Roma 13 - Ndebele Bible (iBhayibhili Elingcwele) 1978

Mayelana lokulalela amakhosi

1Kakube yilowo lalowo azehlisele ngaphansi kwamandla ombuso. Ngoba kakukho amandla ombuso angaveli kuNkulunkulu; lamandla akhona amiswe nguye.

2Ngakhoke omelana lamandla ombuso umelana lesimiso sikaNkulunkulu; lalabo abamelana lawo bazakwamukeliswa ukulahlwa.

3Ngoba ababusi kabesabeki kwabenza okuhle, kodwa besabeka kwabenza okubi. Uyathanda ukungesabi ababusayo na? Ngakho yenza okuhle, uzakubongwa yibo;

4ngoba bayizinceku zikaNkulunkulu zokukwenzela okuhle. Kodwa uba usenza okubi, yesaba, ngoba umkhonto kabawuphatheli ize. Bayizinceku zikaNkulunkulu zokwehlisela ulaka lwakhe phezu kowenza okubi.

5Ngalokhoke ufanele uzehlise, kungabi ngenxa yolaka kuphela, kodwa langenxa yesazela.

6Ngoba ngenxa yalokho lithela umthelo; ngoba ababusayo bayizinceku zikaNkulunkulu, ezikhuthalela khona lokho.Mat 22:21; Mark 12:17; Luka 20:25

7Phanini bonke okubafaneleyo; thelani umthelo kofanele umthelo, limkhokhelele ofanele inkokhelo, limhloniphe ofanele inhlonipho, limdumise ofanele ukudunyiswa.

Ukuthanda abazalwane

8Lingabi lamlandu komuntu, kuphela owokuthandana; ngoba othanda umakhelwana wakhe ugcwalisile umlayo.

9Ngoba limithetho ethi: Ungafebi, ungabulali, ungebi, ungabi lamhawu; loba kukhona omunye umlayo, yonke ihlanganiswa kulelilizwi elithi: Wothanda umakhelwana wakho njengalokhu uzithanda wena.Eks 20:13–15, 17; Dute 5:17–19, 21; Levi 19:18

10Uthando kalwenzi okubi kumakhelwana; ngakho uthando luyikugcwaliseka komlayo.

Ukuhamba ekukhanyeni

11Langaphandle kwalokhu yazini ukuthi lesisikhathi sinjani; yisikhathi sokuba livuke ebuthongweni. Ngoba ukusiliswa kwethu sekusondele kithi khathesi kulalesosikhathi esaqala ukukholwa ngaso.

12Ubusuku sebudlulile, sekuzakusa. Ngakhoke asilahle imisebenzi yomnyama, sihlome izikhali zokukhanya.

13Asihambe ngokufaneleyo njengasemini, singahambi ngokuminza langokudakwa, langokufeba, langokungabi lanhloni, langokuxabana, langomona.

14Kodwa yambathani iNkosi uJesu Kristu; lingananzeleli ngokusuthisa inkanuko zomzimba.