Zaga 22 - Ndebele Bible (iBhayibhili Elingcwele) 1978

1Kungcono ukuba lebizo elihle kulenotho enengi,

lokuhlonitshwa kungcono kulesiliva legolide.

2Abanothileyo labayanga bayafanana kulokhu

ukuthi iNkosi yabenza bonke.

3Olengqondo ehlakaniphileyo nxa ebona ingozi isiza uyacatsha,

kodwa ongelalwazi uqonda kuyo ahlupheke.

4Umvuzo wokuthobeka uyikwesaba iNkosi

kanye lenotho lodumo lokuphila.

5Kukhona amagodi lemijibila endleleni yongaqondanga;

olimukayo uzakukunqwetha.

6Khulisa umntwana ukuba ahambe ngendlela elungileyo;

lapho esekhulile kayikuphambuka kuyo.

7Abanothileyo babusa abayanga,

umeboleki uyisigqili somebolekisi.

8Ohlanyela okubi uzavuna ukuhlupheka,

umkhwezeli uzatshiswa yisikhuni.

9Olomusa uzabusiswa, ngoba esabela umyanga ukudla.

10Xotsha isideleli, kuzaphuma lenkani,

kuphele ukuxabana lokuthuka.

11INkosi ithanda umuntu oqotho;

kodwa abantu bangaba ngabangane bamakhosi ngamazwi amahle.

12INkosi iyabagcina abalungileyo,

kodwa ichitha amazwi abaqamba amanga.

13Olivila uthi: Kukhona isilwane ngaphandle

esizangibulala uba ngiphumela khona.

14Amazwi esifebe anjengomgodi otshonayo;

labo abathukuthelelwa yiNkosi bazawela kuwo.

15Ubuthutha bunamathele enhliziyweni yomntwana;

ukumtshaya ngoswazi kuyabususa kuye.

16Lowo ocindezela abayanga ukuba anothe,

lopha abanothileyo uzakuba ngumyanga.

Izigaba ezingamatshumi amathathu zamazwi ahlakaniphileyo

17Nanka amazwi abantu abahlakaniphileyo.

Lalela uzwe amazwi ami,

usebenzise ingqondo yakho ukuba uwazi;

18ngoba uzathokoza uba uwalondoloza enhliziyweni yakho,

uba ungawatsho ngomlomo wakho,

19ukuze uthembe iNkosi,

ngakho sengikutshela wona lamuhla.

20Ngikulobele izigaba zamazwi ezingamatshumi amathathu

ezilokwazi lezeluleko,

21ukuba zikufundise ukwazi iqiniso,

ukuze ubuyele lempendulo elungileyo kwabakucelayo.

22Ungamphangi umyanga ngoba engumyanga nje,

ungamcindezeli enkundleni ohluphekayo;

23ngoba iNkosi izakumela indaba yabo,

ichithe ukuphila kwababachithayo.

24Ungabi ngumngane womuntu ololaka,

ungahambi lomuntu othukuthelayo,

25funa ufunde indlela zakhe, uwele emjibileni.

26Ungathembisi izithembiso,

uzenze ube yisibambiso semilandu yomunye.

27Uba wehluleka ukuhlawula,

uzathathelwa lombheda wakho.

28Ungasusi isikhonkwane esidala samasimu,

esamiswa ngabokhokho bakho.

29Uyambona oyingcitshi yomsebenzi na?

Uzasebenzela amakhosi,

kayikusebenzeli abantukazana.