Isa 22 - Ndebele Bible (iBhayibhili Elingcwele) 1978

Ilizwi ngeJerusalema

1Leli yilizwi ngesiGodi soMbono.

Kutheni pho, ukuba likhwele lonke phezu kwezindlu,

2wena muzi ogcwele ukumemeza lokuxokozela lokuthokoza na?

Ababuleweyo bakho kababulawanga ngomkhonto,

kabafelanga empini.

3Ababusi bakho bonke babalekile,

bengakatshoki umtshoko;

labangamaqhawe bakho babanjwa

lanxa bebalekele khatshana.

4Ngakhoke ngasengisithi:

Ungangikhangeli, ngiyekela ngikhale;

ungazami ukungiduduza ngenxa yokuchitheka kwabantu bakithi.

5Ngoba iNkosi uNkulunkulu wamabandla imise usuku lokukhathazeka,

lokunyathelwa phansi lokuphithizela esiGodini soMbono;

imiduli idilizelwe phansi,

lokuhlaba umkhosi kuzwakala ezintubeni.

6IElamu lathatha izikhali zalo,

lafika likhwele amabhiza alo;

leKiri lathatha isihlangu salo.

7Izigodi zakho ezinhle zagcwala inqola zokulwa,

labagadi bamabhiza bazihlela emasangweni akho, Jerusalema.

8Izivikelo zakoJuda zasuswa.

Ngalolosuku lakhangela izikhali eziseNdlini yehlathi.

9Labona ukuba izikhala zazizinengi emidulini yomuzi kaDavida;

lakha amanzi echibini langaphansi.

10Labala izindlu zaseJerusalema,

lazidiliza ukuze liqinise ngazo umduli.

11Lenzela amanzi echibi elidala umgodi phakathi kwemiduli emibili.

Kodwa kalikhangelanga kuNkulunkulu owakwenzayo,

kalimnanzanga owakumisa kudala.

12Ngalolosuku iNkosi uNkulunkulu wamabandla yalibizela ukuba likhale lilile,

liphuce amakhanda, ligqoke izambatho zokulila;

13kanti kwakukhona ukujabula lokuthaba,

ukuhlatshwa kwenkomo lezimvu,

lokudliwa kwenyama, lokunathwa kwewayini;

lathi: Asidleni sinathe, ngoba kusasa sizakufa.

14INkosi yamabandla yanginyenyezela yathi:

Impela kaliyikusithethelelwa lesisono lize life,

kutsho iNkosi uNkulunkulu wamabandla.

UEliyakimi uzathatha isikhundla sikaShebina

15INkosi uNkulunkulu wamabandla yathi kimi: Hamba uye enduneni uShebina, umphathi wesigodlo, uthi kuye:

16Wenzani lapha, futhi ulelungelo bani, ukuba uzimbele ingcwaba wena ozimbela ingcwaba phezulu, ozimbela indawo yokuhlala edwaleni na?

17Ngoba iNkosi izakukujikijela khatshana, wena muntu olamandla; izakukubamba ikuqinise,

18ikuzunguze, ikuphose njengegade elizweni elibanzi, ufele khona; kuzakuba khona lapho lezinqola zakho ezinhle, wena olihlazo endlini yenkosi yakho!

19INkosi izakukukhupha esikhundleni sakho, ikuwise endaweni yakho ephakemeyo.

20Ngalolosuku, kutsho iNkosi, ngizabiza inceku yami uEliyakimi indodana kaHilikiya;

21ngizakumambathisa ingubo yakho, ngimbophe ngebhanti lakho, nginikeze amandla akho kuye; yena uzakuba nguyise wabantu abaseJerusalema labakoJuda.

22Ngizabeka emahlombe akhe ikhiye yendlu kaDavida; yena uzavula, kungavali muntu, avale, kungavuli muntu.Isam 3:7

23Ngizakumbethela abe njengesikhonkwane esiqinileyo; uzakuba yisihlalo sobukhosi esilodumo endlini kayise.

24Bazamethwesa lonke udumo lwendlu kayise, inzalo labantwana bayo, zonke izitsha ezincinyane, inkezo lezinkamba.

25Ngalolosuku, kutsho iNkosi yamabandla, isikhonkwane esabethelwa saqina sizakhumuka, saphuke siwe; lomthwalo obuphezu kwaso udilike; ngoba iNkosi ikhulumile.