Isa 5 - Ndebele Bible (iBhayibhili Elingcwele) 1978

Umfanekiso wesivini

1Kengihlabele ngothandiweyo wami,

ingoma yothando ngesivini sakhe.

Othandiweyo wami wayelesivini oqaqeni oluvundileyo.

2Wasimba, wakhupha amatshe kiso, wahlanyela ivini elihle;

wakha idumba lokulinda phakathi kwaso,

wemba isikhamelo sewayini kiso;

wathemba ukuba sizathela izithelo ezinhle,

kodwa sathela izithelo ezibabayo.

3Ngakho uthi: Lina baseJerusalema, lani bantu bakoJuda,

ake lahlulele phakathi kwami lesivini sami.

4Ngabe kwenziwani esivinini sami engingakwenzanga na?

Kungani ukuba lapho ngithembe ukuthi sizathela izithelo ezinhle,

sathela izithelo ezibabayo na?

5Sengizakulitshela engizakukwenza esivinini sami.

Ngizakuqhaqha uthango lwaso ukuze sidliwe,

ngidilize umduli waso ukuze sigxotshwe.

6Ngizasenza sibe liganga,

singathenwa, singahlakulwa, simile ameva lokhula.

Ngizalaya amayezi ukuba angasinethisi ngezulu.

7UIsrayeli uyisivini seNkosi yamabandla,

labantu bakoJuda bayisithombo sayo esihle.

Yayilindele okufaneleyo, kodwa kwaba khona ukubulalana;

yalindela ukulunga, kodwa kwaba khona ukukhala.

Amazwi okwahlulela ababi

8Maye kulabo abathenga izindlu ngezindlu lamazwe ngamazwe,

indawo yonke ibe ngeyabo,

lisale lina lihlala lodwa phakathi kwelizwe!

9INkosi yamabandla ngiyizwile ifunga isithi:

Impela izindlu ezinengi zizakuba ngamanxiwa,

izindlu ezinkulu lezinhle zisale zingaselamuntu.

10Ngoba indima ezinhlanu zevini zizathela itanka elilodwa nje,

lehomeri lenhlanyelo lithele ihefa nje lamabele.

11Maye kulabo abavuka ekuseni ukuba bayenatha utshwala,

banathe kuze kuhlwe, baze badakwe!

12Batshaye umhubhe lechacho, isigubhu lomhlanga,

banathe iwayini emadilini abo,

kodwa bengananzi izenzo zeNkosi,

bengaboni lemisebenzi yezandla zayo.

13Ngakhoke abantu bami bazathunjwa bengananzelele,

labadumileyo babo besifa indlala,

labantu bonke besifa yikoma.

14Ngakhoke indawo yabafileyo inabulule umphimbo wayo,

yavula umlomo wayo waba banzi ukuginya izikhulu eziseJerusalema,

labantu balo abaxokozelayo ngokuthaba.

15Abantu behliselwa phansi, bathotshiswe,

labazikhukhumezayo bayathotshiswa.

16Kodwa iNkosi yamabandla iphakanyisiwe ngokwenza okufaneleyo,

uNkulunkulu oNgcwele ubonakalisa ubungcwele bakhe ngokulunga.

17Amawundlu azakudla kungathi asemadlelweni awo,

lamazinyane adle emanxiweni.

18Maye kulabo abadonsa ububi njengemvu ekhungiweyo,

abadonsa izono njengenqola!

19besithi: UNkulunkulu kaphangise ukwenza umsebenzi wakhe ukuze siwubone;

icebo loNgcwele kaIsrayeli kalibonakale ukuze silazi.

20Maye kulabo abathi okubi kuhle, lokuhle kubi,

ababeka umnyama esikhundleni sokukhanya, lokukhanya esikhundleni somnyama,

abathi okubabayo kumnandi, lokumnandi kuyababa!

21Maye kulabo abazibona behlakaniphile,

bezibona beqondile!

22Maye kulabo abangamaqhawe okunatha utshwala,

lakulabo abalamandla okubupheka,

23abayekela abalamacala ngenxa yomvuzo,

bathathele abangelacala ilungelo labo!

24Ngakhoke njengalokhu umlilo utshisa amabibi,

lelangabi litshisa utshani obomileyo,

ngokunjalo impande yabo izakubola,

lempoko yabo iphephuke njengothuli;

ngoba bawalile umlayo weNkosi yamabandla,

balidelela ilizwi loNgcwele kaIsrayeli.

25Ngakhoke iNkosi ibathukuthelele abantu bayo,

yelula isandla sayo yabatshaya;

izintaba zizakuzamazama,

lezidumbu zabo zibe yingcekeza ezindleleni.

Kukho konke lokhu ukuthukuthela kwayo kakukapheli,

isiphakamisile isandla sayo ukutshaya futhi.

26Izakusiphakamisela uphawu isizwe esikhatshana,

isitshayele ikhwelo sisekucineni komhlaba;

sizakuza masinyane ngejubane.

27Kakho ozakudinwa akhubeke kuso,

kakho ozakuwozela alale;

amabhanti abo okhalo kawayikuthukuluka,

lemichilo yamanyathelo abo kayiyikuqamuka;

28imitshoko yabo ibukhali,

lamadandili awo wonke agotshiwe,

amangqina amabhiza abo alukhuni njengelitshe,

lamavili enqola zokulwa agijima njengesivunguzane.

29Bazabhonga njengesilwane,

lanjengemidlwane yesilwane;

babhavume babambe impango yabo,

babaleke layo, kungabi khona obemukayo.

30Bazayibhavumela ngalolosuku, badume njengolwandle.

Uba umuntu ekhangela emhlabeni, uzabona umnyama losizi,

lokukhanya kwenziwe kwaba mnyama ngamayezi.