngiyanengwa yikuphila kwami,

kangifisi ukuhlala kokuphela.

Akungiyekele, ngoba insuku zami zingumoya nje.

17Uyini umuntu ukuba umnike udumo,

lokuba ucabange ngaye,

18lokuba umhlole ekuseni njalo,

umlinge izikhathi zonke na?

19Koze kube nini ulokhu ungiqaphele na?

Kawuyikungiyekela ngize ngiginye amathe ami na?

20Uba ngisona, ngingenzani kuwe, wena mlindi wabantu na?

Ungenzeleni into yakho yokunenjwa na?

Ungenzeleni ngibe ngumthwalo wakho na?

21Kawungithetheleli ngani isiphambeko sami,

ususe isono sami na?

Ngoba khathesi ngizalala phansi elibeni;

uzangidinga, kodwa kangiyikuba khona.