Isa 10 - Ndebele Bible (iBhayibhili Elingcwele) 1978

1Maye kulabo abamisa izimiso ezimbi,

lababhala izimiso ezisindayo,

2ukuphambukisa abayanga kukho okufaneleyo,

lokwamuka abahluphekayo ebantwini bami ilungelo labo,

bephanga abafelwakazi lezintandane!

3Lizakwenza njani mhla wosuku lokutshaywa,

lasekuchithekeni okuzavela khatshana na?

Lizabalekela kubani ukuba alisize na?

Lizatshiya ngaphi inotho yenu na?

4Okwenu yikuba liguqe phakathi kwabathunjiweyo,

lilale phakathi kwababuleweyo.

Kukho konke lokhu ukuthukuthela kwayo kakupheli,

isiphakamisile isandla sayo sokutshaya futhi.

Ilizwi leNkosi ngeAsiriya

5Maye kulo iAsiriya, intonga yentukuthelo yami, lenduku yolaka lwami!

6Ngiyalithuma lona esizweni esingamesabiyo uNkulunkulu,

ngiyalilaya ukulwa labantu abavusa ulaka lwami,

ukuba lihlasele, lithumbe,

libanyathezele phansi njengodaka lwezindleleni.

7Kodwa kalizimiseli kulokhu,

lengqondo yalo kayicabangi kanjalo;

kodwa izimisele ukuchitha, lidilize izizwe ezinengi;

8ngoba lithi: Izinduna zami zonke kazisimakhosi na?

9IKalino kalinjengeKarikemishi eselinqotshiwe yini,

leHamathi kalinjengeArpadi,

leSamariya kalinjengeDamaseko na?

10Njengokuba isandla sami sifinyelele emibusweni yezithombe,

emifanekiso yayo ebaziweyo mikhulu kuleyeJerusalema leyeSamariya,

11kangiyikwenza yini kulo iJerusalema lezithombe zalo,

njengalokhu ngenzile kulo iSamariya lemifanekiso yalo na?

12Kuzakuthi lapho iNkosi isiqedile wonke umsebenzi wayo entabeni yaseZiyone laseJerusalema, itshaye inkosi yaseAsiriya ngenxa yokuzikhukhumeza lokuzigqaja kwayo.

13Ngoba ithi:

Ngikwenzile ngamandla ami,

langokuhlakanipha kwami, ngoba ngilokuqedisisa;

ngisusile imikhawulo yezizwe, ngaphanga inotho yazo;

lanjengenkunzi ngawisela phansi abantu bazo.

14Isandla sami sazithathela inotho yezizwe esidlekeni;

njengabantu abathatha amaqanda atshiyiweyo,

ngizithethe ngokunjalo izizwe zonke;

kwakungekho lokukodwa okuphaphazelisa impiko,

lokuvula umlomo, lokutshiyozayo.

15Ihloka lizazikhukhumeza kuye ogamulayo ngalo yini,

lesaha izikhulise kuye osika ngayo na?

Njengokungathi induku inyikinya lowo oyiphakamisayo,

lodondolo lumphakamise yena ongesiso isigodo.

16Ngalokhuke iNkosi yamabandla izathumela isifo esikhulu phakathi kwabazimukileyo beAsiriya;

emizimbeni yabo kuzaphembeka ukutshisa okunjengomlilo.

17Ukukhanya kukaIsrayeli kuzakuba ngumlilo,

loNgcwele wakhe abe lilangabi;

kuzakutshisa kuqede ameva alo lokhula lwalo ngasuku lunye.

18Ubuhle bamahlathi alo lamasimu alo iNkosi izabuqeda bonke nya,

njengomkhuhlane uqeda isiguli.

19Izihlahla zehlathi zalo eziseleyo zizakuba yingcosana,

ukuze zibalwe langumntwana.

Abaseleyo koIsrayeli

20Kuzakuthi ngalolosuku abaseleyo koIsrayeli, abasilileyo endlini kaJakobe, kabasayikuthembela kuye abatshayileyo; kodwa bazathembela eNkosini, oNgcwele kaIsrayeli ngeqiniso.

21Abaseleyo bazakubuya, abaseleyo bakaJakobe babuyele kuNkulunkulu olamandla.

22Ngoba lanxa abantu bakho, Israyeli, bengangetshebetshebe lolwandle, kuzakubuya phakathi kwabo abaseleyo kuphela; ukuchitheka kumisiwe okubafaneleyo.Roma 9:27

23Ngoba iNkosi uNkulunkulu wamabandla izaletha ukubhujiswa okumisiweyo phakathi kwawo wonke umhlaba.

24Ngakhoke iNkosi uNkulunkulu wamabandla ithi: Lina bantu bami, elakhe eZiyone, lingabesabi abaseAsiriya lapho belitshaya ngenduku, beliphakamisela intonga yabo njengamaGibithe.

25Ngoba ngesikhatshana nje ukuthukuthela kwami kuzaphela, lolaka lwami luphendulelwe ekubachitheni.

26INkosi izakubatshaya ngomchilo, njengasekutshayeni kwayo iMidiyani ngasedwaleni laseOrebi; izaphakamisela iAsiriya intonga yayo njengokwenza kwayo eGibithe.

27Kuzakuthi ngalolosuku umthwalo ususwe emahlombe enu, lejogwe laphulwe entanyeni yenu.

Ukuhlasela kwabaseAsiriya

28Abahlaselayo sebefikile eAyathi bevela eRimoni; badabula iMigironi,

eMikimashi bethula impahla yabo;

29badlula esikhaleni, ebusuku bayalala eGeba;

iRama liyathuthumela, leGibeya likaSawuli liyabaleka.

30Hlaba umkhosi, wena Galimi!

Ulalele, wena Layishi!

Usabele, wena Anathothi.

31IMadimena liyabaleka,

labaseGebimi bayabaleka, bayacatsha.

32Lamhlanje bazakuma eNobi,

banyikinyele inqindi yabo entabeni yaseZiyone, intaba yaseJerusalema.

33Khangela, iNkosi uNkulunkulu wamabandla izakuquma ingatsha ngamandla asabekayo,

kuwohlozelwe phansi eziphakemeyo,

lezinde zehliselwe phansi.

34Izihlahla zehlathi zizaganyulwa ngehloka,

izihlahla ezinkulu zeLebanoni ziwele phansi.