Isa 57 - Ndebele Bible (iBhayibhili Elingcwele) 1978

1Olungileyo uyabhubha,

kakho olendaba lakho;

abantu abaqotho bayasuswa,

kakho okunanzayo lokho.

Ngenxa yobubi olungileyo uyasuswa,

2ukuba angene ekuthuleni.

Labo abahamba ngobuqotho balele phansi bephumula.

UIsrayeli wonakele

3Sondelani, lina madodana omthakathi,

lina nzalo yesifebe lewule;

4lidlala ngobani na?

likhamisela ubani imilomo yenu, linyalize inlimi zenu na?

Angithi lingabantwana besiphambeko,

lenzalo yenkohliso,

5lina elitsha ngenkanuko phakathi kwezihlala ezinkulu,

ngaphansi kwazo zonke izihlahla eziluhlaza,

elibulalela abantwana benu ezihotsheni,

langaphansi kweminkenke yamawa na?

6Wena omubi, onkulunkulu bakho bangamatshe abutshelezi asesihotsheni;

kiwo uthululele umnikelo wokuthululwa,

waletha lomnikelo wempuphu.

Ngizathokoziswa yilokhu na?

7Phezu kwentaba ende ephakemeyo ubekile umbheda wakho,

wakhwela ukuyanikela khona umhlatshelo.

8Ubekile izithombe zakho ngemva kwesivalo

langemva kwensika yomnyango;

wangilahla, wakhumula izigqoko zakho,

walala embhedeni wakho obanzi

lezithandwa zakho ozithenga ukuba ulale lazo,

ukuze ukholise inkanuko yakho.

9Waziqhola ngamakha, wazigcoba ngamagcobo,

wayakhonza unkulunkulu uMoloki;

wathumela khatshana izithunywa zakho,

wazehlisela lasendaweni yabafileyo.

10Wadiniswa yibude bendlela yakho,

kodwa kawutshongo ukuthi: Lokhu kakusizi lutho;

wazuza amandla amatsha,

ngakhoke kawuphelanga amandla.

11Wesaba bani kangaka ukuze uqambe amanga ungangikhumbuli,

ungangifaki enhliziyweni yakho na?

Kawusangesabi ngoba ngithule okwesikhathi eside na?

12Uthi okwenzayo kulungile,

ngizadalula izenzo zakho,

ukwenza kwakho kakuyikukusiza.

13Lapho uhlaba umkhosi, izithombe zakho ezinengi kazikusize!

Kanti umoya uzakuziphephula zonke,

lokuphephetha nje kuzithathe.

Kodwa yena othemba kimi uzakuhlala elizweni,

adle ilifa, intaba yami engcwele.

Ukusiza lokusilisa kukaNkulunkulu

14Kuzakuthiwa: Candani indlela, liyicande liyilungise,

lisuse izikhubekiso zonke endleleni yabantu bami.

15Ngoba ophakemeyo lophezulu, ohlala kuze kube nininini,

obizo lakhe lingoNgcwele, uthi:

Ngihlala endaweni ephakemeyo lengcwele,

lakuye olomoya odabukileyo lozithobayo,

ukuba ngivuselele umoya wabazithobayo,

lenhliziyo edabukileyo.

16Ngoba kangiyikulwa kokuphela,

futhi kangiyikuthukuthela njalonjalo;

ngoba umoya wokuphila waphuma kimi,

ngadabula abantu.

17Ngenxa yobubi bukaIsrayeli obukhulu ngathukuthela,

ngamtshaya ekuthukutheleni kwami, ngamlahla;

kodwa kwaqhubeka ukuhlamuka kwakhe.

18Sengizibonile izindlela zakhe, kodwa ngizakumsilisa,

ngimhole, ngimsize,

ngiduduze laba abakhalayo.

19INkosi ithi: Ukuthula, ukuthula kakube kubo abakhatshana labaseduze;

ngizakubasilisa abantu bami.

20Kodwa ababi banjengolwandle olutshukumayo;

ngoba kalulakuphumula,

lamanzi alo akhafula udaka lengcekeza.

21Kakulakuthula lakancinyane kwababi,

kutsho uNkulunkulu wami.