Hez 14 - Ndebele Bible (iBhayibhili Elingcwele) 1978

Abakhonza izithombe bazakutshaywa yiNkosi

1Kwasekufika kimi abadala abathile bakoIsrayeli, bahlala phambi kwami.

2Ilizwi leNkosi lafika kimi lathi:

3Ndoda, lamadoda anikele inhliziyo zawo ezithombeni zawo, athanda ukukhangela izinto ezimbi eziwakhubayo. Ngizavuma ukubuzwa yiwo na?

4Ngakhoke khuluma kuwo uthi: INkosi uNkulunkulu ithi: Bonke abakoIsrayeli abanikela inhliziyo zabo ezithombeni zabo, abathanda ukukhangela izinto ezimbi ezibakhubayo, kodwa beze kumprofethi, mina Nkosi uqobo ngizabaphendula ngenxa yobunengi bezithombe zabo,

5ukuze ngibambe inhliziyo zabakoIsrayeli abehlukene lami ngenxa yezithombe zabo.

6Ngakhoke tshono kuIsrayeli uthi: INkosi uNkulunkulu ithi: Phendukani, lehlukane lezithombe zenu, lidele wonke amanyala enu.

7Ngoba bonke abakoIsrayeli labezizweni abahlala koIsrayeli abazehlukanisa lami, banikela inhliziyo zabo ezithombeni zabo, bethanda ukukhangela izinto ezimbi ezibakhubayo, kodwa beze kumprofethi ukubuza ngami, mina Nkosi uqobo ngizabaphendula.

8Ngizamelana lalabobantu, ngibenze babe yizibonakaliso leziga, ngibakhuphe ebantwini bami; lizakwazi ukuba ngiyiNkosi.

9Uba umprofethi ekhohliseka, akhulume ilizwi, mina Nkosi ngimkhohlisile lowomprofethi; ngizaphakamisela isandla sami, ngimbhubhise phakathi kwabantu bami uIsrayeli.

10Bonke bazatshaywa, umprofethi lomuntu obuzayo, bayona bonke,

11ukuba uIsrayeli angabe esahlukana lami futhi, angabuyi azingcolise ngeziphambeko zabo zonke, kodwa babe ngabantu bami, lami ngibe nguNkulunkulu wabo, kutsho iNkosi uNkulunkulu.

AbaseJerusalema bakufanele ukutshaywa nguNkulunkulu

12Ilizwi leNkosi lafika kimi lathi:

13Ndoda, lapho ilizwe lisona kimi ngokwenza okubi, mina ngizaphakamisela isandla sami kulo, nginciphise ukudla kwalo kwensuku zonke, ngilehlisele indlala, ngiqede kulo abantu lezinyamazana.

14Loba lamadoda amathathu ebehlala khona, uNowa loDaneli loJobe, abezakuzikhulula wona kuphela ngokulunga kwawo, kutsho iNkosi uNkulunkulu.

15Loba ngidlulisa phakathi kwelizwe izilo zeganga, ziliphange, lize libe yinkangala, ukuze kungadluli muntu kilo ngenxa yezilo,

16uba lamadoda amathathu abehlala kilo, ngiyazifunga mina, kutsho iNkosi uNkulunkulu, abengayikukhulula amadodana lamadodakazi awo; wona wodwa abezakuzikhulula, kodwa ilizwe libe yinkangala.

17Uba ngisehlisela ukulwa kulelolizwe ngithi: Impi kayidabule phakathi kwelizwe, iqede kulo abantu lezinyamazana,

18loba lamadoda abehlala khona, ngiyazifunga, kutsho iNkosi uNkulunkulu, abengayikukhulula amadodana lamadodakazi awo, kodwa wona wodwa abezakuzikhulula.

19Uba ngithumela isifo kulelolizwe, ngehlisele ukuthukuthela kwami kulo ngokuchitha igazi, ukuba ngiqede kulo abantu lezinyamazana,

20loba uNowa loDaneli loJobe bebehlala khona, ngiyazifunga, kutsho iNkosi uNkulunkulu, bebengayikukhulula indodana loba indodakazi; kodwa bebezakuzikhulula bona kuphela ngokulunga kwabo.

21INkosi uNkulunkulu ithi: Phoke, kuzakuba njani eJerusalema nxa ngilehlisela lezizehlulelo zami ezine ezibuhlungu, impi, lendlala, lezilo ezimbi, lesifo, ukuba ngiqede kilo abantu lezinyamazana.Isam 6:8

22Abanye bazasala kilo, abasilileyo ukuba bakhutshwe kilo, amadodana lamadodakazi; ubakhangele nxa bephuma besiza kuwe, ubone ukuthi baziphathe kanjani lokuthi benzeni; lokhu kuzakukutshengisa wena ukuthi konke okubi engikwenzileyo eJerusalema kufanele, lakho konke engilehlisele khona.

23Kuzakukutshengisa ukuthi kufanele nxa usubonile ukwenza kwabo lalokho abakwenzileyo, ngoba uzakwazi ukuthi kangikwenzanga lokhu kibo ngaphandle kwesizatho, kutsho iNkosi uNkulunkulu.