Hubo 27 - Ndebele Bible (iBhayibhili Elingcwele) 1978

INkosi iyikukhanya kwami lokukhululwa kwami

1INkosi iyikukhanya kwami lokukhululwa kwami;

ngizakwesaba bani na?

INkosi iyinqaba yokuphila kwami;

ngizakwesaba bani na?

2Lapho ababi bengihlasela,

befisa ukungibulala,

abamelana lami lezitha zami

bazakhubeka bawe.

3Loba impi ingivimbezela,

inhliziyo yami kayiyikwesaba;

loba ngivelelwa yikulwa,

ngizakuba lesibindi.

4Into yinye engiyicela eNkosini engizakuyifunisisa,

yikuba ngihlale endlini yeNkosi

insuku zonke zokuphila kwami,

ukuba ngibone ubuhle beNkosi,

ngibuke ithempeli layo.

5Izakungithukuza edumbeni layo ngosuku lokuhlupheka,

ingifihle ekusithekeni kwethente layo,

ingibeke phezu kwedwala.

6Ngizaliphakamisela ikhanda lami

ngaphezu kwezitha zami ezingihanqileyo;

ngizakunikela iminikelo yokuthaba ethenteni layo,

ngizakuhlabela ngidumise iNkosi.

7Zwana, Nkosi, lapho ngikhalayo,

ngihawukela, ungiphendule.

8Wena uthe: Funani ubuso bami.

Inhliziyo yami ithi kuwe:

Ubuso bakho, Nkosi, ngizakubufuna.

9Ungangifihleli ubuso bakho.

Ungayixotshi inceku yakho ngokuthukuthela,

wena obulusizo lwami,

ungangixotshi, ungangitshiyi,

Nkulunkulu wokukhululwa kwami.

10Lapho umama lobaba bengitshiya,

iNkosi izakungilondoloza.

11Ngifundisa indlela yakho, Nkosi,

ungihole endleleni ekhanyayo ngenxa yezitha zami.

12Unganginikeli ezitheni zami,

ngoba ofakazi bamanga bangivukele,

bavutha ulaka.

13Ngithemba ukuthi ngizakubona okuhle kweNkosi

ngiseselizweni labaphilayo.

14Themba iNkosi, uqine, inhliziyo yakho ime isibindi,

yebo, themba iNkosi.