Jobe 42 - Ndebele Bible (iBhayibhili Elingcwele) 1978

UJobe uyazithoba

1UJobe waseyiphendula iNkosi esithi:

2Ngiyazi ukuthi ungazenza zonke izinto,

lokuthi kakulacebo lakho elingavinjelwa.

3Ngikhulumile lokho engingakuqedisisiyo,

izinto ezimangalisayo engingazaziyo.

4Ake ungizwe, ngikhulume lami.

Ngizakukubuza, lawe ungiphendule.

5Bengikuzwa ngendaba,

kodwa khathesi amehlo ami asekubona.

6Ngakhoke sengizisola,

ngiyaphenduka ngihlale othulini lasemlotheni.

7Kwathi iNkosi isikhulume lamazwi kuJobe, yathi kuElifazi waseTemani: Ngiyakuthukuthelela wena kanye labangane bakho ababili, ngoba kalikhulumanga ngami okuqondileyo njengenceku yami uJobe.

8Ngakhoke thatha inkunzi eziyisikhombisa lenqama eziyisikhombisa, uye encekwini yami uJobe, linikele ngazo zibe ngumnikelo wokutshiswa; inceku yami uJobe izalikhulekela, ngoba ngizakuzwa umkhuleko wakhe ngingenzi kini njengobuthutha benu; ngoba kalikhulumanga ngami okuqondileyo njengenceku yami uJobe.

9Ngakho uElifazi waseTemani loBilidadi waseShuhi loZofari waseNama, basuka benza njengokutsho kweNkosi; leNkosi yawuzwa umkhuleko kaJobe.

Ukubusiswa kukaJobe

10INkosi yabuya yamphumelelisa uJobe lapho esekhulekele abangane bakhe, yamnika okuphindwe kabili kulokho ayelakho kuqala.Jobe 1:1–3

11Kwasekufika kuye bonke abafowabo labo bonke odadewabo, labo bonke ababesazana laye ngaphambili, badla laye endlini yakhe; bamkhalela, bamduduza ngakho konke okubi iNkosi eyayimehlisele khona. Bonke bamnika imali lesongo legolide.

12INkosi yazibusisa insuku zokucina zikaJobe kulezakuqala. Waba lezimvu ezizinkulungwane ezilitshumi lane, lamakamela azinkulungwane eziyisithupha, lenkabi ezizinkulungwane, lobabhemi abasikazi abayinkulungwane.

13Waba lamadodana ayisikhombisa lamadodakazi amathathu.

14Eyokuqala wayitha ibizo wathi nguJemima, eyesibili wayitha ibizo elithiwa nguKeziya, leyesithathu wayitha ibizo elithiwa nguKerenihapuki.

15Elizweni lonke kwakungekho abesifazana abahle njengamadodakazi kaJobe; uyise wawanika ilifa kanye labanewabo.

16Emva kwalokho uJobe wahlala iminyaka elikhulu lamatshumi amane; wabona amadodana akhe, lamadodana amadodana akhe, kwaze kwaba yizizukulwana ezine.

17Wafa uJobe esemdala, eseluphele.