1 Pet 1 - Ndebele Bible (iBhayibhili Elingcwele) 1978

Isibingelelo

1Mina Petro, umphostoli kaJesu Kristu, ngibhalela abahlakazekileyo abasePontusi, laseGalathiya, laseKaphadosiya, laseAsiya, laseBithiniya,

2abakhethiweyo ngokwazi ngaphambili kukaNkulunkulu uBaba, bahlukaniselwa nguMoya ukulalela uJesu Kristu lokufafazwa ngegazi lakhe; ngithi: Kakwandiswe kini umusa lokuthula.

UPetro ubonga uNkulunkulu ngethemba eliphilileyo

3Kabongwe uNkulunkulu uYise weNkosi yethu uJesu Kristu, owasizala kutsha ngesihawu sakhe esikhulu ukuba sibe lethemba eliphilileyo ngokuvuka kukaJesu Kristu kwabafileyo,

4lokuba sibe lelifa elingapheliyo, elingangcolanga, elingabuniyo. Lilondolozelwe lona ezulwini,

5lina elilondolozwe ngamandla kaNkulunkulu ngokukholwa ukuba libe lokusiliswa okulungiselwe ukwambulwa ngesikhathi sokucina.

6Thokozani ngalokhu, lanxa okwesikhatshana lisazakuhlupheka ngezilingo eziyizinhlobonhlobo uba kudingeka,

7ukuze ubuqotho bokukholwa kwenu, okuligugu okwedlula igolide eligugayo loba lihlolwe ngomlilo, bulethe ukubonga lobukhosi lodumo ekwambulweni kukaJesu Kristu.

8Yena liyamthanda lingambonanga, elithi lakhathesi lingamboni likholwe kuye, lithokoze ngentokozo enkulu engakhulumekiyo,

9lizuze umvuzo wokukholwa kwenu oyikusiliswa kwemiphefumulo yenu.

10Abaprofethi abatshumayela ngomusa obuzakuza kini bafunisisa babuzisisa ngalokhukusiliswa.

11Babuza ukuthi yisiphi lokuba sinjani isikhathi esikhonjwa nguMoya kaKristu owayekibo, etshengisa ngaphambili izinhlupheko eziqondene loKristu lobukhosi obuzakuzilandela.

12Bambulelwa ukuthi kabazisebenzeli bona kodwa basebenzela lina, ezintweni eselitshunyayezwe zona ngabalitshumayeze izindaba ezinhle ngoMoya oNgcwele othunywe evela ezulwini, izinto izithunywa ezilangatha ukuzibona.

UPetro ukhuthaza abakholwayo ukuba bahambe ngobungcwele

13Vusani ingqondo zenu, liqonde, lithembe ngokupheleleyo umusa elizakuwamukela ekwambulweni kukaJesu Kristu.

14Njengabantwana abalalelayo lingahambi ngokwenkanuko zenu zakuqala zokungazi kwenu,

15kodwa njengoba owalibizayo engcwele wobani ngcwele lani ekuhambeni kwenu konke,

16njengokulotshiweyo ukuthi: Lizakuba ngcwele ngoba mina ngingcwele.

17Uba likhuleka lisithi Baba kuye owahlulela ilowo lalowo ngokwemisebenzi yakhe engabandlululi, hambani ngokwesaba esikhathini senu liyizihambi emhlabeni.

18Liyazi ukuthi kalihlengwanga ngezinto ezibhubhayo ezinjengesiliva legolide ekuhambeni kwenu okuyize elakwamukela kubokhokho benu;

19kodwa lahlengwa ngegazi likaKristu eliligugu kungathi ligazi lewundlu elingelasici, elingelabala.

20Wamiswa ngaphambili umhlaba ungakabi khona, kodwa wabonakaliswa esikhathini sokucina ngenxa yenu;

21elikholwa kuNkulunkulu ngaye, yena owamvusa kwabafileyo wamnika ubukhosi, ukuze ukukholwa kwenu lethemba lenu libe kuNkulunkulu.

22Ngokulalela iqiniso selihlambulule imiphefumulo yenu ukuthanda abazalwane ngobuqotho; ngakhoke thandanani ngokupheleleyo ngenhliziyo yonke.

23Selizelwe ngokutsha, kungesikho ngenhlanyelo ebolayo, kodwa ngengaboliyo, ngelizwi likaNkulunkulu eliphilayo lelimiyo.

24Ngoba kuthiwa:

Abantu bonke banjengotshani,

lobukhosi babo bonke bunjengamaluba otshani;

utshani buyabuna, lamaluba awohloke,

25kodwa ilizwi leNkosi limi kuze kube nini lanini.

Lelolizwi lilivangeli elalitshunyayezwayo.