Nani 24 - Ndebele Bible (iBhayibhili Elingcwele) 1978

1UBalami esebonile ukuthi kuhle eNkosini ukubusisa uIsrayeli, kahambanga njengakuqala ukuyadinga imilingo; kodwa wakhangela ngasenkangala,

2wabona uIsrayeli ehlezi ngezizwe zakhe. Umoya kaNkulunkulu wehlela phezu kwakhe,

3waseqala ukuhuba lelihubo wathi:

Nanti ilizwi likaBalami indodana kaBeyori,

ilizwi lomuntu olamehlo avulekileyo,

4ilizwi lozwayo amazwi kaNkulunkulu,

obonayo umbono ovela kuSomandla,

ozuza ilizwi, kuvuleke amehlo akhe.

5Lona lithi: Mahle kangaka amathente akho, Jakobe,

lamakhaya akho, Israyeli!

6Anjengemizila yamalala,

lamasimu ngasemfuleni,

anjengezinhlaba ezihlanyelweyo yiNkosi,

lezihlahla zomkusu ngasemanzini!

7Amanzi azakugeleza evela embizeni zakhe,

inhlanyelo yakhe ibe semanzini amanengi;

inkosi yakhe izakuba nkulu kuloAgagi,

lombuso wakhe uphakame.

8UNkulunkulu wamkhupha eGibithe,

kubo ulamandla njengenyathi;

uzakudla izizwe, izitha zakhe,

afohloze amathambo azo, abe yizicucu,

azigwaze ngemikhonto yakhe.

9Waqutha, walala phansi njengesilwane, njengesilwane esisikazi;

ngubani olesibindi sokumvusa na?

Kababusiswe bonke abakubusisayo,

baqalekiswe bonke abakuqalekisayo!

10UBalaki wamthukuthelela uBalami, waqakeza izandla zakhe, wathi kuBalami: Ngikubize ukuba uqalekise izitha zami, kodwa uzibusisile kathathu.

11Ngakhoke hamba wena, uye endaweni yakho. Bengisithi ngizakukunika udumo, kodwa iNkosi ikwamukile udumo lwakho.

12UBalami wathi kuBalaki: Kangizitshelanga izigijimi zakho yini ngathi:

13Lanxa uBalaki ebezakungipha indlu yakhe igcwele isiliva legolide, bengingayikweqa ilizwi leNkosi, ngenze okwami; lokuthi lokho iNkosi ekutshoyo kayisikho engizakukhuluma na?

14Khangela, ngiyabuyela kwabakithi; woza ngikutshele ukuthi lababantu bazakwenzani ebantwini bakini ensukwini ezizayo.

15Waseqala ukuhuba ihubo lakhe wathi:

Nanti ilizwi likaBalami indodana kaBeyori,

ilizwi lomuntu olamehlo avulekileyo,

16ilizwi lozwayo amazwi kaNkulunkulu,

owazi ulwazi loPhezukonke,

obonayo umbono ovela kuSomandla,

ozuza ilizwi, kuvuleke amehlo akhe.

17Lona lithi: Ngiyambona, kodwa kungekhathesi,

ngiyambona, kodwa kungeseduze;

inkanyezi izakuvela kuJakobe,

lentonga yobukhosi izakuvuka koIsrayeli,

ichoboze ikhanda likaMowabi,

lenkakhayi zawo wonke amadodana kaShethi.

18UEdoma uzakunqotshwa,

loSeyiri unqotshwe njalo.

Kodwa uIsrayeli uyaphumelela,

19loJakobe unqoba izitha zakhe,

achithe abaseleyo eAri.

20Wasemkhangela uAmaleki, waqala ukuhuba ihubo lakhe ngokuthi:

UAmaleki wayengowokuqala phakathi kwezizwe,

kodwa ngasekucineni uzakuchitheka aphele nya.

21Wasekhangela amaKeni, waqala ukuhuba ihubo lakhe wathi:

Indlu yenu iqinile,

isidleke senu sisedwaleni.

22Kanti wena Kayini uzakuchithwa; koze kube nini uthunjwe nguAshuri?

23Waqala futhi ukuhuba ihubo lakhe wathi:

Ngobani ababuthana eningizimu na?

24Imikolo izakuvela eKitimi,

ichithe uAshuri loEberi;

laye uzakuchitheka aphele nya.

25UBalami wasesuka, wahamba wabuyela endaweni yakhe; loBalaki wahamba ngeyakhe indlela.