Zaga 6 - Ndebele Bible (iBhayibhili Elingcwele) 1978

Izixwayiso ezimayelana lezibambiso lobuvila lokwenza okubi

1Mntanami, uba uyisibambiso somakhelwana wakho,

uba uzinikele ukuba ube yisibambiso kowezizwe,

2usuthiyiwe yisithembiso sakho,

ubanjiwe ngamazwi akho,

3yenza lokhu, mntanami, uzophule,

lokhu ususesandleni somakhelwana wakho;

phangisa uhambe, uyemncenga umakhelwana wakho,

4ungaphumuli, ungalali ubuthongo;

5uzophule njengomziki emjibileni,

njengenyoni esandleni somthiyi.

6Yana ebunyonyweni, wena vila,

ubone indlela zabo, uhlakaniphe.

7Kabulankosi lenduna lombusi,

8kanti bubutha ukudla kwabo ehlobo,

buvune ngesikhathi sokuvuna.

9Wena vila, koze kube nini ulele na?

Uzakuvuka nini?

10Uzalala ubuthongo obuncinyane, uwozele kancinyane,

usonge izandla ukuba uphumule okwesikhatshana,

11ubususehlelwa yibuyanga njengomphangi

lokuswela njengesikliwi.

12Umuntu omubi, umuntu ongalunganga,

yilowo onyeyayo akhuluma okubi,

13afice amehlo, atshudule ngenyawo zakhe,

akhombe ngomunwe;

14ngenhliziyo embi uyaceba okubi,

ubanga ingxabano sonke isikhathi.

15Ngakho uzakwehlelwa yinhlupheko masinyane,

alimale ngomzuzu nje, angabi lakusiliswa.

16Kukhona izinto ezithile ezizondwa yiNkosi,

yebo, izinto eziyisikhombisa eziyizinengiso kuyo;

17ukukhangela ngokuzigqaja, lolimi oluqamba amanga,

lezandla ezichitha igazi lomuntu ongelacala,

18lenhliziyo eceba amacebo amabi,

lenyawo ezikhawuleza ukwenza okubi,

19lofakazi omubi oqamba amanga,

lomuntu obanga ingxabano phakathi kwabazalwane.

Isixwayiso esimayelana lobufebe

20Mntanami, gcina imilayo kayihlo,

ungakwali ukufundisa kukanyoko;

21kugcine enhliziyweni yakho njalo,

kubophele entanyeni yakho.

22Ekuhambeni kwakho kuzakukuhola,

ekulaleni kwakho kukulondoloze,

lasekuvukeni kwakho kukhulume lawe.

23Ngoba umlayo uyisibane, lokufundisa kuyikukhanya,

lokukhuza lokulaya kuyindlela yokuphila,

24ukuze ugcineke ungayi emfazini womunye umuntu,

lasemazwini akhohlisayo lowesifazana omubi.

25Ungakhanuki ubuhle bakhe enhliziyweni yakho,

angakuyengi ngamehlo akhe amahle;

26ngoba isiphingi singathengwa ngesinkwa esisodwa nje,

kodwa umfazi womuntu ufuna impilo yomuntu uqobo.

27Kambe umuntu angathwala umlilo ngesifuba sakhe,

izigqoko zakhe zingatshi na?

28Umuntu angahamba phezu kwamalahle avuthayo,

inyawo zakhe zingatshi na?

29Unjalo yena olala lomkamakhelwana wakhe;

bonke abathinta umfazi onje kabayikuyekelwa.

30Abantu kabalideleli yini isela nxa liseba

ukuba lidle lisuthe, lanxa lilambile na?

31Uba libanjiwe, kufanele ukuba lihlawule kuphindwe kasikhombisa,

linikele yonke impahla yendlu yalo.

32Kodwa ofebayo uyisithutha;

owenza lokhu nguye ozibhubhisayo;

33uzatshaywa, agconwe,

lehlazo lakhe kalisoze liphele.

34Ngoba ubukhwele bomuntu bungavusa ulaka lwakhe,

kayikuba lasihawu ngosuku lokuphindisela kwakhe;

35kayikuvuma ukuhlawulwa,

kayikuthuliswa lanxa umupha izipho ezinengi.