uRuthe 2 - Ndebele Bible (iBhayibhili Elingcwele) 1978

URuthe udobha amabele aseleyo emasimini kaBowasi

1UNawomi wayelesihloho, umuntu onothileyo owendlu kaElimeleki, ibizo lakhe lalinguBowasi.

2URuthe waseMowabi wathi kuNawomi: Ake ngiye emasimini, ngiyedobha amabele asalayo emva kwalowo ozangenzela umusa. Yena wasesithi kuye: Hamba, mntanami.Levi 19:9–10; Dute 24:19

3Wasehambake, waya wadobha amabele asala ngemva kwabavunayo. Wafika ensimini kaBowasi owayengowendlu kaElimeleki.

4UBowasi wafika evela eBetlehema, wababingelela abavunayo wathi: INkosi ibe lani. Bona bathi: INkosi ikubusise.

5Wasesithi encekwini yakhe eyayibekwe ukukhangela abavunayo: Lintombi ngekabani na?

6Yona yathi: Yintombi yaseMowabi eyabuya loNawomi evela elizweni laseMowabi;

7intombi ithe: Ake ngidobhe okusalayo phakathi kwezithungo emva kwabavunayo. Yasisizake ibi khonapha kusukela ekuseni kuze kube khathesi ingaphumuli lakancinyane.

8UBowasi wasesithi kuRuthe: Lalela, mntanami, ungayidobha kwenye insimu loba usuke lapha, kodwa usondele eduze lamantombazana ami.

9Ukhangele lapho amadoda avuna khona, uwalandele. Ngiwalayile ukuba angakuhluphi. Nxa usuwomile uye embizeni, unathe lokhu amadoda akukhileyo.

10URuthe wasesithi mbo ngobuso bakhe phansi, wathi kuye: Ngifumanelani umusa emehlweni akho ukuba unginanze mina engingowezizweni na?

11UBowasi wamphendula wathi: Konke lokhu owakwenzela unyokozala kusukela ekufeni kwendoda yakho ngikutsheliwe konke, lokutshiya kwakho uyihlo lonyoko lelizwe lakini, weza ebantwini owawungabazi ngaphambili.

12INkosi ikunike umvuzo ngalokho okwenzileyo, iNkosi uNkulunkulu kaIsrayeli osuphephele ngaphansi kwamaphiko ayo, ikuphe umvuzo opheleyo.

13Wasesithi: Ulomusa omkhulu kimi, nkosi yami, usungiduduzile, wakhuluma ngomusa encekwini yakho, loba mina ngingesiyo enye yencekukazi zakho.

14Ngesikhathi sokudla uBowasi wathi kuye: Woza lapha, dlana ukudla, utshebe isinkwa sakho ngewayini. Ngakhoke wasehlala phansi kwabavunayo, wasemnika umumbu okhanzingiweyo; wadla wasutha kwaze kwasala.

15Kwathi esesuka ukuyadobha, uBowasi walaya amadoda esithi: Myekeleni ukuba adobhe laphakathi kwezithungo, lingamkhuzi,

16limhwatshele ezinye ezinyandeni, limtshiyele ukuba adobhe, lingamkhuzi.

17Wadobhake kwaze kwahlwa. Wasebhula lokho ayekudobhile, kwaba ngamagokoko amabili amabele.

18Wakuthatha wahamba lakho ekhaya, wakutshengisa uninazala; wabuya wakhupha lokhokudla okwasala esesuthi.

19Uninazala wasesithi kuye: Ubudobha ngaphi lamhla na? Ubusebenza ngaphi? Ubusisiwe lowomuntu okunanzeleleyo. URuthe wasemtshela uninazala ukuthi ubesebenza kobani, wathi: Ibizo lalowomuntu engisebenze kuye lamuhla nguBowasi.

20UNawomi wasesithi kumalokazana wakhe: Kabusiswe yiNkosi elomusa ongabalahlanga abaphilayo labafileyo. UNawomi wathi futhi kuye: Lowomuntu uyisihlobo sethu esiseduze kithi, ofanele ukusilondoloza.Levi 25:25

21URuthe waseMowabi wathi: Futhi uthe kimi: Uzalandela izinceku zami zize ziqede konke ukuvuna.

22UNawomi wasesithi kuye: Kuhle, mntanami, ukuba uhambe lamantombazana akhe, funa bakuhluphe kwenye insimu.

23Waselandela amantombazana kaBowasi, edobha kwaze kwaphela ukuvunwa kwebhali lamabele. Wayelokhu ehlala loninazala.