kuFilimoni 1 - Ndebele Bible (iBhayibhili Elingcwele) 1978

Isibingelelo

1UPawuli, isibotshwa sikaKristu Jesu, loTimothi umzalwane wethu sithi kuFilimoni, isisebenzi kanye lathi esithandekayo,

2lakuApifiya udadewethu, lakuArkipho owebutho kanye lathi, lakulo ibandla elisendlini yakho:Kol 4:17

3Kakube kini umusa lokuthula okuvela kuNkulunkulu uBaba laseNkosini uJesu Kristu.

UPawuli ubabaza ukukholwa kukaFilimoni

4Ngiyambonga uNkulunkulu wami ngezikhathi zonke ekukukhumbuleni kwami emikhulekweni yami,

5lapho ngisizwa ngothando lwakho langokukholwa olakho eNkosini uJesu lakubo bonke abangcwele.

6Ngikhulekela ukuba ukuhlanganyela kwakho kanye lathi ekukholweni kwethu kwandise ukwazi kwakho konke okuhle okungokwethu kuKristu.

7Uthando lwakho, mzalwane, lunginike ukuthokoza okukhulu lokududuzeka, ngoba inhliziyo zabantu bakaNkulunkulu zihlunyelelisiwe ngawe.

UPawuli ukhuluma ngoOnesimo

8Ngalokhoke ngilesibindi esikhulu kuKristu sokuba ngikulaye ukuba wenze lokho okufunekayo,

9kanti ngenxa yothando kungcono ukukuncenga, njengoba nginje mina Pawuli oyisithunywa, esengiyisibotshwa futhi ngenxa kaKristu Jesu.

10Ngiyakuncenga ngomntanami engimzeleyo ekubotshweni kwami, uOnesimo;Kol 4:9

11kade engelasizo kuwe, kodwa khathesi ulosizo impela kuwe lakimi.

12Ngiyambuyisela kuwe ngokungathi ngibuyisela inhliziyo yami uqobo.

13Bengifisa ukumbamba ahlale lami, ukuze angisebenzele esikhundleni sakho ngisekubotshweni kwami ngenxa yevangeli.

14Kodwa kangithandanga ukwenza ulutho ngaphandle kwemvumo yakho, ukuze umusa wakho ungabi ngowokubanjwa ngamandla, kodwa ube ngowesihle.

15Mhlawumbe wahlukaniswa lawe okwesikhatshana ukuba abuye abe ngowakho kokuphela,

16angabe esaba yisigqili, kodwa abe ngaphezu kwesigqili, abe ngumzalwane othandekayo, ikakhulu kimi kodwa kakhulu kangakanani kuwe, ebuntwini bakhe laseNkosini.

17Ngakhoke uba usithi ngingumhlanganyeli kanye lawe, mamukele ngokungathi yimi.

18Kodwa uba ekonile ingabe elomlandu kuwe, lokho kubalele kimi.

19Mina Pawuli ngiyakuloba ngesandla sami ngithi ngizakukuhlawula, ngingakuphathike ukuthi lawe ulomlandu kimi onguwe uqobo.

20Yebo, mzalwane, akungenzele lokhu eNkosini, uhlumelelise inhliziyo yami kuKristu.

Isicino

21Ngiloba ngokuthemba ukulalela kwakho, ngisazi ukuthi uzakwenza okungaphezu kwalokho engikutshoyo.

22Futhike ungilungisele lami indawo; ngoba ngiyathemba ukuthi ngemikhuleko yenu uNkulunkulu uzakungibuyisela kini.

23Uyabingelela eEpafra oyisibotshwa kanye lami kuKristu Jesu,Kol 1:7; 4:12

24loMarko, loAristako, loDema, loLuka, izisebenzi kanye lami.Seb 12:12, 25; 13:13; 15:37–39; 19:29; 27:2; Kol 4:10, 14; 2 Tim 4:10, 11

25Umusa weNkosi uJesu Kristu kawube lomoya wenu.