Seb 17 - Ndebele Bible (iBhayibhili Elingcwele) 1978

UPawuli utshumayela eTesalonika

1Kwathi sebedabule iAmfipholi leApoloniya, bafika eTesalonika, lapho kwakukhona isinagoge labaJuda.

2UPawuli wangena kubo njengokujwayela kwakhe, waphikisana labo ngemibhalo amaSabatha amathathu,

3ebavulela, etshengisa ngayo ukuthi kwakufanele ukuba uKristu ahlupheke, avuke kwabafileyo, esithi futhi: UJesu lo engimtshumayela kini unguKristu.

4Abanye babo bakholwa, bazihlanganisa loPawuli loSilasi, njalo labanengi bamaGriki akholwayo, labesifazana abadumileyo abanengi.

5Kodwa abaJuda baba lomona, bathatha abantu ababi phakathi kwamavila, babutha ixuku, benza isiyaluyalu phakathi komuzi; bahlasela indlu kaJasoni befuna ukubakhuphela ebantwini.

6Kwathi bengabafumani badonsela uJasoni kanye labazalwane abathile kubaphathi bomuzi, bathi: Laba abayaluzisa ilizwe sebefikile lalapha,

7uJasoni ubamukele; bonke laba benza okuphambene lemithetho kaKesari, besithi kukhona enye inkosi, enguJesu.

8Abantu labaphathi bomuzi bethuka lapho besizwa lokhu.

9Kwathi sebethethe isibambiso kuJasoni lakwabanye, babakhulula.

UPawuli utshumayela eBeriya

10Masinyane abazalwane babasusa oPawuli loSilasi babathumela eBeriya ebusuku; bona sebefikile khona bangena esinagogeni labaJuda.

11LababaJuda babelungile kulalabo abaseTesalonika, ngoba balamukela ilizwi ngenhliziyo yonke, behlolisisa imibhalo insuku ngensuku ukubona ukuba zinjalo yini lezizinto.

12Ngakho abanengi kubo bakholwa, labesifazana bamaGriki abahloniphekayo abanengi kanye labesilisa.

13Kwathi abaJuda base‐Tesalonika sebezwile ukuthi ilizwi likaNkulunkulu liyatshunyayelwa nguPawuli laseBeriya, beza lakhona, badunga bavusa ixuku.

14Ngakho abazalwane bamsusa masinyane uPawuli bamusa ngasolwandle; kodwa uSilasi loTimothi basala khona.

15Labo abaphelekezela uPawuli bamfikisa eAtene; sebamukele umlayezelo ngoSilasi loTimothi ukuba beze kuye masinyane basuka bahamba.

UPawuli utshumayela eAtene

16Kwathi uPawuli esabalindele eAtene, umoya wakhe wakhathazeka phakathi kwakhe ebona umuzi ugcwele izithombe.

17Ngakho waphikisana labaJuda labanye abakhonza uNkulunkulu esinagogeni, lasemidangeni waphikisana insuku zonke lalabo abasuka baba khona.

18Abathile kuzo izazi zamaEpikuri lamaStoyiki baphikisana laye; abanye bathi: Umzenzisazi lo angathini na? Labanye bathi: Kungathi ungotshumayela onkulunkulu bezizweni; ngoba watshumayela ngoJesu langokuvuka kwabafileyo.

19Basebemthatha, bemusa eAreyopagu besithi: Akusitshele ukuba iyini lemfundiso entsha oyifundisayo na?

20Ngoba uletha indaba ezimangalisayo endlebeni zethu; ngakho sifisa ukwazi ukuthi lezizinto ziyini.

21Ngoba bonke abaseAtene labezizwe abahlala khona babengasebenzi lutho, kuphela ukuxoxa lokuzwa ngezinto ezintsha.

22Ngakho uPawuli wema phakathi kweAreyopagu, wathi: Madoda aseAtene, ngiyabona ukuthi ezintweni zonke likhonza onkulunkulu kakhulu.

23Ngoba ngithe ngihamba ngikhangela izinto elikhonza ngazo, ngafumana ialtare elilotshwe ukuthi: NGELIKANKULUNKULU ONGAZIWAYO. Lokho elikukhonza lingakwazi, yikho engikutshumayela kini.

24UNkulunkulu owenza umhlaba lakho konke okukuwo, yena oyiNkosi yezulu lomhlaba, kahlali emathempelini enziwe ngabantu;1 Kho 8:27; Isa 42:5; Seb 7:48

25futhi kakhonzwa ngezandla zabantu njengokungathi uswele ulutho, ngoba yena uqobo lwakhe uyabapha bonke abantu ukusila lokuphefumula lakho konke;

26wazenza izizwe zonke ngazinye ukuba zihlale ebusweni bonke bomhlaba, wazimisela izikhathi eziqunyiweyo lemikhawulo yokuhlala kwazo,

27ukuba zifune uNkulunkulu, ukuze mhlawumbe zimuzwe, zimfumane, kanti kakhatshana kulowo lalowo wethu.

28Ngoba sisila, sihambe, sihlale ngaye, njengokuba imbongi ezithile zakini zitshilo zathi: Ngoba futhi siyinzalo yakhe.

29Ngakhoke lokhu siyinzalo kaNkulunkulu, kakufanele ukuba sinakane ukuthi ubuNkulunkulu bunjengegolide ingabe isiliva loba ilitshe okwenziweyo ngeminwe langokunakana kwabantu.

30Ngoba izikhathi zokungamazi uNkulunkulu wazibekezelela, kodwa khathesi uyalaya bonke abantu endaweni zonke ukuba baphenduke,

31ngoba umisile usuku azakuthonisisa umhlaba ngalo ngokulunga ngomuntu ammisileyo, enika bonke abantu ithemba ngokumvusa kwabafileyo.

32Kwathi besizwa ngokuvuka kwabafileyo, abanye bahlekisana ngaye, kodwa abanye bathi: Sizaphinda sikuzwe ngalindaba.

33Ngakho uPawuli waphuma phakathi kwabo.

34Kodwa amadoda athile anamathela kuye, akholwa; phakathi kwawo kwakukhona uDiyonisiyu waseAreyopagu lowesifazana othiwa nguDamari, labanye kanye labo.