Hez 34 - Ndebele Bible (iBhayibhili Elingcwele) 1978

Ilizwi leNkosi ngabelusi bakoIsrayeli

1Ilizwi leNkosi lafika kimi lathi:

2Ndoda, tshumayela ngabelusi bakoIsrayeli, utshumayele uthi kibo: INkosi uNkulunkulu ithi: Maye kini, belusi bakoIsrayeli elizondlayo lina! Abelusi kabafanele ukwelusa izimvu na?

3Liyadla amahwahwa, lizigqokise ngoboya, lihlabe ezinonileyo, kodwa lingazelusi izimvu.

4Kaliziqinisanga ezibuthakathaka, kalizelaphanga ezigulayo, lezaphukileyo kalizibophanga, kalizibuyisanga eziduhileyo, lezilahlekileyo kalizidinganga, lizibusile ngamandla langolunya.

5Ngakho zichithekile ngoba bekungelamalusi, zaba yikudla kwazo zonke izilo zeganga.Nani 27:17; 2 Lan 18:16; Mat 9:36; Mark 6:34

6Izimvu zami zachitheka, zazulazula kuzo zonke intaba, lakiwo wonke amaqaqa aphakemeyo; izimvu zami zachitheka endaweni zonke zomhlaba, kungekho loyedwa ozilandelayo azidinge.

7Ngalokhoke, lina belusi, zwanini ilizwi leNkosi.

8INkosi uNkulunkulu ithi: Ngiyazifunga mina, ngoba izimvu zami seziyimpango, seziyikudla kwazo zonke izilo zeganga, ngoba kungelamalusi, langoba abelusi bami bengazidinganga izimvu zami, kodwa bezondlile bona, bengazelusanga izimvu zami,

9ngakho, lina belusi, zwanini ilizwi leNkosi.

10INkosi uNkulunkulu ithi: Ngimelene labelusi, ngizafuna izimvu zami kibo, ngibayekelise ukwelusa izimvu zami, bangaphindi ukuzondla bona. Ngizakhupha izimvu zami emilonyeni yabo ukuze zingabi yikudla kwabo.

11INkosi uNkulunkulu ithi: Mina uqobo lwami ngizazilandela izimvu zami, ngizidinge.

12Njengomalusi edinga umhlambi wakhe lapho ezinye izimvu zakhe sezichithekile, ngokunjaloke ngizadinga izimvu zami, ngizikhuphe kuzo zonke indawo lapho ezihlakazekele khona ngosuku lwamayezi lomnyama omkhulu.

13Ngizazikhupha phakathi kwabantu, ngizibuthe emazweni, ngizibuyisele elizweni lazo, ngizidlise entabeni zakoIsrayeli, lasemithonjeni, lakuzo zonke indawo zelizwe okwakhiwe kizo.

14Ngizazidlisa edlelweni elihle, ledlelo lazo lizakuba sezingqongeni zentaba zakoIsrayeli. Zizalala phansi elizweni eliledlelo elihle, zidle emadlelweni amahle ezintabeni zakoIsrayeli.

15Mina uqobo ngizakuba ngumalusi wezimvu zami, ngizilalise phansi, kutsho iNkosi uNkulunkulu.

16Ngizadinga ezilahlekileyo, ngibuyise eziduhileyo, ngibophe ezaphukileyo, ngiqinise ezibuthakathaka; lezinonileyo leziqinileyo ngizazilondoloza, ngizidlise ngokulunga.

17Linake, mhlambi wami, kutsho iNkosi uNkulunkulu, ngizakwahlulela phakathi kwemvu lemvu, laphakathi kwenqama lentondolo.

18Kakwanelanga yini ukuba lidle edlelweni elihle, lize linyathele ngenyawo ledlelo lenu eliseleyo, lokuba linathe amanzi ahlambulukileyo lize lingcolise lamanye ngenyawo zenu na?

19Izimvu zami zimele zidle lokhu okunyathelwe ngenyawo zenu, zinathe okungcoliswe ngenyawo zenu na?

20Ngakho iNkosi uNkulunkulu ithi kuzo: Mina uqobo lwami ngizakwahlulela phakathi kwezimvu ezinonileyo lezicakileyo.

21Ngoba liyasunduza ngemihlubulo langamalunda, lihlabe ezibuthakathaka ngempondo zenu, zize zihlakazekele khatshana,

22ngizakuzisa izimvu zami, kazisayikuba yimpango; ngizakwahlulela phakathi kwemvu lemvu.

23Ngizazimisela umalusi abe munye, inceku yami uDavida, yena uzakuzelusa. Uzakuzidlisa abe ngumalusi wazo.Isam 7:17

24Mina Nkosi ngizakuba nguNkulunkulu wazo, lenceku yami uDavida ibe yisikhulu phakathi kwazo. Mina Nkosi ngikhulumile.Hez 37:24

25Ngizakwenza lazo isivumelwano sokuthula, ngixotshe izilo zeganga elizweni, ukuze zilondolozeke enkangala, zilale ehlathini.

26Ngizazenza zibe yisibusiso zona lezindawo ezihanqe intaba yami, ngithumele izulu ngesikhathi salo, izulu elihle.

27Izihlahla zeganga zizathela izithelo zazo, lomhlaba uveze inala, zilondolozeke elizweni lazo. Zizakwazi ukuba ngiyiNkosi nxa sengaphule ijogwe lazo, ngazikhulula kulabo abazithumbileyo.

28Kazisayikuba yimpango yezizwe, kazisayikudliwa yizilo zelizwe; zizalondolozeka, zingesatshiswa muntu.

29Ngizazinika amasimu avundileyo ukuze zingabe zisaqedwa yindlala elizweni, zingabe zisaba lihlazo lezizwe.

30Zizakwazi ukuba mina Nkosi, uNkulunkulu wazo, ngilazo, lokuba bona abantu bakoIsrayeli bangabantu bami, kutsho iNkosi uNkulunkulu.

31Lina, bantu bami, liyizimvu zami, izimvu engizelusayo, mina nginguNkulunkulu wenu, kutsho iNkosi uNkulunkulu.