Hez 22 - Ndebele Bible (iBhayibhili Elingcwele) 1978

Umuzi wegazi

1Ilizwi leNkosi lafika kimi lathi:

2Wena ndoda, uzawuthonisisa, uwuthonisise umuzi ogcwele igazi na? Wazise zonke izenzo zawo ezenyanyekayo.

3Uzakuthi kuwo: INkosi uNkulunkulu ithi: Maye kumuzi ochitha igazi phakathi kwawo ukuba isikhathi sawo sifike, owenza izithombe ukuzingcolisa.

4Wena ulecala ngegazi olichithileyo, usungcoliswe yizithombe ozenzileyo, ulusondezile eduze usuku lwakho, lesikhathi esimisiweyo seminyaka yakho sifikile. Ngalokho ngikwenzile waba lihlazo ezizweni lenhlekisa emazweni wonke.

5Abaseduze labakhatshana lawe bazakuhleka, wena omubi ogcwele isiphithiphithi.

6Zonke izikhulu zakoIsrayeli ezikuwe zisebenzisa amandla azo ukuchitha igazi.

7Phakathi kwakho abazali benziwa inhlekisa, owezizweni uyacindezela phakathi kwakho, koniwe intandane lomfelwakazi.

13Ngalokhoke ngiyaqakeza izandla zami ngenzuzo yakho yenkohliso oyenzileyo, langegazi ebeliphakathi kwakho.

14Isibindi sakho sizakuma yini, lezandla zakho ziqine, ensukwini engizaphathana lawe kuzo na? Mina Nkosi ngikhulumile, ngizakukwenza.

15Ngizakukuchithachitha phakathi kwezizwe, ngikuhlakazele emazweni, ngiqede ukungcola kwakho konke kuwe.

16Uzangcoliswa phakathi kwezizwe, uzakwazi ukuba ngiyiNkosi.

17Ilizwi leNkosi lafika kimi lathi:

18Ndoda, uIsrayeli wonke usenjengamanyele kimi, wonke ngoluthi lwakhe, unjengamanyele esiliva lethusi lensimbi lomnuso phakathi kwesithando.

19Ngakhoke iNkosi uNkulunkulu ithi: Ngoba lonke selinjengamanyele, ngizalibuthelela phakathi kweJerusalema.

20Njengoba abantu bebuthelela isiliva lethusi lensimbi lomnuso esithandweni somlilo ukuba kufuthwe ngomlilo ukuze kuncibilike, ngokunjaloke ngizalibuthelela ekuthukutheleni kwami lasolakeni lwami, ngilifake phakathi, ngilincibilikise.

21Ngizalibuthelela, ngilifuthe ngomlilo wokuthukuthela kwami, lincibilike phakathi komuzi.

22Njengesiliva sincibilikiswa esithandweni somlilo, ngokunjalo lizancibilikiswa phakathi kwawo. Lizakwazi ukuba mina Nkosi ngehlisele ulaka lwami phezu kwenu.

23Ilizwi leNkosi lafika kimi lathi:

24Ndoda, tshono kilo iJerusalema uthi: Wena uyilizwe elingahlanjululwanga lelinganethwanga ngosuku lwentukuthelo.

25Izikhulu eziphakathi kwalo zifana lezilwane ezibhongayo leziphangayo; zibadlile abantu; zathatha inotho lezinto eziligugu; zenza abanengi baba ngabafelwakazi phakathi kwalo.

26Abapristi balo bawaphule umlayo wami, bangcolisa izinto zami ezingcwele; kabenzanga umahluko phakathi kwezinto ezingcwele lezingangcwele; futhi kabawufundisanga umahluko phakathi kwezinto ezingcolileyo lezingangcolanga, badelile amaSabatha ami; ngangcoliswa phakathi kwabo.Levi 10:10

27Izikhulu eziphakathi kwalo zifana lempisi eziphangayo, ezichitha igazi zibulala abantu, ukuba zizuze umvuzo ngobuqili.

28Abaprofethi balo bayacomba izenzo zazo ngekalaga, babona imibono yamanga, bavumise amanga, besithi: Nanti ilizwi leNkosi uNkulunkulu; yona iNkosi ingakulumanga.

29Abantu belizwe bayaqilibezela, baphange abanye, bahluphe abayanga labaswelayo, bacindezele kakhulu abezizweni.

30Ngadinga umuntu phakathi kwabo ongakha umduli, avimbe esikhaleni phambi kwami, avikele ilizwe ukuba ngingalichithi, kodwa kangifumananga muntu.

31Ngalokho ngehlisele ukuthukuthela kwami phezu kwabo, ngabaqeda ngomlilo wolaka lwami, ngaphindisela indlela yabo kibo, kutsho iNkosi uNkulunkulu.