1 Kor 16 - Ndebele Bible (iBhayibhili Elingcwele) 1978

Ukunikelelwa kwamakholwa

1Mayelana lomnikelo obuthelwa abangcwele, njengoba ngalaya amabandla aseGalathiya, yenzani njaloke lani.Roma 15:25, 26

2Ngosuku lokuqala lweviki kakube yilowo lalowo azibekele aqogelele njengokuzuza kwakhe, ukuze kuthi nxa ngifikayo, kungabi yisikhathi sokubuthwa komnikelo.

3Ekufikeni kwami labo elibakhethileyo ngizakubathuma bephethe izincwadi, ukuba bese iziphiwo zenu eJerusalema.

4Uba kufanele ukuba lami ngihambe, ngizakuhamba labo.

Uhambo lukaPawuli

5Ngizakuza kini nxa sengidabule eMakedoniya; ngoba ngizimisele ukudabula eMakedoniya;Seb 19:21

6ngingahle ngihlale lani isikhathi, loba ngiqede ubusika ngakini, ukuze lingidlulisele lapho ngiya khona.

7Ngoba kangifisi ukulibona khathesinje nxa ngidlulayo; ngithemba ukuhlala lani isikhathi, uba iNkosi ivuma.

8Kodwa ngizakuhlala eEfesu, kuze kufike iPentekoste;Seb 19:8–10 Levi 23:15–21; Dute 16:9–11

9ngoba ngivulelwe umnyango omkhulu wethuba lokusebenza; labamelene lami banengi.

10Nxa uTimothi efika, kalibobona ukuthi uhlala lani engesabi lutho, ngoba usebenza umsebenzi weNkosi njengami.1 Kor 4:17

11Ngakhoke kakungabi khona omdelelayo. Mdluliseni kuhle ekuhambeni kwakhe ukuba eze kimi; ngoba ngimlindele kanye labazalwane.

12Mayelana lomzalwane uApolosi, ngamkhuthaza kakhulu ukuba eze kini kanye labanye abazalwane; kodwa kwakungesiyo intando kaNkulunkulu ukuba eze khathesi; uzakuza nxa eselethuba.

13Lindani, lime ekukholweni kwenu, libe lesibindi, libe lamandla.

14Konke elikwenzayo kakwenziwe ngothando.

15Bazalwane, liyayazi indlu kaStefana ukuthi iyingqabutho yaseAkaya ekukholweni, lokuthi bazimisele ukukhonza abangcwele;1 Kor 1:16

16ngiyalincenga ukuba lizehlisele ngaphansi kwabanjalo labo bonke abasebenza kanye labo.

17Ngiyathokoza ngokufika kukaStefana loFortunatu loAkayiko, ngoba bagcwalisile lokho obekusilele ngakini;

18bawuvuselele umoya wami kanye lowenu. Ngakhoke bahlonipheni abanjalo.

Isicino

19Amabandla aseAsiya ayalibingelela; uAkwila loPriska kanye lebandla elisemzini wabo, bayalibingelela kakhulu eNkosini.Seb 18:2

20Bonke abazalwane bayalibingelela. Bingelelanani ngokwangana okungcwele.

21Mina Pawuli ngiyaloba lokhukubingelela ngesami isandla.

22Uba umuntu engayithandi iNkosi, kabe ngothukiweyo. Woza, Nkosi yethu!

23Umusa weNkosi yethu uJesu Kristu kawube lani.

24Lothando lwami lube lani lonke kuKristu Jesu. Ameni.