uZefaniya 2 - Ndebele Bible (iBhayibhili Elingcwele) 1978

Ukwahlulelwa kwezizwe

1Buthana, yebo buthana, wena sizwe esingelanhloni,

2ungakadudulwa njengamakhoba aphephukayo,

ungakehlelwa yintukuthelo eyesabekayo yeNkosi,

ungakafikelwa lusuku lolaka lweNkosi.

3Dingani iNkosi, lina lonke abathobekileyo bomhlaba abenza imilayo yayo,

dingani ukulunga, lidinge ukuthobeka;

mhlawumbe lingavikelwa ngosuku lolaka lweNkosi.

4Ngoba iGaza lizakutshiywa, leAshikeloni lizaba lunxiwa,

labantu baseAshidodi bazaxotshwa emini, leEkroni lidilizwe.

5Maye kwabakhileyo ngaseduze lolwandle,

lina sizwe samaKerethi!

Ilizwi leNkosi lingawe, Kanani, lizwe lamaFilistiya;

ngizalichitha kuze kungabi khona ohlala khona.

6Wena lizwe elingasolwandle, uzakuba ngamadlelo,

ube yizihotsha zabelusi lezibaya zezimvu.

7Ilizwe elingasolwandle lizakuba ngelabaseleyo endlini kaJuda belusele kilo,

ezindlini zeAshikeloni bazalala khona kusihlwa.

Ngoba iNkosi uNkulunkulu wabo izakubakhumbula, ibenzele inhlanhla.

8Ngizwile ukukloloda kwamaMowabi lokuthuka kwamaAmoni,

ukuba babaklolodela kanjani abantu bami,

bezincoma ngelizwe labo.

9Ngifunga ukuphila kwami, kutsho iNkosi yamabandla, uNkulunkulu kaIsrayeli,

ngithi: UMowabi uzakuba njengeSodoma, lamaAmoni abe njengeGomora,

ilizwe lezimbabazane lemigodi yetshwayi elachitheka kokuphela.

Abaseleyo ebantwini bami bazakubaphanga,

labasilileyo esizweni sami babathumbe.

10Lokhu kuzakuba ngumvuzo wokuziphakamisa kwabo,

ngoba bakloloda, bazikhukhumeza ngabantu beNkosi yamabandla.

11INkosi izakwenza okwesabekayo kibo;

ngoba izabaqeda bonke onkulunkulu bomhlaba,

akhuleke kuyo wonke amazwe ezizwe,

wonke umuntuesendaweni yakibo.

12Lani futhi, maEtiyopiya, lizakubulawa ngomkhonto weNkosi.

13Izakuphakamisela isandla sayo ngasenyakatho, ichithe iAsiriya,

yenze iNineve ukuba ibe lunxiwa, lome njengenkangala.

14Imihlambi izakulala phakathi kwalo, lazo zonke inyamazana zeganga,

ingabuzane lodwayi kulale ebusuku ezinsikeni zalo,

kukhale isikhova ewindini, lewabayi likhale ngasemnyango.

15Yiwo lumuzi owajabula, owawulondolozekile,

owawusithi: Mina ngikhona; kakho futhi omunye.

Yeka ukuchitheka kwawo!

Usuyindawo yokubuthanela inyamazana;

bonke abadlula kiwo bayancifa, bawukhombe ngengqindi.