Hubo 144 - Ndebele Bible (iBhayibhili Elingcwele) 1978

Ukunqoba lokuphumelela kuvela eNkosini

1Kayibongwe iNkosi, idwala lami,

yona efundisa izandla zami ukuhlasela,

leminwe yami ukulwa,

2idwala lami lenqaba yami,

umphotshongo wami ophakemeyo lomkhululi wami,

isihlangu sami, lengiphephela kuyo,

ebeka izizwe ngaphansi kwami.

3Nkosi, umuntu uyini ukuba umnanze,

lendodana yomuntu ukuba ucabange ngayo na?

4Umuntu unjengomoya,

insuku zakhe zinjengesithunzi esidlulayo.

5Khothamisa amazulu akho, Nkosi, wehlele phansi.

Thinta izintaba zithunqe.

6Phazimisa imibane yakho uzichithe izitha zakho,

uthumele imitshoko yakho izihlakaze.

7Yelula isandla sakho uphezulu,

ungophule ungikhulule emanzini amanengi,

lasesandleni sabezizwe,

8abamilomo yabo ikhuluma amanga,

abasandla sabo sokunene siyisandla senkohliso.

9Ngizakuhlabela kuwe ingoma entsha, Nkulunkulu;

ngizakukutshayela ichacho elilentambo ezilitshumi,

10wena onika amakhosi ukunqoba,

owophula inceku yakho uDavida.

11Ngophula emhedleni olesihluku,

ungikhulule esandleni sabezizwe

abamilomo yabo ikhuluma amanga,

abasandla sabo sokunene siyisandla senkohliso.

12Kungathi amadodana ethu ebutsheni bawo

angaba njengezihlahla esezikhulile,

lamadodakazi ethu abe njengensika zengonsi

ezilungiselwe ukwakha isigodlo!

13Kungathi iziphala zethu zingagcwala

zibe lenhlobo zonke zokudla,

lezimvu zethu zizale izinkulungwane,

yebo, lezinkulungwane ezilitshumi emagangeni ethu!

14Kungathi inkomo zethu zingaba lamankonyane amanengi,

zingaphunzi ekuzaleni kwazo,

kungabi khona ukukhala endleleni zethu!

15Babusisiwe abantu abanjalo;

babusisiwe abantu abaNkulunkulu wabo yiNkosi.