Isa 2 - Ndebele Bible (iBhayibhili Elingcwele) 1978

Isithembiso sokuthula

1Leli yilizwi likaIsaya indodana kaAmozi aliboniswa ngoJuda langeJerusalema.

2Kuzakuthi ensukwini ezizayo intaba yendlu yeNkosi

iphakanyiswe phezu kwazo zonke intaba, yengame wonke amaqaqa;

zonke izizwe zizabekelela ziye kuyo,

3labantu abanengi bazakuza bathi:

Wozani sikhwele entabeni yeNkosi;

siye endlini kaNkulunkulu kaJakobe,

ukuba asifundise indlela zakhe,

ukuze sihambe endleleni zakhe.

Ngoba kuzakuphuma umlayo eZiyone,

lelizwi leNkosi eJerusalema.

4Izakwahlulela phakathi kwezizwe, iqumele abantu abanengi;

bazakukhanda imihedla yabo ibe yimilomo yamakhuba,

lemikhonto yabo ibe zingqamu zokuthena izihlahla;

isizwe kasiyikuphakamisela isizwe umkhonto,

kasisayikufunda ukulwa futhi.

5Wena ndlu kaJakobe, wozani sihambe ekukhanyeni kweNkosi.

Ukwahlulelwa kwabazikhukhumezayo

6INkosi ibalahlile abantu bayo abendlu kaJakobe,

ngoba ilizwe labo ligcwele abalumbi basempumalanga,

lezanuse njengamaFilistiya, bahlangane labezizwe.

7Ilizwe labo ligcwele isiliva legolide,

lenotho yabo kayipheli;

ilizwe labo ligcwele amabhiza,

lenqola zabo zokulwa kazipheli.

8Ilizwe labo ligcwele izithombe;

bakhuleka emisebenzini yezandla zabo,

lakukho okwenziwe yiminwe yabo.

9Ngakho abantu bonke bazakwehliselwa phansi, bathotshiswe;

ungabathetheleli, Nkosi.

10Ngenani ezimbalwini,

licatshele emihomeni ukwesabeka kweNkosi, lodumo, lobukhosi bayo.

11Abantu abaziphakamisayo bazakwehliselwa phansi,

lokuzikhukhumeza kwabantu kuzakuthotshiswa,

kuphakame iNkosi kuphela ngalolosuku.

12Ngoba iNkosi yamabandla ilosuku elulindisele konke okuzigqajayo lokuzikhukhumezayo,

lakho konke okuziphakamisayo lokuphakemeyo,

13lazo zonke izihlahla zomkusu zaseLebanoni ezinde leziphakemeyo,

lazo zonke izihlahla ezinkulu zaseBashani,

14lazo zonke intaba ezinde, lamaqaqa wonke aphakemeyo,

15layo yonke imiphotshongo ephakemeyo, lezinqaba eziqinisiweyo,

16layo yonke imikolo emikhulu.

17Ukuziphakamisa kwabantu kuzakwehliselwa phansi,

lokuzikhukhumeza kwabantu kuzathotshiswa,

kuphakame iNkosi kuphela ngalolusuku.

18Izithombe zizaphela zithi nya.

19Abantu bazangena ezimbalwini zamadwala lasemihomeni yomhlaba,

ngenxa yokwesaba iNkosi langenxa yodumo lobukhosi bayo,

lapho ivuka ukunyikinya umhlaba.

20Ngalolosuku abantu bazakulahlela emagundwaneni lakubolulwane

izithombe zabo zesiliva lezegolide abazenzela zona ukuba bakhuleke kuzo,

21ukuze bangene embalwini zamadwala lezingoxweni zamawa,

ngenxa yokwesaba iNkosi langenxa yodumo lobukhosi bayo,

lapho ivuka ukunyikinya umhlaba.

22Lingathembi umuntu okuphila kwakhe kungumphefumulo nje.

Ngoba uyini yena na?