uJuda 1 - Ndebele Bible (iBhayibhili Elingcwele) 1978

Isibingelelo

1Mina Juda, inceku kaJesu Kristu lomfowabo kaJakobe, ngithi kubo ababiziweyo abathandekayo kuNkulunkulu uBaba abagcinelwe uJesu Kristu:Mat 13:55; Mark 6:3

2Kakwandiswe kini isihawu lokuthula lothando.

Mayelana labakhohlisi(2 Pet 2)

3Bathandekayo, lapho ngisatshisakela ukulilobela ngokusiliswa esikuhlanganyelayo, ngabona ukuthi kuswelekile ukuba ngililobele, ngilikhuthaze, ukuba lilwele ukukholwa abakunikwayo abangcwele kwaba kanye.

4Ngoba sekungenile ngokunyenya abantu abathile abamiselwa lokhukulahlwa kudala, abantu abeyisa uNkulunkulu, abaphendula umusa kaNkulunkulu wethu ube ngamanyala, bephika uMbusi oyedwa leNkosi yethu uJesu Kristu.

5Ngithanda ukulikhumbuza, loba belikwazi konke, ukuthi iNkosi eyasilisa isizwe ngokusikhupha elizweni laseGibithe yabuya yababhubhisa labo abangakholwanga.Eks 12:51; Nani 14:29, 30

6Lezithunywa ezingagcinanga izikhundla zazo, kodwa zatshiya indawo zazo, zigcinelwe ukulahlwa mhla wosuku olukhulu, zibotshiwe ngezibopho ezingaqamukiyo ngaphansi komnyama.

7Ngokunjalo iSodoma leGomora lemizi yakhona eyenza ukuphinga njengazo, yazinikela enkanukweni ezingasizo zemvelo, yenziwa isibonelo ngokutshaywa ngomlilo ongapheliyo.Gen 19:1–24

8Ngokunjalo lababantu ekuphupheni kwabo bayona imizimba yabo, beyisa amandla eNkosi, bahlambaze abalenkazimulo.

9Kodwa uMikayeli, isithunywa esikhulu, lapho ephikisana loSathane bebanga isidumbu sikaMose, kabanga lesibindi sokumlahla ngokumthuka, kodwa wathi: INkosi kayikukhalimele.Dan 10:13, 21; 12:1; Isam 12:7; Dute 34:6; Zek 3:2

10Kodwa lababantu bathuka konke abangakwaziyo; lalokho abakwaziyo ngemvelo njengezinyamazana ezingelangqondo babhubha ngakho.

11Maye kibo! Ngoba bahamba endleleni kaKayini; baziwisele ekuduheni kukaBalami ngenxa yenzuzo; baphika njengoKora, ngakho babhubha.Gen 4:3–8; Nani 22:1–35; 16:1–35

12Laba balihlazo emadilini enu othando nxa besidla lani bengesabi, bezinanzelela bona bodwa. Bangamayezi angelamanzi, aphetshulwa ngumoya; bayizihlahla ezingatheliyo zebusika, ezife kabili, sezisitshulwe;

13bangamavinqo olwandle aphosekayo, abhubhudla amahlazo awo; bazinkanyezi eziduhayo ezigcinelwe umnyama omkhulu ongapheliyo.

14UEnoki ongowesizukulwana sesikhombisa kusukela kuAdamu waprofetha ngabo, wathi: Khangelani, iNkosi yafika kanye labangcwele bayo abayizigidiGen 5:18, 21–24

15ukuthonisisa bonke, ibalahle bonke abeyisa uNkulunkulu ngenxa yezenzo zonke zokungamhloniphi abazenzayo, langawo wonke amazwi anzima izoni ezeyisa uNkulunkulu eziwakhuluma ngaye.

16Laba bangabangungunayo labasolayo, behamba ngenkanuko zabo, bekhuluma amazwi aqatha, bezikhukhumeza, besebenzisa amazwi okulalisa ngolimi ngenxa yenzuzo.

17Kodwa lina, bathandekayo, khumbulani amazwi akhulunywa ngaphambili ngabaphostoli beNkosi yethu uJesu Kristu;

18bathi kini: Ngesikhathi sokucina kuzakuba khona abahleka ulunywa, behamba ngenkanuko zabo ezimbi.2 Pet 3:3

19Yibo laba abaletha ukwahlukana, bangabomhlaba, kabalaMoya.

20Kodwa lina, bathandekayo, zakheni ekukholweni kwenu okungcwele kakhulu, likhuleke ngoMoya oNgcwele;

21lihlale othandweni lukaNkulunkulu, lilindele isihawu seNkosi yethu uJesu Kristu, ukuze libe lokuphila okungapheliyo.

22Libahawukele abanye abathandabuzayo;

23lisilise abanye ngokubahluthuna emlilweni; abanye libahawukele lilokwesaba, lizonda ngitsho lengubo eyoniwe zinkanuko ezimbi.

Isicino

24Kuye olamandla okulilinda ukuba lingakhubeki, lokulimisa phambi kwenkazimulo yakhe lingelasici, lilokuthokoza okukhulu,

25kuye uNkulunkulu oyedwa uMsilisi wethu, ngoJesu Kristu iNkosi yethu, kakube inkazimulo, lobukhulu, lobukhosi, lamandla, kungakabi khona isikhathi, lakhathesi, kuze kube nini lanini. Ameni.