Jobe 24 - Ndebele Bible (iBhayibhili Elingcwele) 1978

UJobe usola ukuthi uNkulunkulu kananzi ububi

1Kungani uSomandla engazimiseli izikhathi zokuthonisisa na?

Kungani labo abamaziyo bengazazi lezozikhathi na?

2Abantu bayathuthukisa imingcele,

bathumbe imihlambi labelusi.

3Bayaxotsha ubabhemi wentandane,

bathathe inkabi yomfelwakazi ibe yisibambiso.

4Baxotsha abayanga emigwaqweni;

bonke abayanga bomhlaba bayacatsha.

5Njengobabhemi beganga enkangala abayanga bayaphumela emisebenzini yabo,

badinge impango enkangala ibe yikudla kwabantwana babo.

6Emasimini bazibuthela ukudla kwenkomo,

badobhe okuseleyo esivinini somubi.

7Balala beze ubusuku bonke, bengambathanga,

bengelalutho lokuvikela umqando.

8Bamanzi ngezihlambo zasezintabeni,

babambelela edwaleni ngoba bengelandawo yokucatsha.

9Intandane zihluthunwa ebeleni,

lengane yomyanga ithathwa ibe yisibambiso.

10Bahamba beze bengagqokanga,

bathwala izithungo belambile;

11bahluza izithelo zezihlahla zeoliva ukuba bazuze amafutha,

banyathela isikhamelo sewayini,

kodwa bona uqobo babulawa ngumhawu.

12Phakathi komuzi kuyezwakala ukukhala kwabafayo,

abalimeleyo bayakhalela ukusizwa;

kodwa uNkulunkulu kananzi ukukhuleka kwabo.

13Bakhona abangakuthandiyo ukukhanya,

abangazijwayelanga indlela zakho,

abaxwaya imikhondo yakho.

14Umbulali uyavuka emadabukakusa ukuba abulale umyanga loswelayo;

ebusuku uyeba.

15Isiphingi laso siyalindela ukuhlwa,

sisithe ubuso baso;

sisithi: Kakho ozangibona.

16Abanye bafohlela endlini sekumnyama,

bazivalele emini,

kabakuthandi ukukhanya.

17Ngoba kubo bonke umnyama omkhulu unjengokusa,

ngoba bejwayelene lomnyama owesabekayo.

18Abantu abanje bayizikhukhula ezimuka lamanzi;

amasimu abo alebizo elibi elizweni lonke,

kakulasisebenzi esizasondela ezivinini zabo.

19Njengoba ukubalela lokutshisa kumqeda ungqoqwane,

ngokunjalo amanzi asendaweni yabafileyo ayasiqeda isoni.

20Unina kasayikumkhumbula, lempethu izakumdla aphele nya,

kasayikukhunjulwa kuze kube nininini.

21Bacindezela inyumba engazaliyo,

kabamenzeli okuhle umfelwakazi.

22Kanti uNkulunkulu ngamandla akhe uyabakhukhula abalamandla,

bangavuka, kodwa kabalathemba lokuphila.

23Uyabanika ukulondolozwa lokusekelwa,

kodwa amehlo akhe aphezu kwendlela zabo.

24Bayaphakanyiswa okwesikhatshana, besebedlula,

bayabuna baphele njengeluba,

bayaqunywa njengezihloko zamabele.

25Uba kungenjalo, ngubani ongangenza ngibe ngolamanga na?

Ngubani ongatshengisa ukuthi amazwi ami ayize na?