Zaga 5 - Ndebele Bible (iBhayibhili Elingcwele) 1978

Isixwayiso esimayelana lobufebe

1Mntanami, lalela ukuhlakanipha kwami,

uzwe ukufundisa kwami,

2ukuba ube lengqondo ehlakaniphileyo,

lomlomo wakho ukhulume ngokwazi.

3Ngoba ulimi lwesifebe lumnandi njengoluju,

lamazwi aso abutshelezi kulamagcobo;

4kodwa ekucineni siyababa njengomhlonyane,

sibukhali njengensingo.

5Inyawo zaso zehlela ekufeni,

lezinyathelo zaso zihamba ngendlela yasendaweni yabafileyo.

6Kasinanzeleli indlela yokuphila;

indlela zaso ziyazulazula, kodwa kasikunanzi.

7Ngalokho, mntanami, ungilalele,

ungaphambuki emazwini ami.

8Ube khatshana laso,

ungasondeli emnyango wendlu yaso,

9funa unikele udumo lwakho kwabanye,

lobudala bakho kwabangelasihawu,

10labezizwe bazitike ngenotho yakho,

lenzuzo zokusebenza kwakho zinikelwe kowezizweni,

11kuze kuthi ekupheleni kokuphila kwakho,

lapho usucakile, ububule,

12uthi: Ngazondelani ukulaywa?

Ngadelelelani ukukhuzwa na?

13Kangizwanga ilizwi labafundisi bami,

kangibalalelanga abangifundisayo.

14Ngaphosa ngaba lehlazo elikhulu emhlanganweni.

15Natha amanzi kowakho umgodi,

amanzi agobhozayo emthonjeni wakho.

16Ungavumeli ukuba imithombo yakho ichithele egangeni,

lezifula zakho zigelezele endleleni zabantu;

17kayibe ngeyakho wena wedwa,

ingabi ngeyabafokazi kanye lawe.

18Yena ongumthombo wakho,

umfazi wobutsha bakho,

kabusiswe; thokoza ngaye,

19oyimpala enhle lembabala ebukekayo;

amabele akhe kawakuthokozise insuku zonke,

ubanjwe luthando lwakhe kokuphela.

20Ubanjelwani, mntanami, luthando lwesifebe,

ugone owesifazana omubi na?

21Ngoba indlela zomuntu ziphambi kweNkosi,

iyaqaphelisa zonke indlela zakhe.

22Omubi uyathiywa ngezakhe izenzo ezimbi,

abanjwe yizono zakhe.

23Uzabhubha ngokuswela ukulaywa,

aqedwe yibubi bakhe obukhulu.